حضرت عائشہ رضی اللہ عنہا فرماتی ہیں کہ حضور صلی اللہ علیہ وآلہ وسلم سو جاتے یہاں تک کہ خراٹوں کی آواز آنے لگی پھر اٹھ کر بغیر وضو کے نماز ادا فرما لیتے تھے۔ [مصنف ابن ابي شيبه/كتاب الطهارة/حدیث: 1421]

حضرت حکم اور حضرت حماد فرماتے ہیں کہ جب تک پہلو زمین پر نہ لگے وضو نہیں ٹوٹتا۔ [مصنف ابن ابي شيبه/كتاب الطهارة/حدیث: 1422]

حضرت ابراہیم فرماتے ہیں کہ کھڑے ہو کر یا بیٹھ کر سونے سے وضو نہیں ٹوٹتا وضو تو پہلو کے بل لیٹنے سے ٹوٹتا ہے۔ [مصنف ابن ابي شيبه/كتاب الطهارة/حدیث: 1423]

حضرت ابن عباس رضی اللہ عنہما فرماتے ہیں کہ ہر سونے والے کا وضو ٹوٹ گیا البتہ سر کو ایک مرتبہ یا دو مرتبہ جھکا کر سونے والے کا وضو نہیں ٹوٹا۔ [مصنف ابن ابي شيبه/كتاب الطهارة/حدیث: 1424]

حضرت ابن عباس رضی اللہ عنہما فرماتے ہیں کہ ایک مرتبہ میں اپنی خالہ حضرت میمونہ ام المؤمنین کے پاس گیا۔ اس رات حضور صلی اللہ علیہ وآلہ وسلم بھی وہیں تھے۔ آپ صلی اللہ علیہ وآلہ وسلم رات کو نماز کے لیے اٹھے، پھر ایسا سوئے کہ مجھے سیٹی کی آواز بھی سنائی دی۔ پھر حضرت بلال نماز کی اطلاع دینے آئے تو حضور صلی اللہ علیہ وآلہ وسلم نماز کے لیے تشریف لے گئے حالانکہ آپ نے نہ وضو کیا اور نہ پانی کو ہاتھ لگایا۔ [مصنف ابن ابي شيبه/كتاب الطهارة/حدیث: 1425]

عبد اللہ فرماتے ہیں کہ بعض اوقات نبی کریم صلی اللہ علیہ وآلہ وسلم حالت سجود میں ایسا سو جاتے کہ ہمیں سانس کی آواز سنائی دینے لگتی جس سے ہمیں آپ کی نیند کا علم ہوتا۔ پھر آپ صلی اللہ علیہ وآلہ وسلم بیدار ہو کر نماز جاری رکھتے۔ [مصنف ابن ابي شيبه/كتاب الطهارة/حدیث: 1426]

حضرت ابو موسیٰ لوگوں کے درمیان اس طرح سو جاتے کہ خراٹوں کی آواز آنے لگتی۔ جب انہیں بیدار کیا جاتا تو فرماتے کیا تم نے میرے وضو ٹوٹنے کی آواز سنی؟ لوگ کہتے نہیں تو وہ اٹھ کر نماز شروع کردیتے۔ [مصنف ابن ابي شيبه/كتاب الطهارة/حدیث: 1427]

حضرت ابوہریرہ نے فرمایا: کہ جو شخص نیند کا استحقاق کرے اس کا وضو ٹوٹ گیا۔ جریری کہتے ہیں کہ ہم نے استحقاق نوم کے بارے میں سوال کیا تو ہمیں بتایا گیا کہ اس سے مراد پہلو کو زمین پر لگانا ہے۔ [مصنف ابن ابي شيبه/كتاب الطهارة/حدیث: 1428]

حضرت طاؤس سے بیٹھ کر سونے کے بارے میں سوال کیا گیا تو فرمایا یہ (بیداری) تو بس ایک بندھن ہے، جب تم نے اسے کھو دیا (یعنی گہری نیند آگئی) تو وضو کرے۔ [مصنف ابن ابي شيبه/كتاب الطهارة/حدیث: 1429]

حضرت عکرمہ فرماتے ہیں کہ یہ (بیداری) تو بس ایک بندھن ہے، پس جب سو گیا تو وضو کرے۔ [مصنف ابن ابي شيبه/كتاب الطهارة/حدیث: 1430]