حضرت ابو زبیر کہتے ہیں کہ میں حضرت ابن عمر رضی اللہ عنہما کے ساتھ تھا آپ کے پاس ایک شخص آیا جو حالت احرام میں تھا اور اس پر دو زرد رنگ کے کپڑے تھے اس نے پوچھا ان کپڑوں کے پہننے میں کوئی حرج ہے؟ آپ نے فرمایا: ان میں خوشبو ہے؟ اس نے عرض کیا نہیں، آپ نے فرمایا پھر اس میں کوئی حرج نہیں۔ [مصنف ابن ابي شيبه/كتاب الحج/حدیث: 13330]

حضرت عبد الرحمن بن اسحاق کہتے ہیں کہ مجھ سے میرے والد نے بیان کیا کہ انہوں نے حضرت نافع بن جبیر کو عرج مقام میں زرد رنگ کے لباس میں دیکھا اس وقت وہ حالت احرام تھے میرے چچا حضرت اسحاق نے ان سے فرمایا: یہ کیا ہے؟ انہوں نے کہا: اس کا رنگ نہیں نکلتا، (پکا رنگ ہے دھونے سے نہیں اترتا)۔ [مصنف ابن ابي شيبه/كتاب الحج/حدیث: 13331]

حضرت عطاء فرماتے ہیں کہ اس میں کوئی حرج نہیں۔ [مصنف ابن ابي شيبه/كتاب الحج/حدیث: 13332]

حضرت سفیان جو عبد اللہ بن ایاس کے غلام ہیں فرماتے ہیں کہ میں نے نبی کریم صلی اللہ علیہ وآلہ وسلم کے صحابہ کو حالت احرام میں احرام میں سفید کپڑوں میں اور لال رنگ میں رنگے ہوئے کپڑوں میں دیکھا۔ [مصنف ابن ابي شيبه/كتاب الحج/حدیث: 13333]

حضرت کثیر بن جمھان کہتے ہیں کہ ایک شخص حضرت ابن عمر رضی اللہ عنہما کے پاس آیا اور عرض کیا: اے ابو عبد الرحمن کیا آپ نے لوگوں کو رنگے ہوئے کپڑے پہننے سے منع فرمایا ہے حالانکہ آپ خود وہ پہنتے ہیں؟ آپ نے فرمایا: تیرا ناس ہو وہ تو لال مٹی ہے۔ [مصنف ابن ابي شيبه/كتاب الحج/حدیث: 13334]

حضرت یعقوب بن قیس کہتے ہیں کہ میں نے حضرت طاؤس کو حالت احرام میں دو کپڑوں میں دیکھا جو مغرہ (سرخ مٹی) سے رنگے گئے تھے۔ [مصنف ابن ابي شيبه/كتاب الحج/حدیث: 13335]

حضرت حرام بن ہشام کہتے ہیں کہ میں نے حضرت عمر بن عبد العزیز کو حالت احرام میں دو لال رنگ میں رنگے ہوئے کپڑوں میں دیکھا۔ [مصنف ابن ابي شيبه/كتاب الحج/حدیث: 13336]

حضرت عدی بن ثابت فرماتے ہیں کہ نبی مکرم (صلی اللہ علیہ وآلہ وسلم) کے کچھ صحابہ حج کی ابتداء مدینہ سے کرتے تھے اور فرماتے تھے ہم وہاں سے احرام باندھتے ہیں جہاں سے نبی کریم صلی اللہ علیہ وآلہ وسلم احرام باندھتے تھے۔ [مصنف ابن ابي شيبه/كتاب الحج/حدیث: 13337]

حضرت ابراہیم فرماتے ہیں جب تم حج کرنے کا ارادہ کرو اور پہلے حج نہ کیا ہو تو اپنے حج کی ابتداء مکہ سے کرو پھر اگر چاہو تو مدینہ چلے جاؤ۔ [مصنف ابن ابي شيبه/كتاب الحج/حدیث: 13338]

حضرت مجاہد فرماتے ہیں جب تم حج اور عمرہ کرنے کا ارادہ رکھتے ہو تو مکہ سے ابتداء کرو اور ہر چیز کو اسی کے تابع رکھو۔ [مصنف ابن ابي شيبه/كتاب الحج/حدیث: 13339]