سیدنا عبداللہ بن عمر رضی اللہ عنہما نے بیان کیا کہ رسول اللہ صلی اللہ علیہ وسلم نے فرمایا: ”بلال رضی اللہ عنہ تو رات رہے اذان دیتے ہیں، اس لیے تم لوگ کھاتے پیتے رہو، یہاں تک کہ ابن ام مکتوم اذان دیں۔“ [اللؤلؤ والمرجان/كتاب الصيام/حدیث: 662]

سیدہ عائشہ رضی اللہ عنہا نے بیان کیا کہ بلال رضی اللہ عنہ کچھ رات رہے سے اذان دے دیا کرتے تھے، اس لیے رسول اللہ صلی اللہ علیہ وسلم نے فرمایا: ”جب تک ابن ام مکتوم رضی اللہ عنہ اذان نہ دیں تم کھاتے پیتے رہو، کیونکہ وہ صبح صادق کے طلوع سے پہلے اذان نہیں دیتے۔“ [اللؤلؤ والمرجان/كتاب الصيام/حدیث: 663]

سیدنا عبداللہ بن مسعود رضی اللہ عنہ بیان کرتے ہیں کہ نبی کریم صلی اللہ علیہ وسلم نے فرمایا: ”بلال کی اذان تمہیں سحری کھانے سے نہ روک دے کیونکہ وہ رات رہے سے اذان دیتے ہیں یا (یہ کہا کہ) پکارتے ہیں تاکہ جو لوگ عبادت کے لیے جاگے ہیں وہ آرام کرنے کے لیے لوٹ جائیں اور جو ابھی سوئے ہوئے ہیں وہ ہوشیار ہو جائیں، کوئی یہ نہ سمجھ بیٹھے کہ فجر یا صبح صادق ہو گئی“، اور آپ صلی اللہ علیہ وسلم نے اپنی انگلیوں کے اشارے سے (طلوع صبح کی کیفیت) بتائی، انگلیوں کو اوپر کی طرف اٹھایا اور پھر آہستہ سے انہیں نیچے لائے اور پھر فرمایا: ”اس طرح (فجر ہوتی ہے)۔“ [اللؤلؤ والمرجان/كتاب الصيام/حدیث: 664]

سیدنا انس بن مالک رضی اللہ عنہ نے بیان کیا کہ رسول اللہ صلی اللہ علیہ وسلم نے فرمایا: ”سحری کھاؤ کہ سحری میں برکت ہوتی ہے۔“ [اللؤلؤ والمرجان/كتاب الصيام/حدیث: 665]

سیدنا انس رضی اللہ عنہ نے فرمایا کہ سیدنا زید بن ثابت رضی اللہ عنہ نے ان سے بیان کیا کہ ان لوگوں نے (ایک مرتبہ) نبی کریم صلی اللہ علیہ وسلم کے ساتھ سحری کھائی، پھر نماز کے لیے کھڑے ہو گئے، میں نے دریافت کیا کہ ان دونوں کے درمیان کس قدر فاصلہ رہا ہو گا؟ انہوں نے فرمایا کہ جتنا پچاس یا ساٹھ آیت پڑھنے میں صرف ہوتا ہے، اتنا فاصلہ تھا۔ [اللؤلؤ والمرجان/كتاب الصيام/حدیث: 666]

سیدنا سہل بن سعد رضی اللہ عنہ نے بیان کیا کہ رسول اللہ صلی اللہ علیہ وسلم نے فرمایا: ”جب تک لوگ افطار جلدی کریں گے اس وقت تک خیر و بھلائی پر رہیں گے۔“ [اللؤلؤ والمرجان/كتاب الصيام/حدیث: 667]

سیدنا عمر رضی اللہ عنہ نے بیان کیا کہ رسول اللہ صلی اللہ علیہ وسلم نے فرمایا: ”جب رات اس طرف (مشرق) سے آئے اور دن ادھر مغرب میں چلا جائے کہ سورج ڈوب جائے تو روزہ افطار کرنے کا وقت آ گیا۔“ [اللؤلؤ والمرجان/كتاب الصيام/حدیث: 668]

سیدنا عبداللہ بن ابی اوفی رضی اللہ عنہ نے بیان کیا کہ ہم رسول اللہ صلی اللہ علیہ وسلم کے ساتھ سفر میں تھے (روزہ کی حالت میں)۔ نبی اکرم صلی اللہ علیہ وسلم نے ایک صاحب (سیدنا بلال رضی اللہ عنہ) سے فرمایا: ”اتر کر میرے لیے ستو گھول لو۔“ انہوں نے عرض کی: یا رسول اللہ! ابھی تو سورج باقی ہے۔ آپ صلی اللہ علیہ وسلم نے پھر فرمایا: ”اتر کر ستو گھول لو۔“ اب کی مرتبہ بھی انہوں نے وہی عرض کی: یا رسول اللہ! ابھی سورج باقی ہے، لیکن آپ صلی اللہ علیہ وسلم کا حکم اب بھی یہی تھا: ”اتر کر میرے لیے ستو گھول لو۔“ چنانچہ وہ اترے اور ستو گھول دیا، پھر آپ صلی اللہ علیہ وسلم نے ایک طرف اشارہ کر کے فرمایا: ”جب تم دیکھو کہ رات یہاں سے شروع ہو چکی ہے، تو روزہ دار کو افطار کر لینا چاہیے۔“ [اللؤلؤ والمرجان/كتاب الصيام/حدیث: 669]

سیدنا عبداللہ بن عمر رضی اللہ عنہما نے بیان کیا کہ رسول اللہ صلی اللہ علیہ وسلم نے صومِ وصال سے منع فرمایا، صحابہ نے عرض کی کہ آپ تو وصال کرتے ہیں؟ آپ نے فرمایا: ”میں تمہاری طرح نہیں ہوں، مجھے تو کھلایا اور پلایا جاتا ہے۔“ [اللؤلؤ والمرجان/كتاب الصيام/حدیث: 670]

سیدنا ابوہریرہ رضی اللہ عنہ نے بیان کیا کہ رسول اللہ صلی اللہ علیہ وسلم نے مسلسل (کئی دن تک سحری و افطاری کے بغیر) روزہ رکھنے سے منع فرمایا تھا، اس پر مسلمانوں میں سے ایک آدمی نے عرض کی: یا رسول اللہ! آپ تو وصال کرتے ہیں؟ آپ صلی اللہ علیہ وسلم نے فرمایا: ”میری طرح تم میں سے کون ہے؟ مجھے تو رات میں میرا رب کھلاتا ہے اور وہی مجھے سیراب کرتا ہے۔“ لوگ اس پر بھی جب صومِ وصال رکھنے سے نہ رکے تو آپ صلی اللہ علیہ وسلم نے ان کے ساتھ دو دن تک وصال کیا، پھر عید کا چاند نکل آیا تو آپ صلی اللہ علیہ وسلم نے فرمایا: ”اگر چاند نہ دکھائی دیتا تو میں اور کئی دن وصال کرتا۔“ گویا جب صومِ وصال سے وہ لوگ نہ رکے تو آپ صلی اللہ علیہ وسلم نے ان کو سزا دینے کے لیے یہ کہا۔ [اللؤلؤ والمرجان/كتاب الصيام/حدیث: 671]