حضرت ابن عمر رضی اللہ عنہما مسجد حرام سے باہر نہ نکلتے جب تک آپ حجر اسود کا استلام نہ کرتے، خواہ آپ طواف کر رہے ہوتے یا نہ طواف نہ کر رہے ہوتے۔ [مصنف ابن ابي شيبه/كتاب الحج/حدیث: 14080]

حضرت ابراہیم فرماتے ہیں کہ جب بھی مسجد حرام میں جاؤ خواہ بیت اللہ کا طواف کرو یا نہ کرو جب مسجد سے نکلنے کا ارادہ ہو تو حجر اسود کا استلام کرو، یا اس کی طرف رخ کر کے تکبیر پڑھو اور اللہ پاک سے دعا کرو۔ [مصنف ابن ابي شيبه/كتاب الحج/حدیث: 14081]

حضرت ابن ابو حفصہ فرماتے ہیں کہ میں نے حضرت سعید بن جبیر کے ساتھ بیت اللہ کا طواف کیا، آپ جب بھی حجر اسود کے پاس سے گزرتے تو اس کی طرف صرف متوجہ ہوتے لیکن استلام نہ فرماتے۔ [مصنف ابن ابي شيبه/كتاب الحج/حدیث: 14082]

حضرت ابراہیم بن نافع فرماتے ہیں کہ میں نے حضرت طاؤس کے ساتھ طواف کیا، پس بعض اوقات آپ نے کسی رکن کا بھی استلام نہ فرمایا یہاں تک کہ آپ واپس چلے گئے۔ [مصنف ابن ابي شيبه/كتاب الحج/حدیث: 14083]

حضرت سعد بن ابراہیم اپنے والد ابراہیم کے بارے میں فرماتے ہیں کہ وہ بیت اللہ کا طواف کرتے تھے لیکن استلام نہ فرماتے تھے۔ [مصنف ابن ابي شيبه/كتاب الحج/حدیث: 14084]

حضرت انس سے مروی ہے کہ نبی کریم صلی اللہ علیہ وآلہ وسلم نے ایک شخص کو دیکھا کہ وہ بڑی مشکل سے دو آدمیوں کے سہارے چل رہا ہے، یزید راوی فرماتے ہیں کہ وہ اپنے دو بیٹوں کے سہارے چل رہا تھا، آپ صلی اللہ علیہ وآلہ وسلم نے دریافت فرمایا: یہ کیا ہے؟ صحابہ کرام نے عرض کیا کہ اس شخص نے نذر مانی ہے کہ وہ پیدل بیت اللہ جائے گا، آپ صلی اللہ علیہ وآلہ وسلم نے ارشاد فرمایا: بیشک اللہ تعالیٰ اس شخص کو اس طرح کی تکلیف میں مبتلا کرنے سے بےنیاز ہے جاؤ اس کو کہو کہ سوار ہو کر جائے۔ [مصنف ابن ابي شيبه/كتاب الحج/حدیث: 14085]

حضرت انس رضی اللہ عنہ فرماتے ہیں کہ رسول اللہ صلی اللہ علیہ وآلہ وسلم نے ایک شخص کو دیکھا کہ وہ دو آدمیوں کے سہارے چل رہا ہے، یزید راوی فرماتے ہیں کہ اپنے دو بیٹوں کے سہارے، آپ صلی اللہ علیہ وآلہ وسلم نے دریافت فرمایا: یہ کیا ہے؟ لوگوں نے عرض کیا کہ اس نے پیدل چلنے کی نذر مانی ہے، آپ صلی اللہ علیہ وآلہ وسلم نے ارشاد فرمایا: بیشک اللہ عزوجل اس شخص کے اپنے آپ کو تکلیف دینے سے بےنیاز ہے، اس سے کہو کہ سوار ہوجائے۔ [مصنف ابن ابي شيبه/كتاب الحج/حدیث: 14086]

البتہ یزید راوی نے (اس کی سند میں) یوں کہا: حمید سے، وہ ثابت سے، وہ حضرت انس رضی اللہ عنہ سے روایت کرتے ہیں۔ [مصنف ابن ابي شيبه/كتاب الحج/حدیث: 14087]

حضرت عقبہ بن عامر الجھنی سے مروی ہے کہ میری بہن نے نذر مانی کہ وہ پیدل ننگے پاؤں برہنہ سر بیت اللہ جائے گی، میں نے نبی کریم صلی اللہ علیہ وآلہ وسلم سے اس کے متعلق دریافت فرمایا؟ آپ صلی اللہ علیہ وآلہ وسلم نے ارشاد فرمایا: اپنی بہن سے کہو کہ چادر اوڑھ کر سوار ہو کر جائے اور تین روزے رکھے۔ [مصنف ابن ابي شيبه/كتاب الحج/حدیث: 14088]

حضرت علی رضی اللہ عنہارشاد فرماتے ہیں کہ اگر کوئی شخص نذر مانے کہ وہ پیدل بیت اللہ جائے گا، پھر وہ عاجز آجائے اور نہ جاسکے تو اس کو چاہئے کہ ایک اونٹ قربانی کے لیے روانہ کر دے اور خود سوار ہو کر جائے۔ [مصنف ابن ابي شيبه/كتاب الحج/حدیث: 14089]