حضرت ابو ہریرہ رضی اللہ عنہ سے مروی ہے کہ آپ صلی اللہ علیہ وآلہ وسلم نے ایک شخص کو دیکھا جو ھدی کا جانور ہانک کرلے جا رہا ہے، آپ صلی اللہ علیہ وآلہ وسلم نے ارشاد فرمایا کہ اس پر سوار ہو جاؤ، اس شخص نے عرض کیا کہ یہ ھدی کا جانور ہے، آپ صلی اللہ علیہ وآلہ وسلم نے ارشاد فرمایا تیرا ناس ہو (یا فرمایا: تیری خرابی ہو) سوار ہوجا۔ [مصنف ابن ابي شيبه/كتاب الحج/حدیث: 15591]

حضرت مجاہد ارشاد فرماتے ہیں کہ جب ھدی کے جانور کے دودھ کی ضرورت پڑے تو استعمال کرے، جب اس پر سواری کی ضرورت ہو تو سوار ہوجائے اور جب اس کے اون کی ضرورت ہو تو اس کا اون اتار لے۔ [مصنف ابن ابي شيبه/كتاب الحج/حدیث: 15592]

(دوسری سند سے) حضرت مجاہد فرماتے ہیں کہ اگر (ھدی کے جانور کے) دودھ کی ضرورت ہو تو پی لے، اگر سواری کی ضرورت ہو تو سوار ہوجائے، اور اگر اون کی ضرورت ہو تو لے لے۔ [مصنف ابن ابي شيبه/كتاب الحج/حدیث: 15593]

حضرت عطاء سے مروی ہے کہ نبی کریم صلی اللہ علیہ وآلہ وسلم نے اجازت دی ہے کہ اگر ھدی کے جانور پر سوار ہونے کی ضرورت پڑے تو اس پر سوار ہو جاؤ۔ [مصنف ابن ابي شيبه/كتاب الحج/حدیث: 15594]

حضرت عامر ارشاد فرماتے ہیں کہ ھدی کے اونٹ پر سوار نہ ہو اور نہ ہی اس پر بوجھ لاد مگر یہ کہ بہت مجبوری ہو جس کے بغیر کوئی چارہ نہ ہو، اور اس کا دودھ مت استعمال کر ہاں اگر تیرا زاد راہ ختم ہوجائے تو پھر اجازت ہے۔ [مصنف ابن ابي شيبه/كتاب الحج/حدیث: 15595]

حضرت عبد اللہ نے اس شخص کے متعلق ارشاد فرمایا جس نے اپنی باندی کو آزاد کر کے اس کے ساتھ شادی کرلی کہ وہ اس شخص کی طرح ہے جو اپنے ھدی کے اونٹ پر سواری کرے۔ [مصنف ابن ابي شيبه/كتاب الحج/حدیث: 15596]

حضرت انس سے مرو ی ہے کہ نبی کریم صلی اللہ علیہ وآلہ وسلم نے ارشاد فرمایا: اس پر سوار ہو جاؤ۔ [مصنف ابن ابي شيبه/كتاب الحج/حدیث: 15597]

حضرت ابن عمر رضی اللہ عنہما سے دریافت کیا گیا کہ اگر کوئی شخص اپنی باندی کو آزاد کر کے پھر اس کے ساتھ شادی کرلے؟ فرمایا کہ یہ اس شخص کی طرح ہے جو اپنے ھدی کے اونٹ پر سواری کرے۔ [مصنف ابن ابي شيبه/كتاب الحج/حدیث: 15598]

حضرت ابن عباس رضی اللہ عنہما ارشاد فرماتے ہیں کہ اگر کوئی شخص طواف سے قبل اپنی بیوی سے صحبت کرے تو اس پر دم لازم ہے۔ [مصنف ابن ابي شيبه/كتاب الحج/حدیث: 15599]

حضرت سعید بن جبیر سے روایت ہے کہ حضرت ابن عباس رضی اللہ عنہما نے اس شخص کے بارے میں جو طواف زیارت سے پہلے اپنی بیوی سے صحبت کرلے، فرمایا کہ اس پر دم لازم ہے۔ [مصنف ابن ابي شيبه/كتاب الحج/حدیث: 15600]