حضرت ابن عون فرماتے ہیں کہ حضرت محمد تراویح میں لوگوں کے ساتھ کھڑے ہونے کو ترجیح دیتے تھے۔ [مصنف ابن ابي شيبه/كتاب صلاة التطوع والإمامة/حدیث: 7933]

ابراہیم فرماتے ہیں کہ تہجد گزار لوگ مسجد کے ایک کونے میں نماز پڑھا کرتے تھے، جبکہ امام لوگوں کو تراویح پڑھا رہا ہوتا تھا۔ [مصنف ابن ابي شيبه/كتاب صلاة التطوع والإمامة/حدیث: 7934]

حضرت ایوب کہتے ہیں کہ میں نے حضرت ابن ابی ملیکہ کو دیکھا کہ وہ مقام ابراہیم کے پیچھے لوگوں کو تراویح کی نماز پڑھا رہے تھے جبکہ لوگ پوری مسجد میں کوئی طواف کررہا تھا اور کوئی نماز پڑھ رہا تھا۔ [مصنف ابن ابي شيبه/كتاب صلاة التطوع والإمامة/حدیث: 7935]

حضرت اشعث بن ابی الشعثاء فرماتے ہیں کہ میں رمضان میں حضرت عبد اللہ بن زبیر کے زمانے میں مکہ میں تھا، میں نے دیکھا کہ امام ایک جماعت کو الگ تراویح پڑھا رہا ہوتا تھا اور لوگ مسجد کے گوشوں میں اپنی نماز پڑھ رہے ہوتے تھے۔ [مصنف ابن ابي شيبه/كتاب صلاة التطوع والإمامة/حدیث: 7936]

حضرت عبدا لملک بن عمیر فرماتے ہیں کہ میں نے رمضان میں شبث بن ربعی اور ان کے ساتھ کچھ لوگوں کو اکیلے اکیلے نماز پڑھتے دیکھا، جبکہ باقی لوگ جماعت کی نماز میں تھے۔ میں نے حضرت شبث کو دیکھا کہ وہ اکیلے ایک سترے کی طرف رخ کئے نماز پڑھ رہے تھے۔ [مصنف ابن ابي شيبه/كتاب صلاة التطوع والإمامة/حدیث: 7937]

ابراہیم فرماتے ہیں کہ امام مسجد میں لوگوں کو تراویح پڑھا رہا ہوتا تھا اور تہجد گزار لوگ مسجد کے گوشوں میں اپنی نماز پڑھ رہے ہوتے تھے۔ [مصنف ابن ابي شيبه/كتاب صلاة التطوع والإمامة/حدیث: 7938]

حضرت یونس بن جبیر اور حسن سے اس شخص کے بارے میں منقول ہے جو دو ترویحوں کے درمیان کھڑا ہو کر قراءت کرتا رہے یہاں تک کہ امام کھڑا ہو تو اس کے ساتھ شریک ہوجائے۔ حضرت شعبہ فرماتے ہیں کہ ان دونوں حضرات میں سے ایک نے اسے مکروہ قرار دیا اور دوسرے نے مکروہ نہیں سمجھا۔ [مصنف ابن ابي شيبه/كتاب صلاة التطوع والإمامة/حدیث: 7939]

حضرت ہارون بن ابی مریم فرماتے ہیں کہ حضرت ابن اسود لوگوں کو تراویح کی چالیس رکعات اور وتر پڑھایا کرتے تھے۔ وہ ہر دو ترویحات کے درمیان بارہ رکعتیں پڑھتے تھے اور دو ترویحات کے درمیان 'الصلاۃ' (نماز) کہا کرتے تھے۔ [مصنف ابن ابي شيبه/كتاب صلاة التطوع والإمامة/حدیث: 7940]

حضرت بحیر بن ریسان فرماتے ہیں کہ انہوں نے حضرت عبادہ بن صامت کو دیکھا کہ انہوں نے لوگوں کو امام کے ترویحہ کے دوران نماز پڑھتے دیکھا تو انہیں ڈانٹا۔ انہوں نے ان کے ڈانٹنے کی کوئی پرواہ نہ کی اور اس عمل سے باز بھی نہ آئے، پھر حضرت عبادہ نے ان لوگوں کو مارا۔ اور میں نے خود انہیں اس عمل پر لوگوں کو مارتے دیکھا ہے۔ [مصنف ابن ابي شيبه/كتاب صلاة التطوع والإمامة/حدیث: 7941]

حضرت سعید بن جبیر اس بات کو مکروہ خیال فرماتے تھے کہ دو ترویحات کے درمیان 'الصلاۃ' (نماز) کہا جائے۔ [مصنف ابن ابي شيبه/كتاب صلاة التطوع والإمامة/حدیث: 7942]