حضرت ہشام کے والد فرماتے ہیں جس شخص کو نفر (روانگی) کے پہلے دن منیٰ میں شام ہوجائے اور وہ اسی دن وہاں سے جانا چاہے تو اگلی صبح تک وہاں سے نہ نکلے۔ [مصنف ابن ابي شيبه/كتاب الحج/حدیث: 13250]

حضرت ابن عمر رضی اللہ عنہما فرماتے ہیں کہ جس شخص کو دوسرے دن منیٰ میں شام ہوجائے تو وہ صبح سے پہلے نہ نکلے، صبح جب سورج زائل ہونا شروع ہو تو پھر نکلے۔ [مصنف ابن ابي شيبه/كتاب الحج/حدیث: 13251]

حضرت ابن عباس رضی اللہ عنہما فرماتے ہیں کہ بیت اللہ کا طواف بھی نماز کی طرح ہی ہے مگر اس میں اللہ پاک نے بات چیت کرنے کی اجازت دی ہے، لہٰذا جو بات کرے وہ اچھی اور بھلی بات کرے۔ [مصنف ابن ابي شيبه/كتاب الحج/حدیث: 13252]

حضرت ابو سعید نے اپنے بیٹوں کو حکم دیا کہ جب وہ طواف کریں تو دوران طواف لغو حرکت نہ کریں، اور نہ بیہودہ کلام کریں، اور نہ اپنا کوئی کام کاج نمٹائیں اور نہ کسی سے بات کریں جب تک کہ وہ اپنا طواف مکمل نہ کریں، اگر وہ ان چیزوں کی طاقت رکھتے ہوں تو ضرور ایسا کریں۔ [مصنف ابن ابي شيبه/كتاب الحج/حدیث: 13253]

حضرت عطاء فرماتے ہیں کہ میں نے حضرت ابن عباس رضی اللہ عنہما اور حضرت ابن عمر رضی اللہ عنہما کے پیچھے پیچھے طواف کیا اور دوران طواف ان میں سے کسی کی بات کرنے کی آواز نہ سنی۔ [مصنف ابن ابي شيبه/كتاب الحج/حدیث: 13254]

حضرت ابن عباس رضی اللہ عنہما فرماتے ہیں کہ بیت اللہ کا طواف نماز کی مانند ہے، پس اس میں کم کلام کرو۔ [مصنف ابن ابي شيبه/كتاب الحج/حدیث: 13255]

حضرت ابراہیم بن نافع کہتے ہیں کہ میں نے حضرت طاؤس کے ساتھ طواف کیا اور ان کو کسی شخص کے ساتھ بات کرنے میں پہل کرتے ہوئے نہ دیکھا، ہاں اگر کوئی ان سے بات کرتا تو اس کو جواب دیتے۔ [مصنف ابن ابي شيبه/كتاب الحج/حدیث: 13256]

حضرت طاؤس فرماتے ہیں کہ میں اس بات کو غنیمت سمجھتا ہوں کہ میں طواف کے سات چکر پورے کرلوں لیکن میرے ساتھ کوئی شخص بات نہ کرے۔ [مصنف ابن ابي شيبه/كتاب الحج/حدیث: 13257]

حضرت الشیبانی فرماتے ہیں کہ میں نے حضرت سعید بن جبیر کے ساتھ طواف کیا آپ دوران طواف مجھ سے باتیں کرتے رہے۔ [مصنف ابن ابي شيبه/كتاب الحج/حدیث: 13258]

حضرت شریح بیت اللہ کا طواف کر رہے تھے ان سے ایک شخص نے مسئلہ دریافت کیا تو آپ نے اس کو مسئلہ بتایا۔ [مصنف ابن ابي شيبه/كتاب الحج/حدیث: 13259]