ایک مدنی شخص روایت کرتے ہیں کہ ایک مرتبہ حضرت عبداللہ بن عمر رضی اللہ عنہما کے لیے وضو کا پانی رکھا گیا۔ اس پانی میں بلی نے منہ مارا۔ وضو کرنے کے لئے تشریف لائے تو انہیں اس بارے میں بتایا گیا، انہوں نے فرمایا ”بلی تو گھر کا حصہ ہے“ [مصنف ابن ابي شيبه/كتاب الطهارة/حدیث: 331]

حضرت ابراہیم فرماتے ہیں ”بلی کے جوٹھے میں کوئی حرج نہیں“ [مصنف ابن ابي شيبه/كتاب الطهارة/حدیث: 332]

حضرت محمد بن علی رحمہ اللہ فرماتے ہیں ”بلی کے پس ماندہ سے وضو کرنے میں کوئی حرج نہیں؟ وہ تو گھر کا حصہ ہے“ [مصنف ابن ابي شيبه/كتاب الطهارة/حدیث: 333]

حضرت خالد فرماتے ہیں کہ ایک مرتبہ بلی نے حضرت ابو العلاء کے برتن میں سے پانی پیا تو انہوں نے اس کے پس ماندہ سے وضو کر لیا تھا۔ [مصنف ابن ابي شيبه/كتاب الطهارة/حدیث: 334]

حضرت حسن بلی کے جوٹھے کو استعمال کرنے میں کوئی حرج نہ سمجھتے تھے۔ [مصنف ابن ابي شيبه/كتاب الطهارة/حدیث: 335]

حضرت عکرمہ فرماتے ہیں کہ جب کبھی حضرت عباس بن عبد المطلب کے لئے وضو کا پانی رکھا جاتا اور وہ کسی کام میں مصروف ہوتے، اس دوران اگر بلی آ کر اس میں منہ مار لیتی تو وہ اس پانی سے وضو کر کے نماز پڑھ لیا کرتے تھے۔ [مصنف ابن ابي شيبه/كتاب الطهارة/حدیث: 336]

حضرت ابو امامہ فرماتے ہیں کہ بلی گھر کا ایک سامان ہے۔ [مصنف ابن ابي شيبه/كتاب الطهارة/حدیث: 337]

حضرت علی رضی اللہ عنہ سے بلی کے پس ماندہ کے بارے میں سوال کیا گیا تو انہوں نے فرمایا کہ اس میں کوئی حرج نہیں۔ [مصنف ابن ابي شيبه/كتاب الطهارة/حدیث: 338]

حضرت ابو قتادہ فرماتے ہیں کہ نبی کریم صلی اللہ علیہ وآلہ وسلم نے ارشاد فرمایا ”بلی گھر میں چکر لگانے والے (جانوروں) میں سے ہے۔ [مصنف ابن ابي شيبه/كتاب الطهارة/حدیث: 339]

حضرت ابو اسحاق فرماتے ہیں کہ ایک مرتبہ بلی نے حضرت علقمہ کے گھر دودھ میں منہ مار دیا، گھر والے اس دودھ کو گرانا چاہتے تھے لیکن حضرت علقمہ نے فرمایا کہ اسے گرانا میرے دل پر گراں گزرتا ہے! [مصنف ابن ابي شيبه/كتاب الطهارة/حدیث: 340]