ابراہیم فرماتے ہیں کہ حائضہ اگر حیض کے دوران پہنے ہوئے کپڑوں میں کوئی نشان خون کا نہ دیکھے تو پاک ہونے کے بعد ان پر پانی چھڑک لے اور انہیں میں نماز پڑھ لے۔ [مصنف ابن ابي شيبه/كتاب الطهارة/حدیث: 1021]

حضرت عطا سے ایک آدمی نے کہا کہ اگر حائضہ پاک ہونے کے بعد کپڑوں پر خون کا نشان دیکھے تو کیا اس کے لیے اتنا کافی نہیں کہ خون کو دھو لے اور باقی کپڑوں کو چھوڑ دے؟ فرمایا کافی ہے۔ [مصنف ابن ابي شيبه/كتاب الطهارة/حدیث: 1022]

حضرت سعید بن جبیر سے پوچھا گیا کہ اگر حالت حیض کا خون کپڑوں پر لگ جائے تو کیا کیا جائے؟ فرمایا عورت اسے دھو لے اور اس کی جگہ ورس، زعفران یا عنبر لگائے۔ [مصنف ابن ابي شيبه/كتاب الطهارة/حدیث: 1023]

حضرت ابراہیم فرماتے ہیں کہ عورت کے کپڑوں پر اگر حیض کا خون لگا ہو تو اسے دھوئے گی، پانی چھڑ کنا کچھ نہیں۔ [مصنف ابن ابي شيبه/كتاب الطهارة/حدیث: 1024]

حضرت معاذہ فرماتی ہیں کہ ایک عورت نے حضرت عائشہ رضی اللہ عنہا سے کپڑے پر لگے ہوئے خون کے دھبوں پر پانی چھڑکنے کا پوچھا تو فرمایا اسے پانی سے دھوؤ کیوں کہ وہ پانی سے پاک ہوگا۔ [مصنف ابن ابي شيبه/كتاب الطهارة/حدیث: 1025]

حضرت جابر بن زید سے پوچھا گیا کہ اگر کوئی حیض کا خون کپڑوں پر لگنے کے بعد اسے دھو لے لیکن خون کا نشان باقی رہ جائے تو کیا وہ اس کپڑے میں نماز پڑھ سکتی ہے؟ فرمایا پڑھ سکتی ہے۔ [مصنف ابن ابي شيبه/كتاب الطهارة/حدیث: 1026]

حضرت عائشہ رضی اللہ عنہا فرماتی ہیں کہ ہم میں سے کسی کے پاس ایک ہی قمیص ہوتی تھی جس میں وہ حیض کی حالت میں بھی ہوتی اور جنابت کی حالت میں بھی، پھر وہ اس میں اپنے حیض کے خون کا کوئی قطرہ دیکھتی تو اسے اپنے تھوک سے کھرچ دیتی۔ [مصنف ابن ابي شيبه/كتاب الطهارة/حدیث: 1027]

حضرت مجاہد فرماتے ہیں کہ عورت حیض کے دوران پہنے ہوئے کپڑوں میں نماز پڑھ سکتی ہے لیکن اگر خون لگا ہو تو اسے دھو لے۔ [مصنف ابن ابي شيبه/كتاب الطهارة/حدیث: 1028]

حضرت ربیع فرماتے ہیں کہ میں نے حضرت حسن سے پوچھا کہ عورت حیض کے دوران پہنے ہوئے کپڑوں میں نماز پڑھ سکتی ہے؟ فرمایا اس میں کوئی حرج نہیں، البتہ اگر کچھ لگا ہو تو دھو لے۔ [مصنف ابن ابي شيبه/كتاب الطهارة/حدیث: 1029]

حضرت حکم حائضہ کے کپڑوں کے بارے میں فرماتے ہیں کہ خون کی جگہ دھو لے۔ [مصنف ابن ابي شيبه/كتاب الطهارة/حدیث: 1030]