حضرت سعید بن جبیر فرماتے ہیں کہ معتکف جمعہ کی نماز کے لئے حاضر ہوگا، مریض کی عیادت کرے گا، جنازہ میں شریک ہوگا، ضرورت کے لئے جائے گا، امام کے بلانے پر جائے گا۔ یہ بات انہوں نے اس لئے فرمائی کہ حضرت عمرو بن حریث نے انہیں بلا بھیجا تھا جبکہ وہ اعتکاف میں تھے، تو وہ نہیں گئے، پھر انہوں نے دوبارہ بلا بھیجا تو وہ ان کے پاس آگئے تھے۔ [مصنف ابن ابي شيبه/كتاب الصيام/حدیث: 9891]

ابراہیم فرماتے ہیں کہ اسلاف معتکف کے لئے یہ پسند فرماتے تھے کہ وہ ان باتوں کی شرط لگا لے، اور اگر شرط نہ بھی لگائے تب بھی اسے ان کی اجازت ہے: مریض کی عیادت کرنا، جنازہ کے پیچھے جانا، جمعہ کی نماز ادا کرنا۔ [مصنف ابن ابي شيبه/كتاب الصيام/حدیث: 9892]

حضرت شعبی فرماتے ہیں کہ معتکف رفعِ حاجت کے لئے باہر جاسکتا ہے، مریض کی عیادت کرسکتا ہے، جمعہ کی نماز کے لئے جاسکتا ہے لیکن وہ دروازے میں کھڑا ہوگا۔ [مصنف ابن ابي شيبه/كتاب الصيام/حدیث: 9893]

حضرت حسن فرماتے ہیں کہ معتکف جمعہ کے لئے جاسکتا ہے۔ [مصنف ابن ابي شيبه/كتاب الصيام/حدیث: 9894]

حضرت ابو سلمہ فرماتے ہیں کہ معتکف مریض کی عیادت کرے گا، جمعہ کی نماز ادا کرے گا اور راستے میں کسی آدمی کے ساتھ کھڑے ہوکربات چیت کرسکتا ہے۔ [مصنف ابن ابي شيبه/كتاب الصيام/حدیث: 9895]

حضرت حسن فرماتے ہیں کہ معتکف رفعِ حاجت کے لئے باہر جاسکتا ہے، جنازے کے پیچھے جاسکتا ہے اور مریض کی عیادت کرسکتا ہے۔ [مصنف ابن ابي شيبه/كتاب الصيام/حدیث: 9896]

حضرت سعید بن جبیر فرماتے ہیں کہ معتکف جمعہ کی نماز میں حاضر ہوگا، مریض کی عیادت کرے گا، جنازہ پڑھے گا اور امام کے بلانے پر جائے گا۔ [مصنف ابن ابي شيبه/كتاب الصيام/حدیث: 9897]

حضرت عائشہ رضی اللہ عنہا فرماتی ہیں کہ رسول اللہ صلی اللہ علیہ وآلہ وسلم جب اعتکاف میں بیٹھتے تو صرف کسی ضرورت کے لئے ہی گھر آیا کرتے تھے۔ [مصنف ابن ابي شيبه/كتاب الصيام/حدیث: 9898]

حضرت عمرہ فرماتی ہیں کہ حضرت عائشہ رضی اللہ عنہا حالت اعتکاف میں اپنے متعلقین میں سے کسی مریض کے پاس سے گذرتیں تو اس کی طرف متوجہ نہ ہوتی تھیں۔ [مصنف ابن ابي شيبه/كتاب الصيام/حدیث: 9899]

حضرت سعید بن مسیب اور حضرت عطاء فرماتے ہیں کہ معتکف نہ جنازے میں شریک ہوگا اور نہ مریض کی عیادت کرے گا۔ [مصنف ابن ابي شيبه/كتاب الصيام/حدیث: 9900]