حضرت عطاء فرماتے ہیں کہ جو مریض کی طرف سے طواف کرے مریض اس کو اجرت دے۔ [مصنف ابن ابي شيبه/كتاب الحج/حدیث: 14370]

حضرت طاؤس سے ایک مریضہ خاتون کے بارے میں دریافت کیا گیا؟ آپ نے فرمایا: اس کی طر ف سے اس کے گھر والوں میں سے کوئی ایک رمی کرے۔ [مصنف ابن ابي شيبه/كتاب الحج/حدیث: 14371]

حضرت جابر فرماتے ہیں کہ ہم نے نبی کریم صلی اللہ علیہ وآلہ وسلم کے ساتھ حج کیا اور ہمارے ساتھ عورتیں اور بچے بھی تھے، پس ہم نے بچوں کی طرف سے تلبیہ کہا اور ان کی طرف سے رمی کی۔ [مصنف ابن ابي شيبه/كتاب الحج/حدیث: 14372]

حضرت ایوب فرماتے ہیں کہ میں نے حضرت عبد الرحمن بن قاسم کے بچے کو دیکھا تو میں نے عرض کیا تم اس کے ساتھ کیا کرتے ہو؟ لوگوں نے کہا کہ ہم اس کی ہتھیلی پر کنکریاں رکھ دیتے ہیں، اگر یہ عاجز آجائے تو اس کی طرف سے رمی کردی جاتی ہے۔ [مصنف ابن ابي شيبه/كتاب الحج/حدیث: 14373]

حضرت ابن عمر رضی اللہ عنہما نے بچوں کے ساتھ حج کیا، پھر ان میں سے جو طاقت رکھتا رمی کرنے کی وہ خود رمی کرتا اور جو رمی کرنے کی طاقت نہ رکھتا اس کی طرف سے رمی کردی جاتی۔ [مصنف ابن ابي شيبه/كتاب الحج/حدیث: 14374]

حضرت عطاء سے دریافت کیا گیا کہ کیا بچوں کی طرف سے رمی کردی جائے؟ آپ نے فرمایا: ہاں۔ [مصنف ابن ابي شيبه/كتاب الحج/حدیث: 14375]

حضرت عطاء اس بچے کے متعلق فرماتے ہیں کہ جو احرام باندھے، اس کی طرف سے اس کا والد یا ولی تلبیہ پڑھیں۔ [مصنف ابن ابي شيبه/كتاب الحج/حدیث: 14376]

حضرت ابن عباس رضی اللہ عنہما سے مروی ہے کہ نبی کریم صلی اللہ علیہ وآلہ وسلم نے ھدی کے داہنی کوہان پر اشعار کیا اور اس سے خون صاف کردیا۔ [مصنف ابن ابي شيبه/كتاب الحج/حدیث: 14377]

حضرت عروہ جب اونٹ کا اشعار کرنے کا ارادہ کرتے تو اس کی دائیں جانب اشعار کرتے۔ [مصنف ابن ابي شيبه/كتاب الحج/حدیث: 14378]

حضرت ابن عمر رضی اللہ عنہما کے پاس اگر ایک اونٹ ہوتا تو اپنے دائیں ہاتھ سے اس کی بائیں جانب اشعار کرتے اور اگر دو اونٹ ہوتے تو ایک اونٹ کے دائیں جانب اور دوسرے کے بائیں جانب کرتے۔ [مصنف ابن ابي شيبه/كتاب الحج/حدیث: 14379]