حضرت علی رضی اللہ عنہ فرماتے ہیں کہ اگر کسی آدمی کا رات کی تلاوت کا کوئی وظیفہ چھوٹ جائے تو دن نکلنے کے بعد اسے پڑھنا ایسا ہی ہے جیسے رات کو پڑھنا۔ [مصنف ابن ابي شيبه/سجود السهو والعمل في الصلاة/حدیث: 4861]

حضرت قاسم کہتے ہیں کہ ہم فجر کی نماز سے پہلے حضرت عائشہ رضی اللہ عنہا کی خدمت میں حاضر ہوا کرتے تھے ایک دن ہم حاضر ہوئے تو وہ نماز پڑھ رہی تھیں۔ انہوں نے فرمایا کہ میں آج رات اپنے وظیفے کی نماز نہ پڑھ سکی تو میں نے اسے چھوڑنا مناسب نہ سمجھا اس لئے اس وقت پڑھ رہی ہوں۔ [مصنف ابن ابي شيبه/سجود السهو والعمل في الصلاة/حدیث: 4862]

حضرت ابو سلمہ فرماتے ہیں کہ اگر کسی آدمی کا رات کو کوئی عمل فوت ہوجائے اور وہ سورج کے زوال سے پہلے اس کی قضا کرلے تو گویا اس نے اپنے عمل کو پالیا۔ [مصنف ابن ابي شيبه/سجود السهو والعمل في الصلاة/حدیث: 4863]

حضرت علی رضی اللہ عنہ اور حضرت ابراہیم فرماتے ہیں کہ امام کو لقمہ دینا کلام ہے۔ [مصنف ابن ابي شيبه/سجود السهو والعمل في الصلاة/حدیث: 4864]

ابراہیم امام کو لقمہ دینے کو ناپسند فرماتے تھے۔ [مصنف ابن ابي شيبه/سجود السهو والعمل في الصلاة/حدیث: 4865]

حضرت ابن مسعود امام کو لقمہ دینے کے بارے میں فرماتے ہیں کہ یہ تو بس ایک کلام ہے جو وہ اس کی طرف ڈالتا ہے۔ [مصنف ابن ابي شيبه/سجود السهو والعمل في الصلاة/حدیث: 4866]

راوی کہتے ہیں کہ ابراہیم نے فرمایا: مجھے اس کی پروا نہیں کہ میں امام کو لقمہ دوں یا (کسی کو) یا کثیر کہہ کر پکاروں۔ [مصنف ابن ابي شيبه/سجود السهو والعمل في الصلاة/حدیث: 4867]

حضرت سلم بن عطیہ کہتے ہیں کہ ایک آدمی نے حضرت شریح کے امام کو دورانِ نماز لقمہ دیا، جب وہ (شریح) نماز سے فارغ ہوئے تو انہوں نے اس سے فرمایا کہ اپنی نماز دوبارہ پڑھو۔ [مصنف ابن ابي شيبه/سجود السهو والعمل في الصلاة/حدیث: 4868]

حضرت حمید بن عبد الرحمن اس بات کو مکروہ خیال فرماتے تھے کہ قاری کو لقمہ دیا جائے۔ [مصنف ابن ابي شيبه/سجود السهو والعمل في الصلاة/حدیث: 4869]

حضرت عامر فرماتے ہیں کہ جس نے امام کو لقمہ دیا اس نے بات کرلی۔ [مصنف ابن ابي شيبه/سجود السهو والعمل في الصلاة/حدیث: 4870]