امام مسلم رحمہ اللہ نے زہری رحمہ اللہ کی اس سند سے روایت بیان کی ہے، آخر میں کہا: پھر یہ آیت مکمل پڑھی، (فرق صرف یہ ہے مالک رحمہ اللہ کی روایت «حَتَّىٰ جَازَهَا» (”اس سے فارغ ہوئے“) اور ابو اویس رحمہ اللہ کی روایت میں «حَتَّىٰ أَنْجَزَهَا» (”حتیٰ کہ اس کو مکمل کیا“) ہے)۔ [صحيح مسلم/كتاب الإيمان/حدیث: 383]

امام مسلم رحمہ اللہ مذکورہ بالا روایت دوسری سند سے بھی بیان کرتے ہیں۔ [صحيح مسلم/كتاب الإيمان/حدیث: 384]

حضرت ابو ہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جس قدر بھی انبیاء علیہم السلام گزرے ہیں، ان میں سے ہر ایک نبی کو اس قدر معجزات ملے کہ ان کو دیکھ کر لوگ ایمان لا سکتے تھے، اور جو معجزہ مجھے ملا وہ وحی ہے، جو اللہ تعالیٰ نے میری طرف کی ہے، اس لیے مجھے امید ہے قیامت کے دن سب سے زیادہ پیروکار میرے ہوں گے۔“ [صحيح مسلم/كتاب الإيمان/حدیث: 385]

حضرت ابوہریرہ رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ”جس ذات کے قبضے میں میری جان ہے اس کی قسم! اس امت کا (اس دور کا) جو کوئی بھی یہودی یا نصرانی میری خبر سن لے (میری نبوت رسالت کی دعوت اس کو پہنچ جائے) اور پھر وہ (مجھ پر اور) میرے لائے ہوئے پیغام پر ایمان لائے بغیر مر جائے، تو وہ ضرور دوزخیوں میں سے ہوگا۔“ [صحيح مسلم/كتاب الإيمان/حدیث: 386]

صالح ہمدانی رحمہ اللہ بیان کرتے ہیں کہ میں نے ایک خراسانی کو دیکھا، اس نے شعبی رحمہ اللہ سے سوال کیا: اے ابو عمرو! ہماری طرف اہلِ خراساں یہ کہتے ہیں کہ ایک انسان اپنی لونڈی کو آزاد کر کے اگر اس سے شادی کر لے، تو وہ اس حاجی کی طرح ہے جو اپنی قربانی کے اونٹ پر سوار ہو جاتا ہے۔ تو شعبی رحمہ اللہ نے جواب دیا: مجھے ابو بردہ بن ابی موسیٰ رحمہ اللہ نے اپنے باپ ابو موسیٰ رضی اللہ عنہ سے روایت سنائی، رسول اللہ صلی اللہ علیہ وسلم نے فرمایا: ”تین آدمیوں کو دہرا اجر دیا جائے گا، ایک اہلِ کتاب کا فرد، جو اپنے نبی پر ایمان لایا، اس نے نبی اکرم صلی اللہ علیہ وسلم کی نبوت کا زمانہ پا لیا تو آپ صلی اللہ علیہ وسلم پر ایمان لے آیا، آپ صلی اللہ علیہ وسلم کی پیروی اور تصدیق کی، تو اس کو دو اجر ملیں گے۔ دوسرا غلام جو کسی کی ملکیت میں ہے، اللہ کا جو اس پر حق ہے اس کو ادا کرتا ہے، اور اپنے آقا کے حق کو بھی ادا کرتا ہے، تو اس کو دو اجر ملیں گے۔ تیسرا وہ آدمی جس کی کوئی لونڈی ہے، تو وہ اس کو خوراک دیتا ہے اور بہترین غذا مہیا کرتا ہے، پھر اس کو ادب سکھلاتا ہے اور خوب سکھاتا ہے، پھر اس کو آزاد کر کے شادی کر لیتا ہے، اس کو بھی دہرا صلہ ملے گا۔“ پھر شعبی رحمہ اللہ نے خراسانی سے کہا: اس حدیث کو بلا محنت و مشقت اٹھائے لے لو، پہلے آدمی اس سے چھوٹی حدیث کے حصول کے لیے مدینہ کا سفر کرتا تھا۔ [صحيح مسلم/كتاب الإيمان/حدیث: 387]

امام مسلم رحمہ اللہ مذکورہ بالا روایت ایک دوسری سند سے بیان کرتے ہیں۔ [صحيح مسلم/كتاب الإيمان/حدیث: 388]

حضرت ابو ہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”اس ذات کی قسم جس کے ہاتھ میں میری جان ہے! قریب ہے کہ تم میں عیسیٰ بن مریم علیہ السلام عادل حاکم بن کر اتریں، تو وہ صلیب کو توڑ دیں گے، اور خنزیر کو قتل کریں گے، جزیہ ختم کر دیں گے، اور مال عام ہو جائے گا حتیٰ کہ اسے کوئی قبول نہیں کرے گا۔“ [صحيح مسلم/كتاب الإيمان/حدیث: 389]

سفیان رحمہ اللہ، یونس رحمہ اللہ اور ابوصالح رحمہ اللہ، زہری رحمہ اللہ سے مذکورہ بالا روایت نقل کرتے ہیں۔ ابن عیینہ رحمہ اللہ کی روایت میں ہے: «إِمَامًا مُقْسِطًا، وَحَكَمًا عَدْلًا» ”منصف امام، عادل حکمران۔“ اور یونس رحمہ اللہ کی روایت میں صرف «حَكَمًا عَادِلًا» ہے، «إِمَامًا مُقْسِطًا» نہیں۔ اور جیسا کہ لیث رحمہ اللہ کی روایت میں یہ اضافہ ہے: ”حتیٰ کہ ایک سجدہ دنیا وما فیہا سے بہتر ہو گا۔“ ابوہریرہ رضی اللہ عنہ آخر میں فرماتے: چاہو تو یہ آیت پڑھ لو! ”اہلِ کتاب میں سے ہر شخص عیسیٰ علیہ السلام کی وفات سے پہلے ان پر ایمان لائے گا۔“ ﴿وَإِن مِّنْ أَهْلِ الْكِتَابِ إِلَّا لَيُؤْمِنَنَّ بِهِ قَبْلَ مَوْتِهِ ۖ وَيَوْمَ الْقِيَامَةِ يَكُونُ عَلَيْهِمْ شَهِيدًا﴾ [سورة النساء: 159] ”اور قیامت کے دن وہ انھی پر گواہ ہوں گے۔“ [صحيح مسلم/كتاب الإيمان/حدیث: 390]

حضرت ابو ہریرہ رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ”اللہ کی قسم! عیسیٰ بن مریم علیہ السلام یقیناً حاکمِ عادل بن کر نازل ہوں گے، وہ ضرور صلیب کو توڑ ڈالیں گے، خنزیر کو قتل کریں گے اور جزیہ موقوف کر دیں گے۔ اور یقیناً جوان اونٹوں کو چھوڑ دیا جائے گا اور ان سے محنت و مشقت نہیں لی جائے گی، اور لوگوں کے دلوں سے باہمی عداوت، بغض اور حسد بالکل ختم ہو جائے گا اور لوگوں کو مال کی طرف بلایا جائے گا، تو اسے کوئی قبول نہیں کرے گا۔“ [صحيح مسلم/كتاب الإيمان/حدیث: 391]

حضرت ابو ہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”اس وقت تمہاری کیا حالت ہو گی جب مریم کے بیٹے (عیسیٰ علیہ السلام) تم میں اتریں گے اور تمہارا امام تم ہی میں سے ہو گا؟“ [صحيح مسلم/كتاب الإيمان/حدیث: 392]