حضرت سہل بن سعد ساعدی فرماتے ہیں کہ جنت کا ایک دروازہ ہے جسے ”ریان“ کہا جاتا ہے، اس میں سے روزہ دار داخل ہوں گے۔ جب آخری روزہ دار جنت میں داخل ہوگا تو اسے بند کردیا جائے گا۔ [مصنف ابن ابي شيبه/كتاب الصيام/حدیث: 9141]

ایک اور سند سے حضرت سہل بن سعد ساعدی رضی اللہ عنہ کے واسطے سے نبی کریم صلی اللہ علیہ وآلہ وسلم سے یونہی منقول ہے۔ [مصنف ابن ابي شيبه/كتاب الصيام/حدیث: 9142]

حضرت عیاض بن غطیف فرماتے ہیں کہ ہم حضرت ابو عبیدہ کے پاس حاضر ہوئے انہوں نے فرمایا کہ روزہ ڈھال ہے جب تک آدمی اس کو پھاڑ نہ ڈالے۔ [مصنف ابن ابي شيبه/كتاب الصيام/حدیث: 9143]

حضرت عیاض بن غطیف فرماتے ہیں کہ ہم حضرت ابو عبیدہ کے پاس ان کے مرض میں حاضر ہوئے انہوں نے فرمایا کہ میں نے رسول اللہ صلی اللہ علیہ وآلہ وسلم کو فرماتے ہوئے سنا ہے کہ روزہ ڈھال ہے جب تک آدمی اس کو پھاڑ نہ ڈالے۔ [مصنف ابن ابي شيبه/كتاب الصيام/حدیث: 9144]

حضرت عبد اللہ بن رباح فرماتے ہیں کہ ہم ایک وفد کی صورت میں حضرت معاویہ کی طرف روانہ ہوئے۔ راستے میں ایک راہب سے ہماری ملاقات ہوئی۔ ہم اس کے پاس تھے کہ کھانا لایا گیا۔ لوگوں نے کھانا کھایا لیکن میں نے کھانا نہیں کھایا۔ اس راہب نے مجھ سے پوچھا کہ تم کھانا کیوں نہیں کھاتے؟ میں نے کہا کہ میرا روزہ ہے۔ اس نے کہا کہ کیا میں تمہیں تمہارے روزے پر خوشخبری نہ سناؤں؟ ایک وقت دستر خوان بچھائے جائیں گے اور ان سے سب سے پہلے کھانے والے روزہ دار ہوں گے۔ [مصنف ابن ابي شيبه/كتاب الصيام/حدیث: 9145]

حضرت ابو موسیٰ فرماتے ہیں کہ ایک مرتبہ ہم سمندر میں سفر کررہے تھے، ہم نے اپنے بادبان بلند کر رکھے تھے۔ ہمیں کوئی جزیرہ دکھائی نہ دے رہا تھا اور نہ کوئی دوسری چیز ہمیں نظر آرہی تھی۔ اتنے میں ہمیں آواز آئی اے کشتی والو! ٹھہر جاؤ میں تمہیں ایک بات بتاتا ہوں۔ ہم کھڑے ہو کر دیکھنے لگے لیکن ہم کو کچھ نظر نہ آیا۔ اس پکارنے والے نے سات مرتبہ آواز دی۔ ساتویں مرتبہ میں کھڑا ہوا اور میں نے کہا کہ تو جو کوئی بھی ہے ہمیں وہ بات بتادے جو بتانا چاہتا ہے، تو ہماری حالت کو دیکھ رہا ہے اور جانتا ہے کہ ہم تیرے پاس کھڑے نہں ہوسکتے۔ اس نے کہا میں تمہیں اللہ تعالیٰ کے ایک فیصلے سے آگاہ کرنا چاہتا ہوں جو اس نے اپنے اوپر لازم کیا ہے! وہ یہ ہے کہ جو بندہ اللہ کے لئے خود کو ایک گرم دن میں پیاسا رکھے گا اللہ تعالیٰ قیامت کے دن اسے سیراب فرمائیں گے۔ ابو اسامہ کی روایت میں یہ اضافہ ہے کہ اس کے بعد جب بھی کوئی لمبا دن ہوتا تو تم جب چاہتے حضرت ابو موسیٰ کو روزے کی حالت میں ہی دیکھتے۔ [مصنف ابن ابي شيبه/كتاب الصيام/حدیث: 9146]

حضرت ابوہریرہ سے روایت ہے کہ رسول اللہ صلی اللہ علیہ وآلہ وسلم نے ارشاد فرمایا کہ روزہ دار کی دعا رد نہیں ہوتی۔ [مصنف ابن ابي شيبه/كتاب الصيام/حدیث: 9147]

حضرت ابوہریرہ سے روایت ہے کہ رسول اللہ صلی اللہ علیہ وآلہ وسلم نے ارشاد فرمایا کہ جنت میں ہر عمل کے لئے ایک مخصوص دروازہ ہے، اس عمل والوں کو اس دروازے سے پکارا جائے گا۔ روزہ داروں کے دروازے کا نام ”ریان“ ہے۔ [مصنف ابن ابي شيبه/كتاب الصيام/حدیث: 9148]

حضرت انس رضی اللہ عنہ فرماتے ہیں کہ حضرت ابو طلحہ رسول اللہ صلی اللہ علیہ وآلہ وسلم کے زمانے میں کثرت سے روزے رکھا کرتے تھے اور حضور صلی اللہ علیہ وآلہ وسلم کے وصال کے بعد بدوں کسی بیماری کے روزہ نہیں چھوڑتے تھے۔ [مصنف ابن ابي شيبه/كتاب الصيام/حدیث: 9149]

حضرت نافع فرماتے ہیں کہ حضرت ابن عمر رضی اللہ عنہما حضر میں صرف بیماری کی حالت میں روزہ چھوڑا کرتے تھے۔ [مصنف ابن ابي شيبه/كتاب الصيام/حدیث: 9150]