حضرت سعید بن جبیر نے اپنی قوم کی مسجد میں اعتکاف کیا۔ [مصنف ابن ابي شيبه/كتاب الصيام/حدیث: 9921]

حضرت ہمام بن حارث نے اپنی قوم کی مسجد میں اعتکاف کیا۔ [مصنف ابن ابي شيبه/كتاب الصيام/حدیث: 9922]

حضرت ابراہیم فرماتے ہیں کہ قبیلوں کی مسجدوں میں اعتکاف کرنے میں کوئی حرج نہیں۔ [مصنف ابن ابي شيبه/كتاب الصيام/حدیث: 9923]

حضرت ابو سلمہ اس بات میں کوئی حرج نہ سمجھتے تھے کہ اس مسجد میں اعتکاف کیا جائے جس میں نماز پڑھی جاتی ہے۔ [مصنف ابن ابي شيبه/كتاب الصيام/حدیث: 9924]

حضرت ابو احوص نے اپنی قوم کی مسجد میں اعتکاف کیا۔ [مصنف ابن ابي شيبه/كتاب الصيام/حدیث: 9925]

حضرت عامر فرماتے ہیں کہ اگر چاہے تو اپنے گھر کی مسجد میں اعتکاف کرلے۔ [مصنف ابن ابي شيبه/كتاب الصيام/حدیث: 9926]

حضرت ابراہیم فرماتے ہیں کہ حضرت حذیفہ رضی اللہ عنہایک مرتبہ حضرت عبد اللہ کے پاس آئے اور ان سے فرمایا کہ کیا آپ کو ان لوگوں پر تعجب نہیں ہوتا جو آپ کے اور اشعری کے گھر کے بیچ یعنی مسجد میں اعتکاف میں بیٹھے ہوئے ہیں۔ حضرت عبداللہ نے فرمایا کہ شاید وہ ٹھیک ہیں اور آپ غلطی پر ہیں۔ حضرت حذیفہ رضی اللہ عنہ نے فرمایا کہ کیا آپ نہیں جانتے کہ اعتکاف صرف تین مسجدوں میں ہوتا ہے۔ ایک مسجد حرام، دوسری مسجد اقصیٰ اور تیسری مسجد نبوی (صلی اللہ علیہ وآلہ وسلم)، میرے خیال میں اس مسجد میں جس میں وہ لوگ اعتکاف میں بیٹھے ہیں، اعتکاف کرنا اور بازار میں اعتکاف کرنا برابر ہے۔ [مصنف ابن ابي شيبه/كتاب الصيام/حدیث: 9927]

حضرت علی رضی اللہ عنہ فرماتے ہیں کہ اعتکاف صرف مصر جامع میں ہوتا ہے۔ [مصنف ابن ابي شيبه/كتاب الصيام/حدیث: 9928]

حضرت علی رضی اللہ عنہ فرماتے ہیں کہ اعتکاف صرف مصر جامع میں ہوتا ہے۔ [مصنف ابن ابي شيبه/كتاب الصيام/حدیث: 9929]

حضرت شداد بن ازمع فرماتے ہیں کہ ایک آدمی مسجدِ اعظم میں اعتکاف کے لئے بیٹھا اور اس نے خیمہ لگایا۔ لوگوں نے اسے کنکریاں ماریں۔ یہ خبر حضرت عبد اللہ بن مسعود رضی اللہ عنہ کو پہنچی تو آپ نے ایک آدمی بھیج کر لوگوں کو اس سے دور کیا اور اس کے اس عمل کو اچھا قرار دیا۔ [مصنف ابن ابي شيبه/كتاب الصيام/حدیث: 9930]