حضرت عکرمہ فرماتے ہیں کہ رسول اللہ صلی اللہ علیہ وآلہ وسلم نے ایک آدمی کو سجدہ کرتے دیکھا اس کی ناک زمین سے نہیں لگ رہی تھی۔ آپ صلی اللہ علیہ وآلہ وسلم نے فرمایا جس آدمی کی ناک وہاں نہ لگے جہاں پیشانی لگ رہی ہے اس کی نماز قبول نہ ہوگی۔ [مصنف ابن ابي شيبه/كتاب الصلوات/حدیث: 2720]

حضرت نافع فرماتے ہیں کہ ابن عمر رضی اللہ عنہما جب سجدہ کرتے تھے تو اپنی ناک کو پیشانی کے ساتھ رکھتے تھے۔ [مصنف ابن ابي شيبه/كتاب الصلوات/حدیث: 2721]

حضرت عبدا لعزیز بن عبید اللہ کہتے ہیں کہ میں نے وہب بن کیسان سے کہا کہ اے ابو نعیم! کیا بات ہے، آپ اپنی پیشانی اور ناک کو زمین پر ٹکاتے کیوں نہیں؟ وہ کہنے لگے کہ میں نے حضرت جابر بن عبد اللہ رضی اللہ عنہ کو فرماتے ہوئے سنا ہے کہ میں نے رسول اللہ صلی اللہ علیہ وآلہ وسلم کو دیکھا ہے کہ آپ نے اپنی پیشانی کے اونچے حصے پر بالوں کے اگنے کی جگہ سجدہ فرمایا۔ [مصنف ابن ابي شيبه/كتاب الصلوات/حدیث: 2722]

حضرت حسن فرماتے ہیں کہ اگر تم چاہو تو اپنی ناک پر سجدہ کرلو اور اگر چاہو تو ایسا نہ کرو۔ [مصنف ابن ابي شيبه/كتاب الصلوات/حدیث: 2723]

حضرت خالد بن ابی بکر فرماتے ہیں کہ میں نے حضرت قاسم اور حضرت سالم کو دیکھا کہ وہ اپنی پیشانیوں پر سجدہ کرتے تھے اور ان کے ناک زمین پر نہ لگتے تھے۔ [مصنف ابن ابي شيبه/كتاب الصلوات/حدیث: 2724]

حضرت عامر اس شخص کے بارے میں جس کی ناک دورانِ سجدہ زمین پر نہ لگے فرماتے ہیں کہ اس کا سجدہ کافی ہے۔ [مصنف ابن ابي شيبه/كتاب الصلوات/حدیث: 2725]

حضرت عامر فرماتے ہیں کہ اس میں کوئی نقصان نہیں۔ [مصنف ابن ابي شيبه/كتاب الصلوات/حدیث: 2726]

حضرت ابوہریرہ فرماتے ہیں کہ نبی کریم صلی اللہ علیہ وآلہ وسلم نے ارشاد فرمایا کہ جب تم میں سے کوئی سجدہ کرے تو ہاتھوں سے پہلے گھٹنوں کو زمین پر رکھے اور اونٹ کے بیٹھنے کی طرح نہ بیٹھے۔ [مصنف ابن ابي شيبه/كتاب الصلوات/حدیث: 2727]

حضرت ابراہیم فرماتے ہیں کہ حضرت عمر ہاتھوں سے پہلے گھٹنوں کو زمین پر رکھا کرتے تھے۔ [مصنف ابن ابي شيبه/كتاب الصلوات/حدیث: 2728]

حضرت اسود فرماتے ہیں کہ حضرت عمر اپنے گھٹنوں کو پہلے رکھا کرتے تھے۔ [مصنف ابن ابي شيبه/كتاب الصلوات/حدیث: 2729]