حضرت عبد الرحمن بن مسعود فرماتے ہیں کہ حضرت سھل بن ابو حثمہ ہماری مجلس میں تشریف لائے اور نبی کریم صلی اللہ علیہ وآلہ وسلم کی حدیث ہمیں سنائی کہ آپ صلی اللہ علیہ وآلہ وسلم نے فرمایا: جب تم تخمینہ لگاؤ تو لے لو اور ایک تہائی چھوڑ دو، اگر تم تہائی نہ پاؤ تو چوتھائی چھوڑ دو۔ [مصنف ابن ابي شيبه/كتاب الزكاة/حدیث: 10864]

حضرت بشیر بن یسار فرماتے ہیں کہ حضرت عمر فاروق نے حضرت ابو خیثمہ کو کھجوروں کا تخمینہ لگانے کے لئے بھیجا تو ان سے فرمایا کہ جب تم گھر والوں کے پاس ان کی چاردیواری میں آؤ تو جتنی مقدار وہ کھاتے ہیں اس کا تخمینہ نہ لگاؤ۔ [مصنف ابن ابي شيبه/كتاب الزكاة/حدیث: 10865]

حضرت جابر فرماتے ہیں کہ حضرت عبد اللہ بن رواحہ نے خیبر کی کھجوروں کا تخمینہ لگایا تو وہ چالیس ہزار وسق تھے۔ حضرت جابر کا خیال تھا کہ حضرت ابن رواحہ نے جب یہودیوں کو اختیار دیا تو انہوں نے کھجور لی اور ان پر ٢٠ ہزار وسق لازم تھے۔ [مصنف ابن ابي شيبه/كتاب الزكاة/حدیث: 10866]

حضرت مکحول سے مروی ہے کہ نبی کریم صلی اللہ علیہ وآلہ وسلم نے ارشاد فرمایا: لوگوں پر تخمینہ لگانے میں تخفیف کا معاملہ کرو۔ بیشک مال میں عریہ اور وصیت (کا حصہ) ہوتا ہے۔ انہوں نے فرمایا کہ عریہ وہ کھجور کا درخت ہے جو کسی آدمی کو دوسرے آدمی کے باغ میں وراثت میں ملے، اور وصیت یہ ہے کہ آدمی مساکین کیلئے کوئی وصیت کر جائے۔ [مصنف ابن ابي شيبه/كتاب الزكاة/حدیث: 10867]

حضرت سعید بن مسیب سے مروی ہے کہ نبی کریم صلی اللہ علیہ وآلہ وسلم نے حضرت عتاب بن اسید کو حکم فرمایا کہ وہ تخمینہ لگائیں انگوروں کا جیسا کہ کھجوروں کا لگایا جاتا ہے۔ پھر کشمش سے اس کی زکوٰۃ ادا کی جائے۔ جیسے کہ کھجور کی زکوٰۃ خشک کھجور سے ادا کی جاتی ہے۔ کھجور اور انگور میں نبی کریم صلی اللہ علیہ وآلہ وسلم کا یہی طریقہ ہے۔ [مصنف ابن ابي شيبه/كتاب الزكاة/حدیث: 10868]

حضرت ابن جریج فرماتے ہیں کہ مجھ سے حضرت عبد الکریم اور حضرت عمرو بن دینار نے فرمایا کہ کھجوروں اور انگوروں کا تخمینہ لگایا جائے گا لیکن دانوں کا تخمینہ نہیں لگایا جائے گا۔ [مصنف ابن ابي شيبه/كتاب الزكاة/حدیث: 10869]

حضرت ابن جریج فرماتے ہیں کہ میں نے حضرت عطاء سے پوچھا کہ کھجوروں کا تخمینہ کب لگایا جائے گا؟ آپ نے فرمایا جب وہ کھانے کے قابل ہوجائیں اور کھائی جانے لگیں۔ [مصنف ابن ابي شيبه/كتاب الزكاة/حدیث: 10870]

حضرت عبد اللہ بن فلاں سے مروی ہے کہ نبی کریم صلی اللہ علیہ وآلہ وسلم نے خیبر میں تخمینہ لگانے والے کو حکم فرمایا جب ان کی کھجوریں پک کر اچھی ہو جائیں اس وقت تخمینہ لگاؤ۔ [مصنف ابن ابي شيبه/كتاب الزكاة/حدیث: 10871]

حضرت ابن شہاب فرماتے ہیں کہ نبی کریم صلی اللہ علیہ وآلہ وسلم نے حکم فرمایا کہ خیبر والوں کیلئے تخمینہ لگایا جائے جب ان کی پہلی کھجوریں پک جائیں۔ [مصنف ابن ابي شيبه/كتاب الزكاة/حدیث: 10872]

حضرت ابن جریج فرماتے ہیں کہ میں نے حضرت عطاء سے پوچھا کہ آدمی کی کھیتی ہے لیکن اس کے مال سے زیادہ اس پر قرض ہے۔ پھر اس کی کھیتی کاٹی گئی کیا جس دن کھیتی کاٹی گئی اس کا حق ادا کرے گا؟ آپ نے فرمایا: جس پر اس کے مال سے زیادہ قرض ہو ہم نہیں سمجھتے کہ اس کے مویشوں پر اور مستقل سرمایہ پر زکوٰۃ ہے۔ مگر جس دن اس کی کھیتی کاٹی گئی ہے اس دن جو اس پر حق ہے وہ ادا کرے گا۔ [مصنف ابن ابي شيبه/كتاب الزكاة/حدیث: 10873]