حضرت نافع فرماتے ہیں کہ حضرت عبداللہ بن عمر رضی اللہ عنہما گھوڑے کے جوٹھے میں کوئی خرابی نہیں سمجھتے تھے۔ [مصنف ابن ابي شيبه/كتاب الطهارة/حدیث: 321]

حضرت اشعث کہتے ہیں کہ حضرت حسن اور حضرت ابن سیرین گھوڑے کے جوٹھے میں کوئی حرج نہیں سمجھتے تھے۔ [مصنف ابن ابي شيبه/كتاب الطهارة/حدیث: 322]

حضرت عکرمہ فرماتے ہیں کہ ہر وہ جانور جس کا گوشت کھایا جاتا ہے اس کے جوٹھے سے وضو کرنے میں کوئی حرج نہیں۔ [مصنف ابن ابي شيبه/كتاب الطهارة/حدیث: 323]

حضرت ابراہیم فرماتے ہیں کہ اونٹ، گائے اور بکری کے جوٹھے میں کوئی حرج نہیں۔ [مصنف ابن ابي شيبه/كتاب الطهارة/حدیث: 324]

حضرت حسن اس برتن سے وضو کے بارے میں جس سے مرغی نے پیا ہو، فرمایا کرتے تھے کہ اس پانی سے وضو کرنا مکروہ ہے۔ [مصنف ابن ابي شيبه/كتاب الطهارة/حدیث: 325]

حضرت ابو قلابہ کہتے ہیں کہ حضرت ابو قتادہ بلی کے لئے برتن کو جھکا دیتے اور وہ اس سے پانی پیتی پھر آپ اسی پانی سے وضو فرما لیتے اور ارشاد فرماتے ”یہ تو گھر کا سامان ہے۔“ [مصنف ابن ابي شيبه/كتاب الطهارة/حدیث: 326]

حضرت ابو قتادہ کی بہو حضرت کبشہ بنت کعب فرماتی ہیں کہ وہ حضرت ابو قتادہ کے لئے وضو کا پانی ڈال رہی تھیں کہ اتنے میں ایک بلی آئی وہ پیاسی تھی، چناچہ حضرت ابو قتادہ نے برتن اس بلی کے لئے جھکا دیا۔ میں اس منظر کو تعجب سے دیکھنے لگی تو انہوں نے فرمایا ”بیٹی تعجب کیوں کر رہی ہو۔ رسول اللہ صلی اللہ علیہ وآلہ وسلم نے فرمایا ہے کہ بلی ناپاک نہیں ہے یہ تو تمہارے گھروں میں چکر لگانے والا جانور ہے۔ [مصنف ابن ابي شيبه/كتاب الطهارة/حدیث: 327]

حضرت ابن حکیم کہتے ہیں کہ میں نے حضرت ابو وائل سے بلی کے جوٹھے کا حکم دریافت کیا تو انہوں نے فرمایا کہ اس میں کوئی حرج نہیں۔ [مصنف ابن ابي شيبه/كتاب الطهارة/حدیث: 328]

حضرت صفیہ بنت داب فرماتی ہیں کہ میں نے حسین بن علی رضی اللہ عنہ سے بلی کے جوٹھے کا حکم دریافت کیا تو انہوں نے فرمایا ”وہ تو گھر کا ایک حصہ ہے“ [مصنف ابن ابي شيبه/كتاب الطهارة/حدیث: 329]

حضرت عبداللہ بن عباس رضی اللہ عنہما فرماتے ہیں کہ بلی گھر کا ایک سامان ہے۔ [مصنف ابن ابي شيبه/كتاب الطهارة/حدیث: 330]