حضرت عبد اللہ بن عمر رضی اللہ عنہما ارشاد فرماتے ہیں کہ بیت اللہ کے اٹھائے جانے سے قبل اس سے فائدہ حاصل کرلو، بیشک عنقریب یہ اٹھایا جائے گا اور منہدم ہوگا دو بار، اور پھر اٹھایا جائے گا تیسری بار۔ [مصنف ابن ابي شيبه/كتاب الحج/حدیث: 14670]

حضرت عائشہ رضی اللہ عنہا سے مروی ہے کہ حضور اقدس نے ارشاد فرمایا: اگر میرے پاس گنجائش (اور طاقت) ہو تو میں کعبہ گراؤں اور اس کی دوبارہ تعمیر اس طرح کروں کہ اس میں دو دروازے بناؤں، ایک دروازہ لوگوں کے داخل ہونے کے لیے اور دوسرا دروازہ جس سے وہ باہر نکلیں، راوی کہتے ہیں کہ جب حضرت عبد اللہ بن زبیر امیر بنے تو آپ نے کعبہ کو گرایا اور آپ نے اس کے دو دروازے بنائے، پھر یہ اسی طرح رہا، جب حجاج بن یوسف آپ پر غالب آیا تو اس نے خانہ کعبہ کو گرا کر اس کو پہلی طرز پر دوبارہ تعمیر کردیا۔ [مصنف ابن ابي شيبه/كتاب الحج/حدیث: 14671]

حضرت ابو البداح بن عدی کے والد سے مروی ہے کہ نبی کریم صلی اللہ علیہ وآلہ وسلم نے چرواہوں کو اجازت دی ہے کہ وہ ایک دن رمی کریں اور ایک دن رمی کو چھوڑ دیں۔ [مصنف ابن ابي شيبه/كتاب الحج/حدیث: 14672]

حضرت عطاء سے مروی ہے کہ نبی کریم صلی اللہ علیہ وآلہ وسلم نے چرواہوں کو اجازت دی ہے کہ وہ رات میں رمی کرلیں۔ [مصنف ابن ابي شيبه/كتاب الحج/حدیث: 14673]

حضرت عطاء سے مروی ہے کہ حضرت عمر نے چرواہوں کو رخصت دی تھی کہ وہ رات منیٰ سے باہر گزار لیں۔ [مصنف ابن ابي شيبه/كتاب الحج/حدیث: 14674]

راوی کہتے ہیں کہ میں نے حضرت زہری سے اس کا ذکر کیا تو آپ نے فرمایا کہ چرواہے رات میں رمی کرتے ہیں اور رات وہاں نہیں گزارتے۔ [مصنف ابن ابي شيبه/كتاب الحج/حدیث: 14675]

حضرت ابن عمر رضی اللہ عنہما جمرات کی رمی کو اونٹوں کے چرواہوں کے درمیان باری باری اس طرح کرواتے تھے کہ آپ حکم فرماتے ان کو جو آپ کے پاس ہوتے، تو وہ زوال شمس کے بعد رمی کرتے پھر وہ اپنے اونٹوں کے پاس چلے جاتے، اور وہ چرواہے آجاتے جو اونٹوں کے پاس تھے، وہ رمی کرتے پھر وہ ٹھہرے رہتے یہاں تک کہ اگلے دن زوال شمس کے بعد رمی کرتے۔ [مصنف ابن ابي شيبه/كتاب الحج/حدیث: 14676]

حضرت ابن عباس رضی اللہ عنہما ارشاد فرماتے ہیں کہ جب جمرات کی رمی کرے تو پیدل چلنے والا سوار ہوجائے۔ [مصنف ابن ابي شيبه/كتاب الحج/حدیث: 14677]

حضرت حسن فرماتے ہیں کہ جب تک مناسک حج مکمل نہ ہوجائیں پیدل چلنے والا سوار نہ ہو۔ [مصنف ابن ابي شيبه/كتاب الحج/حدیث: 14678]

حسن فرماتے ہیں کہ جب تک (مکہ سے) واپس روانہ نہ ہو پیدل سوار نہ ہو۔ [مصنف ابن ابي شيبه/كتاب الحج/حدیث: 14679]