سیدنا ابو ہریرہ رضی اللہ عنہ نے بیان کیا کہ رسول اللہ صلی اللہ علیہ وسلم نے فرمایا: ”اللہ تعالیٰ فرماتا ہے کہ ابن آدم مجھے تکلیف پہنچاتا ہے، وہ زمانے کو گالی دیتا ہے حالانکہ میں ہی زمانہ ہوں، میرے ہی ہاتھ میں سب کچھ ہے، میں رات اور دن کو ادلتا بدلتا رہتا ہوں۔“ [اللؤلؤ والمرجان/كتاب الألفاظ من الأدب وغيرها/حدیث: 1449]

سیدنا ابوہریرہ رضی اللہ عنہ نے بیان کیا کہ رسول اللہ صلی اللہ علیہ وسلم نے فرمایا: ”لوگ (انگور کو) «الْكَرْمُ» کہتے ہیں، «الْكَرْمُ» تو مومن کا دل ہے۔“ [اللؤلؤ والمرجان/كتاب الألفاظ من الأدب وغيرها/حدیث: 1450]

سیدنا ابوہریرہ رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: ”کوئی شخص (کسی غلام یا کسی بھی شخص سے) یہ نہ کہے: «أَطْعِمْ رَبَّكَ» ”اپنے رب (مراد آقا) کو کھانا کھلا“، «أَوْضِئْ رَبَّكَ» ”اپنے رب کو وضو کرا“، «اسْقِ رَبَّكَ» ”اپنے رب کو پانی پلا“ بلکہ صرف «سَيِّدِي» ”میرے سردار“، «مَوْلَايَ» ”میرے آقا“ کے الفاظ کہنا چاہیے، اسی طرح کوئی شخص یہ نہ کہے: «عَبْدِي» ”میرا بندہ“، «أَمَتِي» ”میری بندی“ بلکہ یوں کہنا چاہیے: «فَتَايَ» ”میرا لڑکا (ملازم)“، «فَتَاتِي» ”میری لڑکی (ملازمہ)“، «غُلَامِي» ”میرا غلام“۔“ [اللؤلؤ والمرجان/كتاب الألفاظ من الأدب وغيرها/حدیث: 1451]

سیدہ عائشہ رضی اللہ عنہا نے بیان کیا کہ نبی کریم صلی اللہ علیہ وسلم نے فرمایا: ”تم میں کوئی شخص یہ نہ کہے کہ میرا نفس پلید ہو گیا ہے، بلکہ یہ کہے کہ میرا دل خراب یا پریشان ہو گیا۔“ [اللؤلؤ والمرجان/كتاب الألفاظ من الأدب وغيرها/حدیث: 1452]

سیدنا سہل بن حنیف رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: ”تم میں سے کوئی ہرگز یوں نہ کہے کہ میرا نفس پلید ہو گیا، لیکن یوں کہہ سکتا ہے کہ میرا دل خراب یا پریشان ہو گیا۔“ [اللؤلؤ والمرجان/كتاب الألفاظ من الأدب وغيرها/حدیث: 1453]