حضرت سعد بن ابراہیم فرماتے ہیں کہ حضرت ابن عمر رضی اللہ عنہما، حضرت عائشہ رضی اللہ عنہا اور حضرت سعید بن مسیب کثرت سے روزے رکھا کرتے تھے۔ [مصنف ابن ابي شيبه/كتاب الصيام/حدیث: 9151]

حضرت نافع فرماتے ہیں کہ حضرت ابن عمر رضی اللہ عنہما نے بیان کیا کہ حضرت عمر رضی اللہ عنہ نے اپنی وفات سے پہلے دو سال تک مسلسل روزے رکھے ہیں۔ [مصنف ابن ابي شيبه/كتاب الصيام/حدیث: 9152]

حضرت ابوہریرہ سے روایت ہے کہ رسول اللہ صلی اللہ علیہ وآلہ وسلم نے ارشاد فرمایا کہ ہرچیز کی ایک پاکیزگی ہوا کرتی ہے اور جسم کی پاکیزگی روزہ میں ہے۔ [مصنف ابن ابي شيبه/كتاب الصيام/حدیث: 9153]

حضرت شقیق فرماتے ہیں کہ حضرت عبد اللہ سے سوال کیا گیا کہ آپ کم روزے کیوں رکھتے ہیں؟ انہوں نے فرمایا کہ اس لئے کہ مجھے ڈر ہے کہ روزہ مجھے تلاوت سے روک لے گا اور تلاوت کرنا مجھے روزہ رکھنے سے زیادہ پسند ہے۔ [مصنف ابن ابي شيبه/كتاب الصيام/حدیث: 9154]

حضرت مہاجر فرماتے ہیں کہ اسلاف کا خیال یہ تھا کہ روزہ اجر کے اعتبار سے سب سے کم درجے کے اعمال میں سے ہے۔ [مصنف ابن ابي شيبه/كتاب الصيام/حدیث: 9155]

حضرت میمون کہتے ہیں کہ ایک آدمی نے حضرت ابوذر سے کہا کہ میں نے آپ کو روزہ کا ذکر کرتے ہوئے نہیں سنا اس کی کیا وجہ ہے؟ انہوں نے فرمایا کہ روزہ یقینا ثواب کی چیز ہے لیکن یہاں نہیں۔ یعنی بعض مقامات پر روزہ کے مقابلے میں دوسرے اعمال کا ثواب زیادہ ہوتا ہے جیسے جہاد وغیرہ۔ اسی طرح سفر میں روزہ نہ رکھنا بھی بعض اوقات افضل ہوجاتا ہے۔ [مصنف ابن ابي شيبه/كتاب الصيام/حدیث: 9156]

حضرت حکم فرماتے ہیں کہ اسلاف کے کم کئے جانے والے اعمال میں سے ایک روزہ تھا۔ [مصنف ابن ابي شيبه/كتاب الصيام/حدیث: 9157]

حضرت انس سے روایت ہے کہ رسول اللہ صلی اللہ علیہ وآلہ وسلم نے ارشاد فرمایا کہ سحری کھاؤ کیونکہ سحری میں برکت ہے۔ [مصنف ابن ابي شيبه/كتاب الصيام/حدیث: 9158]

حضرت ابوہریرہ سے روایت ہے کہ رسول اللہ صلی اللہ علیہ وآلہ وسلم نے ارشاد فرمایا کہ سحری کھاؤ کیونکہ سحری میں برکت ہے۔ [مصنف ابن ابي شيبه/كتاب الصيام/حدیث: 9159]

حضرت عمر و بن عاص سے روایت ہے کہ رسول اللہ صلی اللہ علیہ وآلہ وسلم نے ارشاد فرمایا کہ تمہارے اور اہل کتاب کے روزوں میں فرق سحری کھانے کا ہے۔ [مصنف ابن ابي شيبه/كتاب الصيام/حدیث: 9160]