ابراہیم اور حضرت شعبی فرماتے ہیں کہ (اسلاف) اس بات کو ناپسند کرتے تھے کہ جنازہ لوگوں کے کندھوں سے اترنے سے قبل ہی کوئی شخص بیٹھ جائے۔ [مصنف ابن ابي شيبه/كتاب الجنائز/حدیث: 11861]

حضرت ابو حازم فرماتے ہیں کہ میں حضرت حسن بن علی رضی اللہ عنہ، حضر ت ابو ہریرہ رضی اللہ عنہ اور حضرت ابن زبیر کے ساتھ (جنازے میں) چلا، جب وہ قبر کے پاس پہنچے تو کھڑے ہو کر گفتگو کرنے لگے، یہاں تک کہ جنازہ رکھ دیا گیا، جب جنازہ رکھا گیا تب وہ حضرات بیٹھے۔ [مصنف ابن ابي شيبه/كتاب الجنائز/حدیث: 11862]

حضرت ہشام فرماتے ہیں جب تک جنازہ رکھ نہ دیا جاتا محمد تشریف نہ رکھتے۔ [مصنف ابن ابي شيبه/كتاب الجنائز/حدیث: 11863]

اور فرماتے ہیں کہ حسن (جنازہ رکھنے سے پہلے) بیٹھنے میں کوئی حرج نہ سمجھتے تھے۔ [مصنف ابن ابي شيبه/كتاب الجنائز/حدیث: 11864]

حضرت واقد بن عمرو بن سعد بن معاذ فرماتے ہیں کہ میں ایک جنازے میں تھا، جب تک جنازہ زمین پر نہ رکھ دیا گیا میں نہیں بیٹھا، پھر میں حضرت نافع بن جبیر کے پاس آیا اور ان کے پاس بیٹھ گیا، انہوں نے مجھ سے پوچھا کیا بات ہے کہ جب تک جنازہ نہیں رکھا گیا آپ بیٹھے نہیں؟ میں نے کہا اس حدیث کی وجہ سے جو مجھے حضرت ابو سعید رضی اللہ عنہ سے پہنچی ہے۔ حضرت نافع نے فرمایا: مجھ سے مسعود بن حکم نے بیان کیا کہ حضرت علی رضی اللہ عنہ کرم اللہ وجہہ نے ان سے بیان کیا کہ رسول اللہ صلی اللہ علیہ وآلہ وسلم کھڑے ہوئے پھر بیٹھ گئے۔ [مصنف ابن ابي شيبه/كتاب الجنائز/حدیث: 11865]

حضرت انیس بن ابی یحییٰ اپنے والد سے روایت کرتے ہیں کہ میں نے حضرت عبد اللہ بن عمر رضی اللہ عنہما اور ایک دوسرے شخص کو دیکھا کہ دونوں جنازہ رکھ دینے سے قبل بیٹھ گئے۔ [مصنف ابن ابي شيبه/كتاب الجنائز/حدیث: 11866]

حضرت محمد بن عمرو فرماتے ہیں کہ حضرت قاسم اور حضرت سالم دونوں حضرات جنازے کے آگے چلتے تھے اور جنازہ رکھ دینے سے پہلے بیٹھ جاتے تھے۔ [مصنف ابن ابي شيبه/كتاب الجنائز/حدیث: 11867]

حضرت سعید فرماتے ہیں کہ میں نے حضرت حسن کو دیکھا کہ وہ جنازہ کو قبر پر رکھ دینے سے قبل ہی بیٹھ گئے۔ [مصنف ابن ابي شيبه/كتاب الجنائز/حدیث: 11868]

حضرت ابو جعفر اور حضرت عامر فرماتے ہیں کہ جنازے کو قبر میں رکھ دینے سے قبل بیٹھنے میں کوئی حرج نہیں ہے۔ [مصنف ابن ابي شيبه/كتاب الجنائز/حدیث: 11869]

حضرت براء فرماتے ہیں کہ ہم رسول اللہ صلی اللہ علیہ وآلہ وسلم کے ساتھ ایک انصاری شخص کے جنازے میں گئے، پھر جب ہم قبر کے پاس پہنچ گئے اور لحد ابھی نہیں بنی تھی، تو نبی کریم صلی اللہ علیہ وآلہ وسلم تشریف فرما ہوئے، اور ہم بھی آپ صلی اللہ علیہ وآلہ وسلم کے اردگرد اس طرح بیٹھ گئے جس طرح ہمارے سروں پر پرندے بیٹھ گئے ہوں۔ [مصنف ابن ابي شيبه/كتاب الجنائز/حدیث: 11870]