حضرت عطاء کے واسطے سے حضرت مجاہد سے بھی مروی ہے کہ ان دونوں (حضرت سعید بن جبیر اور حضرت مجاہد) نے منیٰ سے کوچ کے دن ظہر کی نماز عقبہ (گھاٹی) کے پیچھے پڑھی۔ [مصنف ابن ابي شيبه/كتاب الحج/حدیث: 15701]

حضرت عروہ نے منیٰ سے کوچ کے دن ظہر کی نماز مکہ مکرمہ میں پڑھی۔ [مصنف ابن ابي شيبه/كتاب الحج/حدیث: 15702]

حضرت ابو جحیفہ فرماتے ہیں کہ میں نے نبی کریم صلی اللہ علیہ وآلہ وسلم کو منیٰ سے کوچ کے دن مقام ابطح میں دیکھا، حضرت بلال نے ظہر کی اذان دی پھر نبی کریم صلی اللہ علیہ وآلہ وسلم نے نماز ظہر پڑھائی۔ [مصنف ابن ابي شيبه/كتاب الحج/حدیث: 15703]

حضرت عطاء فرماتے ہیں کہ سنت نبوی میں سے یہ ہے کہ امام ظہر کی نماز منیٰ سے کوچ کے دن مقام ابطح میں پڑھائے۔ [مصنف ابن ابي شيبه/كتاب الحج/حدیث: 15704]

حضرت عروہ سے مروی ہے کہ نبی کریم صلی اللہ علیہ وآلہ وسلم بیت اللہ کے قریب نماز پڑھتے تھے، آپ صلی اللہ علیہ وآلہ وسلم کے اور طواف کے درمیان کوئی چیز حائل نہ ہوتی تھی پھر آپ صلی اللہ علیہ وآلہ وسلم کے بعد حضرت ابوبکر صدیق ایسا فرماتے رہے، پھر حضرت عمر، پھر اس کے بعد حضرت عمر نے اس کو واپس میقات کی طرف (مقررہ حدود پر) لوٹا دیا۔ [مصنف ابن ابي شيبه/كتاب الحج/حدیث: 15705]

حضرت جابر سے مرفوعاً مروی ہے کہ نبی کریم صلی اللہ علیہ وآلہ وسلم بیت اللہ تشریف لائے اور رکن کا استلام فرمایا پھر طواف کے تین چکروں میں رمل فرمایا اور باقی چار چکر اپنی چال پر چلے، پھر آپ صلی اللہ علیہ وآلہ وسلم مقام ابراہیم کی طرف بڑھے اور قرآن کی یہ آیت تلاوت فرمائی { وَ اتَّخِذُوْا مِنْ مَّقَامِ اِبْرٰھٖمَ مُصَلًّی } پھر مقام ابراہیم کو اپنے اور بیت اللہ کے درمیان رکھا۔ [مصنف ابن ابي شيبه/كتاب الحج/حدیث: 15706]

حضرت علقمہ نے ایک رات میں (پورا) قرآن پاک پڑھا پھر طواف کے سات چکر لگائے پھر مقام ابراہیم پر آ کر نماز ادا کی۔ [مصنف ابن ابي شيبه/كتاب الحج/حدیث: 15707]

حضرت ابراہیم فرماتے ہیں کہ مقام ابراہیم پر نماز نہ ادا کرنے کی کوئی رخصت و اجازت نہیں ہے، اگر رش کی وجہ سے اس کے پاس نماز ادا کرنے پر قدرت نہ ہو تو مزاحمت کرو یہاں تک کہ تمہیں جگہ مل جائے یا پھر اس کے برابر میں جگہ مل جائے اور کوئی حرج نہیں ہے کہ آپ اس کے مقابل ہو اور آپ کے اور اس کے درمیان کئی لوگ موجود ہوں جو نماز پڑھ رہے ہوں۔ [مصنف ابن ابي شيبه/كتاب الحج/حدیث: 15708]

حضرت حسن طواف کے بعد مقام ابراہیم پر دو رکعتیں ادا کرنے کو پسند فرماتے تھے، اور نہ پڑھنے میں کوئی حرج نہ سمجھتے تھے۔ [مصنف ابن ابي شيبه/كتاب الحج/حدیث: 15709]

حضرت عمر ارشاد فرماتے ہیں کہ جو شخص حج کے لیے آئے اس کو چاہئے کہ طواف کے سات چکر لگائے پھر مقام ابراہیم پر دو رکعتیں ادا کرے۔ [مصنف ابن ابي شيبه/كتاب الحج/حدیث: 15710]