حضرت سلمان فرماتے ہیں کہ جب تم میں سے کوئی خارش کرے تو اپنے جلد پر تھوک نہ لگائے کیونکہ تھوک پاکیزہ چیز نہیں۔ [مصنف ابن ابي شيبه/كتاب الطهارة/حدیث: 1501]

حضرت اعمش سے پوچھا گیا کہ کیا ابراہیم تھوک کو ناپسند سمجھتے تھے؟ فرمایا وہ اس بات کو ناپسند خیال فرماتے تھے کہ آدمی خارش کرنے کے بعد اپنی جلد پر تھوک لگائے کیونکہ یہ پاکی حاصل کرنے کا ذریعہ نہیں ہے۔ [مصنف ابن ابي شيبه/كتاب الطهارة/حدیث: 1502]

حضرت ابراہیم اس بات کو ناپسند خیال فرماتے تھے کہ آدمی اپنے پھوڑے پر تھوک لگائے۔ [مصنف ابن ابي شيبه/كتاب الطهارة/حدیث: 1503]

حضرت حارث بن مالک کہتے ہیں کہ میں حضرت حسن کے مکان میں تھا کہ ایک آدمی نے آ کر ان سے سوال کیا کہ اے ابو سعید! ایک آدمی اپنے جسم یا اپنے بازوؤں پر خارش کرتا ہے پھر اپنا تھوک اس پر لگا کر ملتا ہے تو کیا وہ وضو کرے؟ فرمایا نہیں۔ [مصنف ابن ابي شيبه/كتاب الطهارة/حدیث: 1504]

حضرت ابو العلاء فرماتے ہیں کہ ہم حضرت قتادہ کے پاس تھے کہ لوگوں نے ان کے سامنے حضرت ابراہیم اور کو فیین کے قول کا تذکرہ کیا کہ تھوک کو دھویا جائے تو حضرت قتادہ نے ہمیں یہ بتانے کے لئے کہ تھوک کوئی چیز نہیں اپنی پنڈلی پر خارش کی پھر اپنی تھوک کو اس پر مل دیا۔ [مصنف ابن ابي شيبه/كتاب الطهارة/حدیث: 1505]

حضرت ابن عمر رضی اللہ عنہما فرماتے ہیں کہ اگر تم میں سے کوئی غسل جنابت سے فارغ ہونے سے پہلے پیشاب کر دے تو اپنے سر پر پانی ڈالے۔ [مصنف ابن ابي شيبه/كتاب الطهارة/حدیث: 1506]

حضرت ابن عمر رضی اللہ عنہما فرماتے ہیں کہ وہ دوبارہ غسل کرے۔ [مصنف ابن ابي شيبه/كتاب الطهارة/حدیث: 1507]

حضرت ابن سیرین فرماتے ہیں کہ بالکل نئے غسل کی ضرورت نہیں۔ [مصنف ابن ابي شيبه/كتاب الطهارة/حدیث: 1508]

حضرت عطاء اس جنبی کے بارے میں جو کنویں کے کنارے موجود ہو اور اس کے پاس برتن نہ ہو فرماتے ہیں کہ وہ اپنا کپڑا لٹکا کر گیلا کر کے پھر اسے اپنے جسم پر نچوڑ لے۔ [مصنف ابن ابي شيبه/كتاب الطهارة/حدیث: 1509]

حضرت جابر سے اس جنبی کے بارے میں سوال کیا گیا جو تالاب کے کنارے کھڑا ہو تو فرمایا وہ ایک کنارے سے غسل کرلے۔ [مصنف ابن ابي شيبه/كتاب الطهارة/حدیث: 1510]