حضرت بدر کہتے ہیں کہ میں جمعہ کے دن ابو وائل کی خدمت میں حاضر ہوا اور ان کے لئے پانی گرم کیا جا رہا تھا۔ [مصنف ابن ابي شيبه/كتاب الطهارة/حدیث: 261]

حضرت یزید کہتے ہیں کہ حضرت سلمہ کے لئے پانی گرم کیا جاتا تھا اور اس سے وضو کرتے تھے۔ [مصنف ابن ابي شيبه/كتاب الطهارة/حدیث: 262]

حضرت مجاہد گرم پانی سے وضو کرنے کو ناپسندیدہ خیال کرتے تھے۔ [مصنف ابن ابي شيبه/كتاب الطهارة/حدیث: 263]

حضرت عبداللہ بن مسعود رضی اللہ عنہ فرماتے ہیں کہ لیلۃ الجن میں نبی کریم صلی اللہ علیہ وآلہ وسلم نے مجھ سے فرمایا کہ کیا تمہارے پاس وضو کے لئے پانی ہے؟ میں نے عرض کیا کہ میرے پاس ایک برتن میں نبیذ ہے اس کے سوا کچھ نہیں۔ آپ صلی اللہ علیہ وآلہ وسلم نے فرمایا ”کھجور پاکیزہ ہے اور اس کا پانی پاک ہے۔“ [مصنف ابن ابي شيبه/كتاب الطهارة/حدیث: 264]

حضرت حارث کہتے ہیں کہ حضرت علی رضی اللہ عنہ نبیذ سے وضو کرنے میں کسی قسم کا حرج نہ سمجھتے تھے۔ [مصنف ابن ابي شيبه/كتاب الطهارة/حدیث: 265]

حضرت عکرمہ فرماتے ہیں کہ جس شخض کے پاس وضو کا پانی نہ ہو وہ نبیذ سے وضو کر لے۔ [مصنف ابن ابي شيبه/كتاب الطهارة/حدیث: 266]

حضرت ابو العالیہ نبیذ سے غسل کرنے کو ناپسند خیال کرتے تھے۔ [مصنف ابن ابي شيبه/كتاب الطهارة/حدیث: 267]

حضرت ابو سلمہ کہتے ہیں کہ ایک مرتبہ حضرت عائشہ رضی اللہ عنہا نے عبدالرحمن کو وضو کرتے دیکھا تو ان سے فرمایا کہ خوب اچھی طرح وضو کرو۔ کیونکہ میں نے رسول اللہ صلی اللہ علیہ وآلہ وسلم کو فرماتے ہوئے سنا ہے کہ خشک ایڑیاں جہنم کا شکار ہوں گی۔ [مصنف ابن ابي شيبه/كتاب الطهارة/حدیث: 268]

حضرت جابر رضی اللہ عنہ فرماتے ہیں کہ ایک مرتبہ نبی کریم صلی اللہ علیہ وآلہ وسلم نے کچھ لوگوں کو دیکھا جو وضو کر رہے تھے لیکن پانی ان کی ایڑیوں کو نہ لگا تھا۔ آپ صلی اللہ علیہ وآلہ وسلم نے فرمایا خشک ایڑیوں کے لیے جہنم کی ہلاکت ہے۔ [مصنف ابن ابي شيبه/كتاب الطهارة/حدیث: 269]

حضرت عبداللہ بن عمرو فرماتے ہیں کہ نبی کریم صلی اللہ علیہ وآلہ وسلم نے کچھ لوگوں کو وضو کرتے ہوئے دیکھا۔ ان کی ایڑیاں خشک رہ جانے کی وجہ سے چمکتی ہوئی محسوس ہو رہی تھیں۔ آپ صلی اللہ علیہ وآلہ وسلم نے ان سے فرمایا کہ خشک ایڑیوں کے لیے جہنم کی ہلاکت ہے، خوب اچھی طرح پورا پورا وضو کرو۔ [مصنف ابن ابي شيبه/كتاب الطهارة/حدیث: 270]