حضرت عبد الرحمن بن اسود فرماتے ہیں کہ میں نے اپنے والد کو دیکھا وہ عرفہ میں منبر پر حضرت ابن زبیر کے پاس گئے، جب وہ واپس اترے تو حضرت ابن زبیر نے تلبیہ پڑھا، میں نے اپنے والد سے عرض کیا کہ آپ نے ان سے کیا کہا تھا؟ آپ نے فرمایا کہ میں نے ان سے کہا کہ میں نے سنا حضرت عمر یہاں منبر پر تلبیہ پڑھا کرتے تھے۔ [مصنف ابن ابي شيبه/كتاب الحج/حدیث: 14520]

حضرت مسروق سے مروی ہے کہ نبی کریم صلی اللہ علیہ وآلہ وسلم نے یوم النحر میں لوگوں کو خطبہ ارشاد فرمایا۔ [مصنف ابن ابي شيبه/كتاب الحج/حدیث: 14521]

حضرت عمران بن حصین رضی اللہ عنہ فرماتے ہیں کہ میں نے رسول اللہ صلی اللہ علیہ وسلم کے ساتھ حج کیا، آپ صلی اللہ علیہ وسلم نے مدینہ واپس لوٹنے تک صرف دو رکعتیں ہی پڑھیں، اور میں نے حضرت ابوبکر کے ساتھ حج کیا، انہوں نے بھی مدینہ واپس لوٹنے تک صرف دو رکعتیں ہی پڑھیں، اور میں نے حضرت عمر کے ساتھ کئی حج کیے، انہوں نے بھی مدینہ واپس لوٹنے تک صرف دو رکعتیں ہی پڑھیں، اور حضرت عثمان نے اپنی خلافت کے سات سال حج کیا، وہ صرف دو رکعتیں ہی پڑھتے تھے، پھر انہوں نے منیٰ میں چار رکعتیں پڑھیں۔ [مصنف ابن ابي شيبه/كتاب الحج/حدیث: 14522]

حضرت ابن عمر رضی اللہ عنہما سے مروی ہے کہ نبی کریم صلی اللہ علیہ وآلہ وسلم نے منیٰ میں دو رکعتیں ادا فرمائیں، پھر آپ صلی اللہ علیہ وآلہ وسلم کے بعد حضرت صدیق اکبر نے دو رکعتیں ادا کیں، پھر صدیق اکبر کے بعد حضرت عمر نے دو رکعتیں ادا کیں، اور حضرت عثمان نے اپنی خلافت کے شروع کے سالوں میں دو رکعتیں ادا کیں، پھر حضرت عثمان نے چار رکعتیں پڑھنا شروع کردیں، حضرت ابن عمر رضی اللہ عنہما جب امام کے ساتھ ادا کرتے تو چار رکعتیں ادا کرتے اور اگر اکیلے پڑھتے تو دو رکعتیں ادا کرتے۔ [مصنف ابن ابي شيبه/كتاب الحج/حدیث: 14523]

حضرت حارثہ بن وھب فرماتے ہیں کہ میں نے نبی کریم صلی اللہ علیہ وآلہ وسلم کے ساتھ منٰی میں اس زمانے میں دو رکعتیں پڑھیں جب لوگ سب سے زیادہ پرامن اور تعداد میں سب سے زیادہ تھے۔ [مصنف ابن ابي شيبه/كتاب الحج/حدیث: 14524]

حضرت انس ارشاد فرماتے ہیں کہ میں نے منیٰ میں نبی کریم صلی اللہ علیہ وآلہ وسلم کے ساتھ، حضرت ابوبکر صدیق کے ساتھ، حضرت عمر کے ساتھ اور حضرت عثمان کے ساتھ ان کی خلافت کے ابتدائی سالوں میں دو رکعتیں ادا کیں۔ [مصنف ابن ابي شيبه/كتاب الحج/حدیث: 14525]

حضرت ابو جحیفہ فرماتے ہیں کہ میں نے نبی کریم صلی اللہ علیہ وآلہ وسلم کے ساتھ منیٰ میں دو رکعتیں ادا کیں۔ [مصنف ابن ابي شيبه/كتاب الحج/حدیث: 14526]

حضرت عثمان نے منیٰ میں چار رکعتیں ادا کیں، حضرت عبد اللہ ارشاد فرماتے ہیں کہ میں نے نبی کریم صلی اللہ علیہ وآلہ وسلم کے ساتھ منیٰ میں دو رکعتیں ادا کیں، اور حضرات شیخین کے ساتھ بھی دو رکعتیں ادا کیں، پھر تمہارے راستے الگ اور جدا ہوگئے، اور میری خواہش ہے کہ ان چار رکعتوں کے بجائے میرے حصے میں دو مقبول رکعتیں ہوں۔ [مصنف ابن ابي شيبه/كتاب الحج/حدیث: 14527]

حضرت اعمش فرماتے ہیں کہ مجھ سے حضرت معاویہ بن قرہ نے بیان کیا کہ حضرت عبد اللہ اس کے بعد چار رکعتیں ادا فرماتے تھے، آپ سے کہا گیا کہ آپ نے حضرت عثمان پر اعتراض کیا اور پھر خود چار رکعتیں پڑھتے ہیں؟ حضرت عبد اللہ نے فرمایا: اختلاف زیادہ برا ہے۔ [مصنف ابن ابي شيبه/كتاب الحج/حدیث: 14528]

حضرت ابن عمر رضی اللہ عنہما نے منیٰ میں حضرت ابن زبیر کی امامت میں دو رکعتیں ادا کیں، راوی کہتے ہیں کہ میں نے ان کو حجاج کے پیچھے چار پڑھتے ہوئے دیکھا۔ [مصنف ابن ابي شيبه/كتاب الحج/حدیث: 14529]