حضرت نافع سے مروی ہے کہ حضرت ابن عمر رضی اللہ عنہما کی نماز عرفات میں اگر امام کے ساتھ فوت ہوجاتی تو آپ ظہر وعصر کی نماز اپنی قیام گاہ میں جمع کر کے ادا کرتے۔ [مصنف ابن ابي شيبه/كتاب الحج/حدیث: 14590]

ابراہیم فرماتے ہیں کہ اگر تم عرفات میں اپنی قیام گاہ میں نماز ادا کرو تو ہر نماز اپنے وقت پر ادا کرو، اور ہر نماز کے لیے اذان و اقامت بھی کہو۔ [مصنف ابن ابي شيبه/كتاب الحج/حدیث: 14591]

حضرت عطاء فرماتے ہیں کہ اگر تم نماز اپنی قیام گاہ میں ادا کر رہے ہو تو تمہاری مرضی ہے اگر چاہو تو دونوں نمازوں کو جمع کرلو اور اگر چاہو تو ہر نماز کو اپنے وقت پر ادا کرو۔ [مصنف ابن ابي شيبه/كتاب الحج/حدیث: 14592]

حضرت ابن طاؤس فرماتے ہیں کہ میرے والد محترم نے کبھی بھی عرفات میں امام کے ساتھ نماز ادا نہیں فرمائی، اور وہ دونوں نمازوں کو جمع کرتے اور ان کے درمیان نفل پڑھتے، اور وہ مقام جند سے ہی ایسا کرتے یہاں تک کہ وہ مکہ مکرمہ پہنچ جاتے۔ [مصنف ابن ابي شيبه/كتاب الحج/حدیث: 14593]

حضرت ابراہیم فرماتے ہیں کہ ہر نماز اپنے وقت پر ادا کرو۔ [مصنف ابن ابي شيبه/كتاب الحج/حدیث: 14594]

حضرت ابو ایوب سے مروی ہے کہ نبی کریم صلی اللہ علیہ وآلہ وسلم نے مغرب اور عشاء کی نماز مزدلفہ میں جمع کر کے ادا فرمائی۔ [مصنف ابن ابي شيبه/كتاب الحج/حدیث: 14595]

حضرت ابن عمر رضی اللہ عنہما نے مغرب و عشاء کی نماز مزدلفہ میں جمع کر کے ادا فرمائی پھر فرمایا کہ میں نے رسول اللہ صلی اللہ علیہ وآلہ وسلم کو اسی طرح کرتے ہوئے دیکھا۔ [مصنف ابن ابي شيبه/كتاب الحج/حدیث: 14596]

حضرت نعمان بن حمید فرماتے ہیں کہ میں نے حضرت عمر بن خطاب کو مغرب و عشاء کی نماز مزدلفہ میں جمع کر کے ادا کرتے ہوئے دیکھا۔ [مصنف ابن ابي شيبه/كتاب الحج/حدیث: 14597]

حضرت عبد الرحمن بن یزید فرماتے ہیں کہ میں نے حضرت عبد اللہ کے ساتھ مغرب کی نماز مزدلفہ میں اذان و اقامت کے ساتھ پڑھی، پھر رات کا کھانا لایا گیا جو ہم نے تناول کیا، پھر آپ نے ہمیں عشاء کی نماز مستقل اذان و اقامت کے ساتھ پڑھائی۔ [مصنف ابن ابي شيبه/كتاب الحج/حدیث: 14598]

ابو بکر بن عیاش نے اس روایت میں یہ اضافہ کیا ہے کہ حضرت ابو اسحاق فرماتے ہیں کہ میری حضرت ابو جعفر سے ملاقات ہوئی تو میں نے آپ کو اس کے متعلق بتلایا تو آپ نے فرمایا کہ اھل بیت بھی اسی طرح کرتے ہیں۔ [مصنف ابن ابي شيبه/كتاب الحج/حدیث: 14599]