حضرت محمودبن ربیع کہتے ہیں کہ میں نے حضرت عبادہ بن صامت کے ساتھ نماز پڑھی۔ انہوں نے نماز میں سورة الفاتحہ کی تلاوت کی۔ نماز کے بعد میں نے عر ض کیا کہ اے ابو الولید! میں نے آپ کو سورة الفاتحہ کی تلاوت کرتے سنا ہے؟ انہوں نے کہا ہاں، اس کے بغیر نماز نہیں ہوتی۔ [مصنف ابن ابي شيبه/كتاب الصلوات/حدیث: 3809]

حضرت ابو مجلز فرماتے ہیں کہ اگر تم امام کے پیچھے قراءت کرو تو اچھی بات ہے اور اگر نہ کرو تو تمہارے لئے امام کی قرائت کافی ہے۔ [مصنف ابن ابي شيبه/كتاب الصلوات/حدیث: 3810]

حضرت ابن عباس رضی اللہ عنہما فرماتے ہیں کہ امام کے پیچھے سورة الفاتحہ کی تلاوت کرو۔ [مصنف ابن ابي شيبه/كتاب الصلوات/حدیث: 3811]

حضرت مالک بن مغول فرماتے ہیں کہ میں نے شعبی کو امام کے پیچھے قراءت کو اچھا قرار دیتے ہوئے سنا۔ [مصنف ابن ابي شيبه/كتاب الصلوات/حدیث: 3812]

حضرت قاسم فرماتے ہیں کہ میں اس بات کو پسند کرتا ہوں کہ ظہر اور عصر میں امام کے پیچھے اپنے آپ کو مشغول رکھوں۔ [مصنف ابن ابي شيبه/كتاب الصلوات/حدیث: 3813]

حضرت ابو السائب کہتے ہیں کہ میں نے حضرت ابوہریرہ سے عرض کیا کہ میں امام کے پیچھے کیا کروں؟ انہوں نے میرا بازو کھینچا اور کہا اے فارسی! اپنے دل میں سورة الفاتحہ کی تلاوت کرو۔ [مصنف ابن ابي شيبه/كتاب الصلوات/حدیث: 3814]

حضرت ابوہریرہ فرماتے ہیں کہ نبی کریم صلی اللہ علیہ وآلہ وسلم نے ایک نماز پڑھائی، ہمارا خیال ہے کہ وہ صبح کی نماز تھی۔ جب آپ نے نماز مکمل کرلی تو آپ نے فرمایا کہ کیا تم میں سے کسی نے قراءت کی ہے؟ ایک آدمی نے کہا کہ میں نے قراءت کی ہے۔ آپ نے فرمایا کہ میں بھی سوچ رہا تھا کہ قرآن میں مجھ سے کون جھگڑ رہا ہے؟! [مصنف ابن ابي شيبه/كتاب الصلوات/حدیث: 3815]

حضرت عمران بن حصین فرماتے ہیں کہ ایک دن نبی کریم صلی اللہ علیہ وآلہ وسلم نے ظہر کی نماز پڑھائی۔ جب آپ نماز سے فارغ ہوئے تو آپ نے فرمایا کہ کیا کسی نے سورة الاعلیٰ کی تلاوت کی ہے۔ ایک آدمی نے کہا کہ میں نے کی ہے۔ آپ نے فرمایا کہ مجھے معلوم ہوگیا تھا کہ کوئی مجھ سے جھگڑ رہا ہے۔ [مصنف ابن ابي شيبه/كتاب الصلوات/حدیث: 3816]

حضرت عبد اللہ فرماتے ہیں کہ ہم رسول اللہ صلی اللہ علیہ وآلہ وسلم کے پیچھے قراءت کرتے تھے تو آپ نے فرمایا کہ تم نے میرے اوپر قرآن کو خلط ملط کردیا ہے۔ [مصنف ابن ابي شيبه/كتاب الصلوات/حدیث: 3817]

حضرت عبد اللہ بن شداد فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا کہ جس کا امام ہو تو امام کی قراءت اس کی قراءت ہے۔ [مصنف ابن ابي شيبه/كتاب الصلوات/حدیث: 3818]