یزید سے روایت ہے، انہوں نے کہا کہ میں نے عبدالرحمن سے دریافت کیا کہ کیا جمعہ کے دن کے علاوہ بھی کسی اور دن غسل کرنا (مسنون) ہے؟ انہوں نے جواب دیا: ”ہاں، عید الاضحیٰ، عید الفطر اور عرفہ کے دن۔“ [مصنف ابن ابي شيبه/كتاب الجمعة/حدیث: 5111]

ابراہيم تیمی اپنے والد سے روایت کرتے ہیں کہ وہ عیدین اور جمعہ کے دن غسل کرنے کو مستحب سمجھتے تھے۔ [مصنف ابن ابي شيبه/كتاب الجمعة/حدیث: 5112]

سیدنا عبداللہ بن مسعود رضی اللہ عنہ سے روایت ہے کہ انہوں نے فرمایا: ”جمعہ کے دن غسل کرنا سنتِ (نبوی) میں سے ہے۔“ [مصنف ابن ابي شيبه/كتاب الجمعة/حدیث: 5113]

سیدنا عبداللہ بن عمر رضی اللہ عنہما سے روایت ہے کہ رسول اللہ صلی اللہ علیہ وسلم نے جمعہ کے دن خطبہ ارشاد فرمایا، تو آپ صلی اللہ علیہ وسلم نے فرمایا: ”جو شخص جمعہ (کی نماز) کے لیے آئے، اسے چاہیے کہ وہ غسل کرے۔“ [مصنف ابن ابي شيبه/كتاب الجمعة/حدیث: 5114]

جابر بن زید سے روایت ہے، انہوں نے فرمایا: ”بسا اوقات مجھے جمعہ کے دن سردی محسوس ہوتی ہے تو میں غسل نہیں کرتا ہوں۔“ [مصنف ابن ابي شيبه/كتاب الجمعة/حدیث: 5115]

ہشیم رحمہ اللہ سے روایت ہے، انہوں نے کہا کہ ہمیں اسماعیل رحمہ اللہ نے امام شعبی رحمہ اللہ سے خبر دی۔ [مصنف ابن ابي شيبه/كتاب الجمعة/حدیث: 5116]

ابراہیم سے بھی یونہی منقول ہے۔ [مصنف ابن ابي شيبه/كتاب الجمعة/حدیث: 5117]

حضرت عطاء سے منقول ہے کہ ان حضرات نے فرمایا کہ جو جمعہ کے دن وضو کرے تو یہ اچھا ہے اور جو غسل کرے تو غسل افضل ہے۔ [مصنف ابن ابي شيبه/كتاب الجمعة/حدیث: 5118]

ابو وائل رحمہ اللہ سے روایت ہے کہ ان کے پاس جمعہ کے دن غسل کرنے کا تذکرہ کیا گیا تو انہوں نے فرمایا: ”یہ غسل واجب نہیں ہے، کیونکہ کتنے ہی ایسے ضعیف العمر بوڑھے ہیں کہ اگر وہ جمعہ کے دن سخت سردی میں غسل کریں تو (ٹھنڈ کی شدت سے) ان کی موت واقع ہو جائے۔“ [مصنف ابن ابي شيبه/كتاب الجمعة/حدیث: 5119]

امام شعبی رحمہ اللہ سے روایت ہے کہ وہ غسلِ جنابت کے سوا کسی اور غسل کو «غُسْلًا وَاجِبًا» (واجب غسل) نہیں سمجھتے تھے۔ [مصنف ابن ابي شيبه/كتاب الجمعة/حدیث: 5120]