حضرت نافع فرماتے ہیں کہ حضرت ابن عمر رضی اللہ عنہما ہر جمعے اپنے کپڑوں کو خوشبو کی دھونی دیا کرتے تھے۔ [مصنف ابن ابي شيبه/كتاب الجمعة/حدیث: 5661]

حضرت ابو جعفر فرماتے ہیں کہ نبی صلی اللہ علیہ وآلہ وسلم جمعہ کے دن اپنی سرخ چادر اوڑھتے اور عیدین کے دن عمامہ باندھا کرتے تھے۔ [مصنف ابن ابي شيبه/كتاب الجمعة/حدیث: 5662]

حضرت نافع فرماتے ہیں کہ حضرت ابن عمر رضی اللہ عنہما جمعہ کو جنابت کے غسل جیسا غسل کیا کرتے تھے، اپنے سب سے اچھے کپڑے پہنتے پھر نماز کے لئے جاتے تھے۔ [مصنف ابن ابي شيبه/كتاب الجمعة/حدیث: 5663]

حضرت ابن ابی لیلیٰ فرماتے ہیں کہ میں نے رسول اللہ صلی اللہ علیہ وآلہ وسلم کے صحابہ میں سے اصحاب بدر اور اصحاب شجرہ کی صحبت پائی، وہ حضرات جمعہ کے دن اپنے سب سے اچھے کپڑے پہنتے، اگر ان کے پاس خوشبو ہوتی تو اس میں سے لگاتے اور پھر جمعے کے لئے جاتے تھے۔ [مصنف ابن ابي شيبه/كتاب الجمعة/حدیث: 5664]

حضرت جابر بن عبد اللہ رضی اللہ عنہ فرماتے ہیں کہ نبی صلی اللہ علیہ وآلہ وسلم نے جمعہ کے دن لوگوں کو پراگندہ حالت میں دیکھا تو فرمایا کہ اگر اس دن کے لئے یہ دو کپڑے بنالیں تو انہیں کوئی نقصان نہیں ہوگا۔ [مصنف ابن ابي شيبه/كتاب الجمعة/حدیث: 5665]

ایک اور سند سے کچھ اضافے کے ساتھ یہی مضمون منقول ہے، اس میں یہ اضافہ ہے کہ دو کپڑے جن میں وہ (جمعہ کے لئے) جائے۔ [مصنف ابن ابي شيبه/كتاب الجمعة/حدیث: 5666]

حضرت ثابت بنانی فرماتے ہیں کہ میں جمعہ کے دن حضرت انس بن مالک رضی اللہ عنہ کے ساتھ تھا، جب انہوں نے اذان کی آواز سنی تو فرمایا کہ چلو نماز کی طرف سعی کریں۔ [مصنف ابن ابي شيبه/كتاب الجمعة/حدیث: 5667]

حضرت حسن قرآن مجید کی آیت { فَاسْعَوْا إِلَی ذِکْرِ اللہِ } کے بارے میں فرماتے ہیں کہ اس سے مراد دل سے سعی کرنا ہے۔ [مصنف ابن ابي شيبه/كتاب الجمعة/حدیث: 5668]

حضرت عکرمہ فرماتے ہیں کہ سعی سے مراد عمل ہے۔ [مصنف ابن ابي شيبه/كتاب الجمعة/حدیث: 5669]

حضرت مسروق قرآن مجید کی آیت { فَاسْعَوْا إِلَی ذِکْرِ اللہِ } کے بارے میں فرماتے ہیں کہ اس سے مراد وقت ہے۔ [مصنف ابن ابي شيبه/كتاب الجمعة/حدیث: 5670]