حضرت مجاہد فرماتے ہیں کہ حجر اسود کا استلام دائیں اور بائیں سے نہ کرو بلکہ اس کا استلام سامنے سے کرو۔ [مصنف ابن ابي شيبه/كتاب الحج/حدیث: 14500]

روایت کیا ہے اس شخص نے جس نے حضرت مجاہد کو دیکھا کہ آپ چکر لگاتے رہے، یہاں تک کہ آپ کا چہرہ حجر اسود کے بالکل سامنے آگیا، (پھر آپ نے استلام فرمایا)۔ [مصنف ابن ابي شيبه/كتاب الحج/حدیث: 14501]

حضرت جابر بن عبد اللہ رضی اللہ عنہ سے مروی ہے کہ نبی کریم صلی اللہ علیہ وآلہ وسلم نے بجو کے بدلے میں مینڈھا کو رکھا اگر اس کو محرم قتل کر دے، اور اس کو شکار میں سے شمار فرمایا۔ [مصنف ابن ابي شيبه/كتاب الحج/حدیث: 14502]

ایک شخص نے حالت احرام میں بجو کو قتل کردیا پھر وہ حضرت علی رضی اللہ عنہ کے پاس سوال کرنے کے لیے آیا؟ آپ نے اس پر مینڈھا کو لازم فرمایا۔ [مصنف ابن ابي شيبه/كتاب الحج/حدیث: 14503]

حضرت علی رضی اللہ عنہ فرماتے ہیں کہ بجو اگر محرم پر حملہ آور ہو تو محرم اس کو قتل کر دے (تو اس پر کچھ نہیں) اور اگر بغیر حملہ کیے وہ اس کو قتل کر دے تو اس پر ایک مُسِنّہ (بڑی عمر کی) بکری لازم ہے۔ [مصنف ابن ابي شيبه/كتاب الحج/حدیث: 14504]

حضرت عمر سے بھی اسی طرح مروی ہے۔ [مصنف ابن ابي شيبه/كتاب الحج/حدیث: 14505]

حضرت علی رضی اللہ عنہ فرماتے ہیں کہ بجو اگر حملہ آور نہ ہو اور محرم اس کو قتل کر دے تو اس پر مینڈھا لازم ہے۔ [مصنف ابن ابي شيبه/كتاب الحج/حدیث: 14506]

حضرت عطاء بھی اسی طرح فرماتے ہیں۔ [مصنف ابن ابي شيبه/كتاب الحج/حدیث: 14507]

حضرت ابن عباس رضی اللہ عنہما سے مروان نے سوال کیا؟ آپ نے فرمایا اس پر مینڈھا لازم ہے۔ [مصنف ابن ابي شيبه/كتاب الحج/حدیث: 14508]

ابراہیم فرماتے ہیں کہ جمرات کی رمی میں دم نہیں سوائے جمرہ عقبہ کے کہ اگر اس سے پہلے کوئی ایسا کام کرلیا جس پر اس کو مقدم ہونا چاہیے تھا (تو دم لازم آئے گا)۔ [مصنف ابن ابي شيبه/كتاب الحج/حدیث: 14509]