ایک ماہی گیر کہتے ہیں کہ ایک مرتبہ امیر المؤمنین حضرت عمر رزق (سرکاری راشن) کے غلے کی دیکھ بھال کے لیے مقام جار پر تشریف لائے تو میں نے عرض کیا اے امیر المؤمنین! ہم اپنی کشتیوں پر سوار ہوتے ہیں اور اپنے ساتھ پینے کے لیے تھوڑا سا پانی بھی لے لیتے ہیں۔ لوگوں کا خیال ہے کہ سمندر کا پانی پاک نہیں کرتا۔ حضرت عمر نے فرمایا اس سے زیادہ پاک پانی کون سا ہوسکتا ہے؟ [مصنف ابن ابي شيبه/كتاب الطهارة/حدیث: 1391]

حضرت عکرمہ فرماتے ہیں کہ حضرت عمر سے سمندر کے پانی کے بارے میں سوال کیا گیا تو فرمایا کہ اس سے زیادہ پاک پانی کون سا ہوسکتا ہے؟ [مصنف ابن ابي شيبه/كتاب الطهارة/حدیث: 1392]

حضرت عبد اللہ بن عباس رضی اللہ عنہما سے سمندر کے پانی کے بارے میں سوال کیا گیا تو فرمایا کہ دو پانی ایسے ہیں جن سے وضو کرنے میں کوئی قباحت نہیں۔ سمندر کا پانی فرات کا پانی۔ [مصنف ابن ابي شيبه/كتاب الطهارة/حدیث: 1393]

حضرت ابن عباس رضی اللہ عنہما فرماتے ہیں کہ سمندر کا شکار حلال اور اس کا پانی پاک کرنے والا ہے۔ [مصنف ابن ابي شيبه/كتاب الطهارة/حدیث: 1394]

حضرت ابن سیرین فرماتے ہیں کہ سمندر کے پانی سے وضو کرنے میں کوئی حرج نہیں۔ [مصنف ابن ابي شيبه/كتاب الطهارة/حدیث: 1395]

حضرت حسن فرماتے ہیں کہ سمندر کے پانی سے وضو کرنے میں کوئی حرج نہیں۔ یہ پاک کرنے والا ہے۔ [مصنف ابن ابي شيبه/كتاب الطهارة/حدیث: 1396]

حضرت عکرمہ سے سوال کیا گیا کہ کیا سمندر کے پانی سے وضو کیا جاسکتا ہے؟ تو فرمایا کیا ہم اس کی مچھلیاں نہیں کھاتے؟ [مصنف ابن ابي شيبه/كتاب الطهارة/حدیث: 1397]

حضرت طاؤس فرماتے ہیں کہ سمندر کا پانی دوسرے پانی کے مقابلے میں میل کو زیادہ صاف کرنے والا ہے۔ حضرت طاؤس اسے پاک سمجھتے تھے۔ [مصنف ابن ابي شيبه/كتاب الطهارة/حدیث: 1398]

ابراہیم فرماتے ہیں کہ سمندر کا پانی بھی کافی ہے لیکن میٹھا پانی مجھے اس سے زیادہ پسند ہے۔ [مصنف ابن ابي شيبه/كتاب الطهارة/حدیث: 1399]

حضرت عطاء فرماتے ہیں کہ سمندر کا پانی پاک کرنے والا ہے۔ [مصنف ابن ابي شيبه/كتاب الطهارة/حدیث: 1400]