حضرت انس رضی اللہ عنہ فرماتے ہیں کہ نبی صلی اللہ علیہ وآلہ وسلم نے ارشاد فرمایا کہ حضرت جبریل میرے پاس ایک سفید آئینہ لے کر آئے جس میں ایک سیاہ نکتہ تھا۔ میں نے کہا یہ کیا ہے؟ انہوں نے بتایا کہ یہ جمعہ ہے اور یہ اس میں ایک ساعت قبولیت ہے۔ [مصنف ابن ابي شيبه/كتاب الجمعة/حدیث: 5631]

حضرت ابوہریرہ سے روایت ہے کہ نبی صلی اللہ علیہ وآلہ وسلم نے ارشاد فرمایا جمعہ کے لئے سب سے پہلے آنے والا ایسے ہے جیسے اللہ کے راستے میں اونٹ ہدیہ کرنے والا، اس کے بعد آنے والا ایسے ہے جیسے گائے قربان کرنے والا، پھر آنے والا ایسے ہے جیسے بکری قربان کرنے والا اور پھر ایسے ہے جیسے پرندہ اللہ کے راستے میں دینے والا۔ [مصنف ابن ابي شيبه/كتاب الجمعة/حدیث: 5632]

حضرت سلمان سے روایت ہے کہ نبی صلی اللہ علیہ وآلہ وسلم نے ارشاد فرمایا کہ جس شخص نے جمعہ کے دن اچھی طرح غسل کیا اور غسل میں خوب صفائی حاصل کرنے کی کوشش کی، پھر تیل لگایا، یا اپنے گھر سے خوشبو لگائی، پھر جمعہ کے لئے اس طرح گیا کہ دو آدمیوں کے درمیان انہیں چیر کر نہ بیٹھا، پھر جتنی نماز اللہ نے اس کے لئے لکھی تھی ادا کی، پھر امام کے خطبے کے دوران خاموش رہا تو اس کے پچھلے جمعہ تک کے تمام گناہ معاف کردیئے جاتے ہیں۔ [مصنف ابن ابي شيبه/كتاب الجمعة/حدیث: 5633]

حضرت ابوہریرہ سے روایت ہے کہ نبی صلی اللہ علیہ وآلہ وسلم نے ارشاد فرمایا کہ فرشتے مسجد کے دروازوں پر کھڑے ہوکر لوگوں کو ان کے درجات کے اعتبار سے لکھتے رہتے ہیں۔ کہ فلاں فلاں اس وقت میں آیا اور فلاں فلاں اس وقت میں آیا۔ فلاں اس وقت آیا جب امام خطبہ دے رہا تھا اور فلاں نے صرف نماز پڑھی اور خطبہ میں شریک نہیں ہوا۔ [مصنف ابن ابي شيبه/كتاب الجمعة/حدیث: 5634]

حضرت ابن عون کہتے ہیں کہ مجھے بتایا گیا کہ ایک مرتبہ جمعہ کے دن شدید بارش ہوئی تو محمد نے جمعہ نہیں پڑھا۔ [مصنف ابن ابي شيبه/كتاب الجمعة/حدیث: 5635]

حضرت کثیر مولی ابن سمرہ فرماتے ہیں کہ میں حضرت عبد الرحمن بن سمرہ کے پاس سے گذرا وہ اپنے دروازے پر بیٹھے تھے۔ انہوں نے کہا کہ تمہارے امیر نے کیا خطبہ دیا؟ میں نے کہا کہ کیا آپ نے جمعہ نہیں پڑھا؟ انہوں نے فرمایا کہ اس کیچڑ نے ہمیں نماز سے روک دیا۔ [مصنف ابن ابي شيبه/كتاب الجمعة/حدیث: 5636]

حضرت عبد اللہ بن حارث فرماتے ہیں کہ حضرت عبد اللہ بن عباس رضی اللہ عنہما نے اپنے منادی کو حکم دیا کہ وہ بارش والے جمعہ کے دن یہ اعلان کردے کہ نماز اپنے ٹھکانوں میں پڑھ لو، نماز اپنے ٹھکانوں میں پڑھ لو۔ [مصنف ابن ابي شيبه/كتاب الجمعة/حدیث: 5637]

حضرت نافع فرماتے ہیں کہ حضرت سعید بن زید کے ایک صاحبزادے عقیق میں اپنی زمین پر رہتے تھے۔ جو مدینہ سے کئی میل کے فاصلے پر تھی ایک دن جمعہ کی صبح کسی نے حضرت ابن عمر رضی اللہ عنہما کے پاس آکر ان کی بیماری کا ذکر کیا۔ حضرت ابن عمر رضی اللہ عنہما ان کے پاس چل پڑے اور جمعہ کی نماز چھوڑ دی۔ [مصنف ابن ابي شيبه/كتاب الجمعة/حدیث: 5638]

حضرت عبد الوہاب کہتے ہیں کہ میں نے یونس سے پوچھا کہ اگر کسی آدمی کی والدہ، والد یا کسی رشتہ دار کی حالت نزع ہو تو کیا وہ جمعہ چھوڑ سکتا ہے؟ انہوں نے فرمایا کہ حسن اس جنازے والے کو بھی جمعہ میں حاضر نہ ہونے کی رخصت دیا کرتے تھے جسے اس (جنازے) کے بارے میں اندیشہ ہو، اسی طرح وہ شخص جسے کوئی خوف ہو اس کے لئے بھی حاضر نہ ہونے کی اجازت ہے۔ [مصنف ابن ابي شيبه/كتاب الجمعة/حدیث: 5639]

حضرت عطاء فرماتے ہیں کہ اگر جمعہ کے دن تمہارے والد کے لئے مدد کی پکار ہو اور امام خطبہ دے رہا ہو تو والد کے پاس چلے جاؤ اور جمعہ کو چھوڑ دو۔ [مصنف ابن ابي شيبه/كتاب الجمعة/حدیث: 5640]