حضرت مجاہد فرماتے ہیں کہ قرآن پاک کی آیت { فِی أَمْوَالِہِمْ حَقٌّ مَعْلُومٌ} یہ زکوٰۃ کے علاوہ حقوق ہیں۔ [مصنف ابن ابي شيبه/كتاب الزكاة/حدیث: 10824]

حضرت عامر فرماتے ہیں کہ مال پر زکوٰۃ کے علاوہ بھی کچھ حقوق ہیں۔ [مصنف ابن ابي شيبه/كتاب الزكاة/حدیث: 10825]

حضرت قزعہ فرماتے ہیں کہ میں نے حضرت عبد اللہ بن عمر رضی اللہ عنہما سے دریافت فرمایا کہ میرے پاس کچھ مال ہے آپ مجھے کیا حکم فرماتے ہیں کہ میں زکوٰۃ کس کو ادا کروں؟ آپ نے فرمایا قوم کے امراء (امیر) کو۔ لیکن اے قزعہ تیرے مال پر زکوٰۃ کے علاوہ بھی حقوق ہیں۔ [مصنف ابن ابي شيبه/كتاب الزكاة/حدیث: 10826]

حضرت مزاحم بن زفر فرماتے ہیں کہ میں حصرت عطاء کے پاس بیٹھا ہوا تھا کہ ایک اعرابی آیا اور دریافت کیا کہ میرے پاس اونٹ ہیں کیا مجھ پر زکوٰۃ کے علاوہ بھی کچھ حق ہیں؟ آپ نے فرمایا: جی ہاں۔ [مصنف ابن ابي شيبه/كتاب الزكاة/حدیث: 10827]

حضرت ابن عباس رضی اللہ عنہما فرماتے ہیں کہ جس شخص نے مال پر زکوٰۃ ادا کردی ہے وہ صدقہ نہ بھی کرے تو کوئی حرج (گناہ) نہیں ہے۔ [مصنف ابن ابي شيبه/كتاب الزكاة/حدیث: 10828]

حضرت حسن فرماتے ہیں کہ مال میں زکوٰۃ کے علاوہ بھی کچھ حقوق ہیں۔ [مصنف ابن ابي شيبه/كتاب الزكاة/حدیث: 10829]

ابراہیم سے مروی ہے کہ حضرت عبد اللہ کی اہلیہ نبی کریم صلی اللہ علیہ وآلہ وسلم کی خدمت میں آئیں اور عرض کی کہ میری پرورش میں میرے بھائی کے (یتیم و بے سہارا) بیٹے ہیں، کیا میرے لیے کافی ہوگا کہ میں اپنے زیورات کی زکوٰۃ ان کو دے دوں؟ آپ صلی اللہ علیہ وآلہ وسلم نے فرمایا: ہاں۔ [مصنف ابن ابي شيبه/كتاب الزكاة/حدیث: 10830]

حضرت عبد اللہ بن عباس رضی اللہ عنہما فرماتے ہیں کہ وہ قرابت دار جو تمہارے عیال نہیں ہیں ان کو زکوٰۃ دینے میں کوئی حرج نہیں ہے۔ [مصنف ابن ابي شيبه/كتاب الزكاة/حدیث: 10831]

حضرت سعید بن المسیب فرماتے ہیں کہ جن لوگوں کو میں اپنی زکوٰۃ دیتا ہوں ان میں سب سے زیادہ حق دار میری پرورش میں رہنے والا یتیم اور میرے قرابت دار ہیں۔ [مصنف ابن ابي شيبه/كتاب الزكاة/حدیث: 10832]

حضرت علقمہ سے مروی ہے کہ حضرت عبداللہ کی بیوی نے حضرت عبد اللہ سے دریافت فرمایا کہ میرے بھائی کے یتیم بیٹے میری پرورش میں ہیں، کیا میں ان کو زکوٰۃ دے سکتی ہوں؟ آپ نے فرمایا: جی ہاں۔ [مصنف ابن ابي شيبه/كتاب الزكاة/حدیث: 10833]