حضرت انس ارشاد فرماتے ہیں کہ جب تم نکلو اور تمہارا ارادہ حج کرنے کا ہو تو جب تک احرام نہ باندھ لو یوں مت کہو کہ میں حج کرنے والا ہوں۔ راوی کہتے ہیں کہ میں نے پوچھا تو پھر میں کیا کہوں؟ آپ نے فرمایا کہ یوں کہو کہ میں مسافر ہوں۔ [مصنف ابن ابي شيبه/كتاب الحج/حدیث: 14640]

حضرت عبد اللہ فرماتے ہیں کہ جو حج کے لیے نکلنے کا ارادہ رکھتا ہو وہ یوں نہ کہے کہ میں حج کرنے جا رہا ہوں، کیونکہ حاجی تو وہ ہے جو محرم ہے، اس کو چاہئے کہ وہ یوں کہے کہ میں مسافر، قاصد ہوں۔ [مصنف ابن ابي شيبه/كتاب الحج/حدیث: 14641]

حضرت ابراہیم سے دریافت کیا گیا کہ کوئی حج کرنے جا رہا ہو، پھر احرام باندھنے سے قبل واپس لوٹنا ظاہر ہوجائے؟ آپ نے فرمایا کہ احرام باندھنے سے قبل واپس جانے میں کوئی حرج نہیں۔ [مصنف ابن ابي شيبه/كتاب الحج/حدیث: 14642]

حضرت حکم فرماتے ہیں کہ جب کوئی شخص مکہ مکرمہ کی طرف حج کی نیت سے نکلے پھر اس کو واپس لوٹنا پڑجائے تو جب تک اس نے حج کے لیے احرام نہیں باندھا واپس لوٹ سکتا ہے۔ [مصنف ابن ابي شيبه/كتاب الحج/حدیث: 14643]

حضرت عطاء اور حضرت طاؤس فرماتے ہیں کہ اگر چاہے تو حج مکمل کرے اور اگر چاہے تو واپس لوٹ جائے۔ [مصنف ابن ابي شيبه/كتاب الحج/حدیث: 14644]

حضرت ابن عباس رضی اللہ عنہما سے مروی ہے کہ حضرت ضباعہ بنت زبیر بن عبد المطلب نبی کریم صلی اللہ علیہ وآلہ وسلم کی خدمت اقدس میں حاضر ہوئیں اور عرض کیا کہ اے اللہ کے رسول (صلی اللہ علیہ وآلہ وسلم)! میں حج کرنے کا ارادہ رکھتی ہوں تو کیا میں (احرام میں) شرط لگا لوں؟ آپ صلی اللہ علیہ وآلہ وسلم نے ارشاد فرمایا ہاں شرط لگا لو، انھوں نے عرض کیا کہ میں کیا کہوں؟ آپ صلی اللہ علیہ وآلہ وسلم نے ارشاد فرمایا کہ یوں کہہ: لَبَّیْکَ اللَّہُمَّ لَبَّیْکَ (اے اللہ!) میرے احرام کھولنے کی جگہ وہی ہے جہاں تو مجھے روک دے۔ [مصنف ابن ابي شيبه/كتاب الحج/حدیث: 14645]

حضرت عطاء بغیر احرام باندھے تلبیہ پڑھا کرتے تھے۔ [مصنف ابن ابي شيبه/كتاب الحج/حدیث: 14646]

حضرت حکم سے دریافت کیا گیا کہ کوئی شخص محرم نہیں ہے اور وہ کسی دوسرے کو تلبیہ سکھاتا ہے، آپ نے فرمایا کہ اس میں کوئی حرج نہیں۔ [مصنف ابن ابي شيبه/كتاب الحج/حدیث: 14647]

حضرت ابراہیم فرماتے ہیں کہ کوئی حرج نہیں۔ [مصنف ابن ابي شيبه/كتاب الحج/حدیث: 14648]

حضرت مجاہد فرماتے ہیں کہ ہمارے اھل ہمیں اس کی تعلیم دیا کرتے تھے۔ [مصنف ابن ابي شيبه/كتاب الحج/حدیث: 14649]