حضرت ام سلمہ فرماتی ہیں کہ جب ہم عورتوں میں سے کوئی غسل جنابت کرے تو اپنی مینڈیاں بندھی رہنے دے۔ [مصنف ابن ابي شيبه/كتاب الطهارة/حدیث: 871]

حضرت ابن سیرین سے ایسی عورت کے بارے میں سوال کیا گیا جس کا ہاتھ جسم کے بڑے یا موٹا ہونے کی وجہ سے کمر تک نہ پہنچ سکتا ہو تو وہ غسل جنابت یا غسل حیض کیسے کرے؟ فرمایا ہم تو اللہ تعالیٰ کی رحمت سے اس سے بھی بڑی چیز کی امید رکھتے ہیں۔ [مصنف ابن ابي شيبه/كتاب الطهارة/حدیث: 872]

حضرت دینار کہتے ہیں کہ میں نے حضرت حسن سے عرض کیا کہ عجمی باندی ٹھیک طرح سے غسل نہیں کرتی۔ فرمایا اسے حکم دو کہ کپڑے سے اپنی شرمگاہ کو صاف کرے پھر داخل وخارج سے پانی کے ذریعہ دھوئے پھر نماز والا وضو کرے پھر غسل کرے۔ [مصنف ابن ابي شيبه/كتاب الطهارة/حدیث: 873]

حضرت ابو سعید خدری فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا جب رات میں تم میں سے کوئی اپنی بیوی سے جماع کرے اور پھر دوبارہ کرنا چاہے تو دونوں کے درمیان وضو کرلے۔ [مصنف ابن ابي شيبه/كتاب الطهارة/حدیث: 874]

حضرت سلمان بن ربیعہ فرماتے ہیں کہ حضرت عمر نے مجھ سے فرمایا کہ اے سلمان! جب تم اپنی بیوی سے جماع کرو اور دوبارہ کرنا چاہو تو کیا کرو گے؟ میں نے کہا میں کیا کروں؟ فرمایا دونوں کے درمیان وضو کرو۔ [مصنف ابن ابي شيبه/كتاب الطهارة/حدیث: 875]

حضرت نافع فرماتے ہیں کہ ابن عمر رضی اللہ عنہما جب اپنی بیوی سے صحبت کرنے کے بعد دوبارہ صحبت کرنا چاہتے تو اپنا چہرہ اور بازو دھو لیتے۔ [مصنف ابن ابي شيبه/كتاب الطهارة/حدیث: 876]

حضرت ابن عمر رضی اللہ عنہما فرماتے ہیں کہ جب تم دوسری بار جماع کرنا چاہو تو وضو کرلو۔ [مصنف ابن ابي شيبه/كتاب الطهارة/حدیث: 877]

حضرت ہشام فرماتے ہیں کہ حضرت حسن اس بارے میں کوئی حرج نہیں سمجھتے تھے کہ ایک آدمی اپنی بیوی سے جماع کرنے کے بعد بغیر وضو کئے دوسری مرتبہ جماع کرے۔ حضرت ابن سیرین فرماتے ہیں کہ میں اس بارے میں کوئی حرج نہیں سمجھتا۔ فرمایا اس کا حکم اس لئے دیا جاتا ہے کیونکہ یہ اعادہ کے لئے زیادہ مناسب ہے۔ [مصنف ابن ابي شيبه/كتاب الطهارة/حدیث: 878]

حضرت عکرمہ فرماتے ہیں کہ جب جماع کا اعادہ کرنا چاہے تو وضو کرے۔ [مصنف ابن ابي شيبه/كتاب الطهارة/حدیث: 879]

حضرت ابراہیم فرماتے ہیں کہ وہ وضو کرے گا۔ [مصنف ابن ابي شيبه/كتاب الطهارة/حدیث: 880]