حضرت مورق العجلی فرماتے ہیں کہ جب بھی تم دو کاموں کے درمیان موازنہ کرو گے تو ان میں سے اللہ کے نزدیک بہتر اسی کو پاؤ گے جو ان دونوں میں زیادہ آسان ہو، اس لیے جب جنازہ (کندھوں پر) کھڑا ہو تو میں بیٹھ جاتا ہوں۔ [مصنف ابن ابي شيبه/كتاب الجنائز/حدیث: 11871]

حضرت سعید المقبری اپنے والد سے روایت کرتے ہیں کہ میں نے حضرت ابو ہریرہ رضی اللہ عنہ اور مروان کو جنازے کے آگے چلتے ہوئے دیکھا، پھر وہ دونوں بیٹھ گئے، حضرت ابو سعید الخدری تشریف لائے اور فرمایا: اے امیر کھڑے ہو جاؤ، اس کو (ابوھریرہ کو) معلوم ہے کہ جب نبی اکرم (صلی اللہ علیہ وآلہ وسلم) کسی جنازے کے ساتھ جاتے تو جب تک جنازہ نہ رکھ دیا جاتا آپ صلی اللہ علیہ وآلہ وسلم تشریف نہ رکھتے۔ [مصنف ابن ابي شيبه/كتاب الجنائز/حدیث: 11872]

حضرت امام زہری فرماتے ہیں کہ حضرت مسور بن مخرمہ نماز جنازہ کے بعد واپس نہ لوٹتے جب تک کہ ان سے اجازت نہ لے لیتے۔ [مصنف ابن ابي شيبه/كتاب الجنائز/حدیث: 11873]

حضرت زید بن ثابت فرماتے ہیں جب تم نے نماز جنازہ ادا کرلی تو تم نے اپنا حق ادا کرلیا، اب اس کے اور اس کے اھل کو تنہا (خالی) چھوڑ دو۔ [مصنف ابن ابي شيبه/كتاب الجنائز/حدیث: 11874]

حضرت جابر ارشاد فرماتے ہیں کہ جتنا چاہو جنازے کے ساتھ چلو پھر واپس لوٹ آؤ جب تمہارے لیے ظاہر ہوجائے۔ [مصنف ابن ابي شيبه/كتاب الجنائز/حدیث: 11875]

حضرت ابن عون فرماتے ہیں کہ حضرت محمد اجازت لینے کو ضروری نہ سمجھتے تھے، اور فرماتے تھے کہ وہ ہم پر نگہبان نہیں ہیں۔ [مصنف ابن ابي شيبه/كتاب الجنائز/حدیث: 11876]

حضرت موسیٰ بن نافع فرماتے ہیں کہ میں نے حضرت سعید بن جیر کو دیکھا کہ آپ نے نماز جنازہ پڑھی اور واپس لوٹ گئے۔ [مصنف ابن ابي شيبه/كتاب الجنائز/حدیث: 11877]

حضرت ابن جریج فرماتے ہیں کہ ایک شخص نے حضرت نافع سے دریافت کیا کیا حضرت عبد اللہ بن عمر رضی اللہ عنہما نماز جنازہ سے فارغ ہونے کے بعد اجازت سے قبل ہی واپس لوٹ جایا کرتے تھے؟ آپ نے فرمایا اجازت لینے سے قبل نہیں لوٹا کرتے تھے۔ [مصنف ابن ابي شيبه/كتاب الجنائز/حدیث: 11878]

حضرت ابراہیم فرماتے ہیں کہ دو شخص عہدئہ امارت پر نہ ہونے کے باوجود بھی امیر ہی سمجھے جاتے ہیں ایک جنازے کا مالک جب تم نماز جنازہ ادا کرلو تو اجازت کے بغیر نہ لوٹو، اور حاجن عورت اپنے ساتھیوں کے پاس جب وہ حائضہ ہوجائے۔ [مصنف ابن ابي شيبه/كتاب الجنائز/حدیث: 11879]

حضرت عبد اللہ فرماتے ہیں کہ دو آدمی نہ امیر ہونے کے باوجود بھی امیر ہی سمجھے جاتے ہیں، جنازے والا، اور حائضہ عورت اپنے ساتھیوں میں۔ [مصنف ابن ابي شيبه/كتاب الجنائز/حدیث: 11880]