حضرت محمد بن زیاد کہتے ہیں کہ حضرت ابوہریرہ نے ایک مرتبہ کچھ لوگوں کو وضو کرتے دیکھا تو ان سے فرمایا: کہ اچھی طرح وضو کرو، کیونکہ میں نے ابوالقاسم (صلی اللہ علیہ وآلہ وسلم) کو فرماتے ہوئے سنا ہے کہ خشک ایڑیاں جہنم کا شکار ہوں گی۔ [مصنف ابن ابي شيبه/كتاب الطهارة/حدیث: 271]

حضرت جابر بن عبداللہ فرماتے ہیں کہ میں نے رسول اللہ صلی اللہ علیہ وآلہ وسلم کو فرماتے ہوئے سنا کہ خشک ایڑیاں جہنم کا شکار ہوں گی۔ [مصنف ابن ابي شيبه/كتاب الطهارة/حدیث: 272]

حضرت ابو امامہ یا ان کے بھائی روایت کرتے ہیں کہ نبی کریم صلی اللہ علیہ وآلہ وسلم نے کچھ لوگوں کو وضو کرتے ہوئے دیکھا۔ ان میں سے ایک آدمی کی ایڑی خشک تھی۔ آپ صلی اللہ علیہ وآلہ وسلم نے فرمایا خشک ایڑیاں جہنم کا شکار ہوں گی۔ [مصنف ابن ابي شيبه/كتاب الطهارة/حدیث: 273]

حضرت سلمہ بن قیس فرماتے ہیں کہ نبی کریم صلی اللہ علیہ وآلہ وسلم نے ارشاد فرمایا ”جب تم وضو کرو تو ناک بھی صاف کرو اور جب استنجاء کرو تو طاق عدد میں پتھر استعمال کرو۔“ [مصنف ابن ابي شيبه/كتاب الطهارة/حدیث: 274]

حضرت لقیط بن صبرہ فرماتے ہیں کہ میں نے نبی کریم صلی اللہ علیہ وآلہ وسلم سے عرض کیا ”یا رسول اللہ! مجھے وضو کے بارے میں بتا دیجیے“ آپ صلی اللہ علیہ وآلہ وسلم نے فرمایا ”خوب اچھی طرح پورا پورا وضو کرو اور اچھی طرح ناک صاف کرو البتہ اگر روزہ ہو تو ناک صاف کرنے میں مبالغہ مت کرو“ [مصنف ابن ابي شيبه/كتاب الطهارة/حدیث: 275]

حضرت عمرو عنبری فرماتے ہیں کہ حضرت عبیداللہ بن عبداللہ بن عتبہ نے ایک مرتبہ وضو کیا لیکن وہ ناک صاف کرنا بھول گئے۔ لڑکا وضو کا برتن لے جا چکا تھا۔ آپ نے فرمایا ”میں رسول اللہ صلی اللہ علیہ وآلہ وسلم کا ایک حکم بھول گیا“ پھر اسے بلا کر دو مرتبہ ناک میں پانی ڈالا۔ [مصنف ابن ابي شيبه/كتاب الطهارة/حدیث: 276]

حضرت عبدالرحمن بن یزید فرماتے ہیں کہ شیطان کے پاس ایک شیشی ہے جس میں سفوف جیسی کوئی چیز ہے، جب لوگ نماز کا ارادہ کرتے ہیں تو وہ ان کی طرف اسے پھونک دیتا ہے۔ اسی وجہ سے ناک صاف کرنے کا حکم دیا گیا ہے۔ [مصنف ابن ابي شيبه/كتاب الطهارة/حدیث: 277]

حضرت عبداللہ بن عباس فرماتے ہیں کہ نبی کریم صلی اللہ علیہ وآلہ وسلم نے ارشاد فرمایا: ”وضو میں دو یا تین مرتبہ اچھی طرح ناک صاف کرو۔ [مصنف ابن ابي شيبه/كتاب الطهارة/حدیث: 278]

حضرت ابراہیم فرماتے ہیں کہ اسلاف اس بات کو ناپسند کرتے تھے کہ ناک میں پانی اس مبالغہ سے ڈالا جائے جیسے دوائی ڈالی جاتی ہے۔ [مصنف ابن ابي شيبه/كتاب الطهارة/حدیث: 279]

حضرت ابوہریرہ روایت کرتے ہیں کہ نبی کریم صلی اللہ علیہ وآلہ وسلم نے ارشاد فرمایا: ”جو وضو کرے تو وہ ناک کو بھی صاف کرے اور جو استنجا کرے تو وہ طاق عدد میں پتھر استعمال کرے۔“ [مصنف ابن ابي شيبه/كتاب الطهارة/حدیث: 280]