حضرت ابن عباس رضی اللہ عنہما سے مروی ہے کہ لوگ حج کر کے جس طرح چاہتے تھے چلے جاتے تھے، آپ صلی اللہ علیہ وآلہ وسلم نے ارشاد فرمایا: کوئی شخص بھی واپس نہ جائے جب تک کہ اس کا آخری عمل بیت اللہ کا طواف نہ ہو۔ [مصنف ابن ابي شيبه/كتاب الحج/حدیث: 14110]

حضرت عمر اس شخص کو واپس بھیج دیتے جس کا آخری عمل بیت اللہ کا طواف نہ ہوتا۔ [مصنف ابن ابي شيبه/كتاب الحج/حدیث: 14111]

حضرت عمر ارشاد فرماتے ہیں کہ جب تک کوئی شخص طواف نہ کرلے وہ واپس نہ جائے، بیشک حج کا آخری عمل طواف ہونا چاہئے۔ [مصنف ابن ابي شيبه/كتاب الحج/حدیث: 14112]

حضرت ابن عباس رضی اللہ عنہما فرماتے ہیں کہ لوگوں کو حکم دیا گیا کہ ان کا آخری عمل بیت اللہ کا طواف ہو اور حیض والی عورتوں سے یہ حکم ہلکا کردیا گیا ہے (ان کے لیے اس میں تخفیف کردی گئی ہے)۔ [مصنف ابن ابي شيبه/كتاب الحج/حدیث: 14113]

حضرت طاؤس فرماتے ہیں کہ حاجی حضرات منیٰ سے ہی واپس لوٹ جایا کرتے تھے، ان کو حکم دیا گیا کہ ان کا آخری عمل بیت اللہ کا طواف ہو، لیکن حیض والی عورتوں کے لیے اس میں تخفیف کردی گئی۔ [مصنف ابن ابي شيبه/كتاب الحج/حدیث: 14114]

حضرت جبیر بن مطعم سے مروی ہے کہ نبی کریم صلی اللہ علیہ وآلہ وسلم مروہ پر کھڑے ہوئے، آپ صلی اللہ علیہ وآلہ وسلم کے دست مبارک میں نیزے کا پھل تھا جس سے آپ نے اپنے بال تھوڑے تھوڑے کاٹے اور آپ صلی اللہ علیہ وآلہ وسلم یہ ارشاد فرما رہے تھے: قیامت کے دن تک کے لیے عمرہ حج میں داخل ہوگیا ہے اسلام میں صرورہ (کنوار پن یا غیر حاجی شخص) نہیں ہے اور قربانی کرتے وقت اونٹوں کا خوب خون بہاؤ اور تکبیر اونچی آواز سے کہو۔ [مصنف ابن ابي شيبه/كتاب الحج/حدیث: 14115]

حضرت عطاء فرماتے ہیں صحابہ کرام نے اپنا احرام کھول دیا قصر کروا کر اور انہوں نے حلق نہ کروایا۔ [مصنف ابن ابي شيبه/كتاب الحج/حدیث: 14116]

حضرت ہشام فرماتے ہیں کہ میں نے اپنے والد محترم کے ساتھ حج اور عمرہ کیا میرے بال کندھوں تک تھے میں نے تھوڑے تھوڑے بال کاٹے لیکن آپ نے مجھے حلق کروانے کا حکم نہ دیا۔ [مصنف ابن ابي شيبه/كتاب الحج/حدیث: 14117]

حضرت ابراہیم فرماتے ہیں کہ جب کوئی شخص پہلا حج کرے تو اس کو چاہئے کہ بالوں کو حلق کروائے، پھر اگر وہ دوسری بار حج کرے تو چاہے حلق کروائے یا قصر لیکن حلق کروانا افضل ہے اور اگر کوئی شخص عمرہ کرے لیکن اس نے پہلے حج نہ کیا ہوا ہو تو اگر وہ چاہے تو حلق کروا لے اگر چاہے تو قصر کروا لے اور اگر وہ تمتع کرے تو قصر کروائے پھر حلق کروائے۔ [مصنف ابن ابي شيبه/كتاب الحج/حدیث: 14118]

حضرت عطاء سے دریافت کیا گیا کہ پہلا حج کرنے والا شخص حلق کروائے یا قصر؟ آپ نے فرمایا اس کی مرضی ہے، چاہے تو حلق کروائے چاہے تو قصر کروائے۔ [مصنف ابن ابي شيبه/كتاب الحج/حدیث: 14119]