حضرت جابر بن زید سے اس عورت کے بارے میں سوال کیا گیا جسے حالت جنابت میں غسل کرنے سے پہلے حیض آجائے۔ فرمایا ”اگرچہ وہ حائضہ ہوگئی ہو پھر بھی اس پر غسل کرنا لازم ہے“۔ [مصنف ابن ابي شيبه/كتاب الطهارة/حدیث: 851]

حضرت عامر فرماتے ہیں اگر چاہے تو غسل کرے اور اگر چاہے تو غسل نہ کرے۔ [مصنف ابن ابي شيبه/كتاب الطهارة/حدیث: 852]

حضرت عطاء فرماتے ہیں کہ وہ غسل جنابت کرے اور جب پاک ہوجائے تو حیض کا غسل بھی کرلے۔ [مصنف ابن ابي شيبه/كتاب الطهارة/حدیث: 853]

حضرت ابن عباس رضی اللہ عنہما فرماتے ہیں کہ اگر احتلام ہو لیکن تری نظر نہ آئے تو غسل لازم نہیں لیکن اگر احتلام یاد نہیں لیکن تری نظر آئے تو غسل واجب ہے۔ [مصنف ابن ابي شيبه/كتاب الطهارة/حدیث: 854]

حضرت ابو حمزہ فرماتے ہیں کہ ایک مرتبہ میں اپنی سواری پر نیند اور بیداری کی درمیانی کیفیت میں جا رہا تھا کہ مجھے شہوت محسوس ہوئی، مجھے اپنی حالت اجنبی سی محسوس ہوئی تو مجھ سے تھوڑا سا پانی نکلا جس سے میری ران کی جڑ اور اس کے آس پاس کی جگہ تر ہوگئی۔ میں نے اس بارے میں حضرت ابن عباس رضی اللہ عنہما سے سوال کیا تو انہوں نے فرمایا کہ اپنے آلۂ تناسل اور جہاں تری محسوس ہو اس جگہ کو دھو لو۔ انہوں نے مجھے غسل کا حکم نہ دیا۔ [مصنف ابن ابي شيبه/كتاب الطهارة/حدیث: 855]

حضرت ابراہیم فرماتے ہیں کہ اگر کوئی شخص خواب میں دیکھے کہ اس نے جماع کیا ہے لیکن بیداری کے بعد تری محسوس نہ ہو تو غسل لازم نہیں۔ [مصنف ابن ابي شيبه/كتاب الطهارة/حدیث: 856]

حضرت ابراہیم سے بھی یونہی منقول ہے۔ [مصنف ابن ابي شيبه/كتاب الطهارة/حدیث: 857]

حضرت شعبی سے بھی یونہی منقول ہے۔ [مصنف ابن ابي شيبه/كتاب الطهارة/حدیث: 858]

حضرت ابن عمر رضی اللہ عنہما سے اس شخص کے بارے میں سوال کیا گیا جو نیند سے بیدار ہو کر تری دیکھے تو فرمایا کہ اگر یہ واقعہ میرے ساتھ ہو تو میں غسل کروں گا۔ [مصنف ابن ابي شيبه/كتاب الطهارة/حدیث: 859]

حضرت ابراہیم سے ایسے شخص کے بارے میں سوال کیا گیا جو بیداری کے بعد تری دیکھے تو فرمایا کہ وہ غسل کرے گا۔ [مصنف ابن ابي شيبه/كتاب الطهارة/حدیث: 860]