حضرت حسن محصر کے متعلق فرماتے ہیں کہ وہ ھدی بھیجے گا جب وہ ذبح کردی جائے تو ہ احرام کھول دے گا اور اس پر آئندہ سال حج کی قضا ہے۔ [مصنف ابن ابي شيبه/كتاب الحج/حدیث: 14400]

محمد فرماتے ہیں کہ جب کوئی شخص حج کا احرام باندھ لے پھر اس کو روک دیا جائے تو وہ ھدی بھیجے گا، جب ھدی ذبح کے مقام تک پہنچ جائے تو اگر چاہے تو واپس چلا جائے، اور وہ بعض چیزوں سے حلال ہوجائے گا اور بعض چیزیں اس پر بدستور حرام رہیں گی۔ [مصنف ابن ابي شيبه/كتاب الحج/حدیث: 14401]

حضرت ابن عون فرماتے ہیں کہ میں نے حضرت سالم، حضرت قاسم سے محصر کے متعلق دریافت کیا؟ آپ حضرات نے بھی حضرت محمد کے قول کے مثل ارشاد فرمایا۔ [مصنف ابن ابي شيبه/كتاب الحج/حدیث: 14402]

حضرت عامر فرماتے ہیں کہ جب محصر شخص کی ھدی ذبح کردی جائے تو وہ تمام چیزوں سے حلال ہوجائے گا۔ [مصنف ابن ابي شيبه/كتاب الحج/حدیث: 14403]

حضرت علقمہ اور حضرت اسود فرماتے ہیں کہ بیشک حج کے اتمام میں سے یہ ہے کہ حاجی امام کے ساتھ عرفہ میں دو نمازوں میں شریک ہو۔ [مصنف ابن ابي شيبه/كتاب الحج/حدیث: 14404]

ابراہیم فرماتے ہیں کہ اسلاف اس بات کو پسند کرتے تھے کہ وہ امام کے ساتھ عرفہ میں ظہر اور عصر کی نماز ادا کریں۔ [مصنف ابن ابي شيبه/كتاب الحج/حدیث: 14405]

حضرت اسود نے امام کے ساتھ عرفہ میں ظہر وعصر کی نماز ادا فرمائی۔ [مصنف ابن ابي شيبه/كتاب الحج/حدیث: 14406]

حضرت یزید بن شیبان فرماتے ہیں کہ ہم لوگ عرفہ میں ٹھہرنے والی جگہ سے کچھ دور ٹھہرے، ہمارے پاس حضرت ابن مربع تشریف لائے اور فرمایا کہ میں رسول اکرم (صلی اللہ علیہ وآلہ وسلم) کا قاصد بن کر تمہارے پاس آیا ہوں، آپ صلی اللہ علیہ وآلہ وسلم فرماتے ہیں کہ تم اپنے مشاعر (ٹھہرنے کی جگہوں) پر ٹھہرے رہو، بیشک تم ابراہیم علیہ السلام کی میراث میں سے ایک میراث پر ہو۔ [مصنف ابن ابي شيبه/كتاب الحج/حدیث: 14407]

حضرت ابن المنکدر اور حضرت زید بن اسلم سے مروی ہے کہ نبی کریم صلی اللہ علیہ وآلہ وسلم نے ارشاد فرمایا: عرفہ تمام کا تمام ٹھہرنے کی جگہ ہے، سوائے بطن عرنہ کے اس سے دور رہو۔ [مصنف ابن ابي شيبه/كتاب الحج/حدیث: 14408]

حضرت جابر سے مروی ہے کہ نبی کریم صلی اللہ علیہ وآلہ وسلم نے ارشاد فرمایا: عرفہ تمام کا تمام موقف (ٹھہرنے کی جگہ) ہے۔ [مصنف ابن ابي شيبه/كتاب الحج/حدیث: 14409]