حضرت مجاہد فرماتے ہیں تمہارا صدقہ (زکوٰۃ) قبول نہیں ہوگا (جبکہ تم غیروں کو ادا کرو) اور تمہارے ذی رحم محتاج ہوں۔ [مصنف ابن ابي شيبه/كتاب الزكاة/حدیث: 10844]

حضرت حسن سے پوچھا گیا کہ آدمی کسی فقیر کو زکوٰۃ ادا کر دے بعد میں معلوم ہو کہ وہ تو غنی ہے (تو کیا حکم ہے؟) آپ نے فرمایا اس کی طرف سے کافی ہے۔ [مصنف ابن ابي شيبه/كتاب الزكاة/حدیث: 10845]

حضرت ابراہیم سے پوچھا گیا کہ آدمی کسی غنی کو نہ جانتے ہوئے زکوٰۃ ادا کر دے تو؟ آپ نے فرمایا یہ کافی نہیں ہے۔ (دوبارہ ادا کرنا ہوگی)۔ [مصنف ابن ابي شيبه/كتاب الزكاة/حدیث: 10846]

حضرت محمد بن زیاد الالھانی فرماتے ہیں کہ میں نے حضرت ابو امامہ باہلی سے سنا وہ فرماتے ہیں کہ: تلوار کا زیور خزانہ میں سے ہے۔ [مصنف ابن ابي شيبه/كتاب الزكاة/حدیث: 10847]

حضرت عبید اللہ بن عبید فرماتے ہیں کہ میں نے حضرت مکحول سے کہا: اے ابو عبد اللہ! میرے پاس ایک تلوار ہے جس میں ایک سو پچاس درہم (چاندی) لگی ہے۔ کیا اس کی زکوٰۃ ہے؟ آپ نے فرمایا: تیرے پاس جو سو نا چاندی ہے اس کے ساتھ ملا لے اور پھر اس میں زکوٰۃ ہے وہ ادا کر دے۔ [مصنف ابن ابي شيبه/كتاب الزكاة/حدیث: 10848]

حضرت حجاج فرماتے ہیں کہ میں نے حضرت عطاء، حضرت حماد اور حضرت ابراہیم سے دریافت کیا کہ میرے پاس ایک برتن ہے جس پر پانی (سونے یا چاندی کا) چڑھا ہوا ہے اور زیور والی تلوار ہے اور زیور والا پٹکا ہے۔ جب میں سب کو جمع کرتا ہوں تو ان کی قیمت دو سو درہم بن جاتی ہے، کیا میں اس پر زکوٰۃ ادا کروں گا؟ سب حضرات نے فرمایا کہ نہیں۔ [مصنف ابن ابي شيبه/كتاب الزكاة/حدیث: 10849]

حضرت حجاج نے حضرت حماد سے بھی ابراہیم کے حوالے سے چاندی چڑھے ہوئے پیالے، زیور والی تلوار اور زیور والے پٹکے کے بارے میں دریافت کیا کہ جب ان سب کو جمع کیا جائے اور ان میں دو سو درہم بنتے ہوں تو کیا ان پر زکوٰۃ ادا کی جائے گی؟ ان حضرات نے فرمایا کہ نہیں۔ [مصنف ابن ابي شيبه/كتاب الزكاة/حدیث: 10850]

حضرت مالک بن عبد اللہ الکلاعی فرماتے ہیں کہ میں نے حضرت خالد بن معدان کو یہ فرماتے ہوئے سنا کہ تلوار کا زیور (حکم میں) خزانہ میں سے ہے۔ [مصنف ابن ابي شيبه/كتاب الزكاة/حدیث: 10851]

حضرت طاؤس فرماتے ہیں کہ جب آپ پر قرضہ ہو تو آپ زکوٰۃ ادا نہ کرو۔ [مصنف ابن ابي شيبه/كتاب الزكاة/حدیث: 10852]

حضرت عطاء سے پوچھا گیا کہ ایک شخص پر ایک سال یا دو سالوں سے قرض ہے کیا وہ زکوٰۃ ادا کرے گا؟ آپ نے فرمایا کہ نہیں۔ [مصنف ابن ابي شيبه/كتاب الزكاة/حدیث: 10853]