حضرت سعید بن مسیب فرماتے ہیں کہ اس سے مراد امام کی موعظت ہے۔ [مصنف ابن ابي شيبه/كتاب الجمعة/حدیث: 5671]

حضرت محمد بن کعب فرماتے ہیں کہ سعی سے مراد عمل ہے۔ [مصنف ابن ابي شيبه/كتاب الجمعة/حدیث: 5672]

حسن قرآن مجید کی آیت { فَاسْعَوْا إِلَی ذِکْرِ اللہِ } کے بارے میں فرماتے ہیں کہ خدا کی قسم! اس سے مراد پاؤں سے دوڑنا نہیں ہے۔ لوگوں کو اس بات سے منع کیا گیا ہے کہ وہ نماز کے لئے سکینت اور وقار کے بغیر آئیں۔ بلکہ اس سے مراد دلوں، نیتوں اور خشوع کے ساتھ سعی کرنا ہے۔ [مصنف ابن ابي شيبه/كتاب الجمعة/حدیث: 5673]

حضرت ابراہیم فرماتے ہیں کہ حضرت عبد اللہ قرآن مجید میں { فَاسْعَوْا إِلَی ذِکْرِ اللہِ } کے بجائے { فَامْضُوا إلَی ذِکْرِ اللہِ } پڑھا کرتے تھے۔ اور فرماتے تھے کہ اگر میں اسے { فَاسْعَوْا } پڑھوں تو ایسی سعی کروں کہ میری چادر گرجائے۔ [مصنف ابن ابي شيبه/كتاب الجمعة/حدیث: 5674]

حضرت خرشہ فرماتے ہیں کہ حضرت عمر نے قرآن مجید میں { فَاسْعَوْا إِلَی ذِکْرِ اللہِ } کے بجائے { فَامْضُوا إلَی ذِکْرِ اللہِ } پڑھا۔ [مصنف ابن ابي شيبه/كتاب الجمعة/حدیث: 5675]

حضرت ضحاک اللہ تعالیٰ کے فرمان { فَإِذَا قُضِیَتِ الصَّلاَۃُ فَانْتَشِرُوا فِی الأَرْضِ وَابْتَغُوا مِنْ فَضْلِ اللہِ } (جب نماز پوری ہوجائے تو زمین پر پھیل جاؤ اور اللہ کا فضل تلاش کرو) کے بارے میں فرماتے ہیں کہ یہ اللہ کی طرف سے اجازت ہے۔ اگر کوئی آدمی چاہے تو چلا جائے اور اگر کوئی چاہے تو مسجد میں بیٹھا رہے۔ [مصنف ابن ابي شيبه/كتاب الجمعة/حدیث: 5676]

حضرت مجاہد اور حضرت عطاء اللہ تعالیٰ کے فرمان { فَإِذَا قُضِیَتِ الصَّلاَۃُ فَانْتَشِرُوا فِی الأَرْضِ وَابْتَغُوا مِنْ فَضْلِ اللہِ } (جب نماز پوری ہوجائے تو زمین پر پھیل جاؤ اور اللہ کا فضل تلاش کرو) کے بارے میں فرماتے ہیں کہ اگر چاہے تو فضل تلاش کرے اور اگر چاہے تو نہ کرے۔ [مصنف ابن ابي شيبه/كتاب الجمعة/حدیث: 5677]

حضرت مجاہد سے بھی اللہ تعالیٰ کے فرمان { فَإِذَا قُضِیَتِ الصَّلاَۃُ فَانْتَشِرُوا فِی الأَرْضِ } کے بارے میں یہی منقول ہے، حضرت عطاء اور حضرت مجاہد دونوں فرماتے ہیں کہ اگر چاہے تو ایسا کرے اور اگر چاہے تو نہ کرے۔ [مصنف ابن ابي شيبه/كتاب الجمعة/حدیث: 5678]

حضرت براء فرماتے ہیں کہ نبی صلی اللہ علیہ وآلہ وسلم نے عید کے دن لوگوں کو خطبہ دیا اس وقت آپ کے ہاتھ میں عصا یا کمان تھی۔ [مصنف ابن ابي شيبه/كتاب الجمعة/حدیث: 5679]

حضرت طلحہ بن یحییٰ کہتے ہیں کہ میں نے حضرت عمر بن عبد العزیز کو خطبہ دیتے دیکھا اس وقت ان کے ہاتھ میں ایک ڈنڈا تھا۔ [مصنف ابن ابي شيبه/كتاب الجمعة/حدیث: 5680]