حضرت ابن عباس رضی اللہ عنہما سے مروی ہے کہ حضرت زؤیب الخزاعی نے بیان فرمایا کہ نبی کریم صلی اللہ علیہ وآلہ وسلم نے ان کے ساتھ کچھ اونٹ بھیجے اور فرمایا: اگر ان میں سے کوئی اونٹ تھکن سے چور ہوجائے اور اس کے مرنے کا اندیشہ ہو تو اس کو ذبح کرلینا پھر اس کے نعل کو خون میں ڈبو دینا اور اس (نعل) کو اس کے پہلو پر مار دینا، آپ اور آپ کے جماعت کے ساتھی اس میں سے کچھ نہ کھائیں۔ [مصنف ابن ابي شيبه/كتاب الحج/حدیث: 16041]

حضرت نافع فرماتے ہیں کہ حضرت عبد اللہ نے میرے ساتھ نفلی ھدی کا اونٹ بھیجا، وہ راستہ میں ہی تھکن سے چور ہوگیا تو میں نے اس کو ذبح کردیا اور اس کے گوشت کا ایک حصہ صدقہ کردیا، اور اس کا کچھ گوشت اپنے ساتھ واپس لے کر آیا، آپ نے اس میں سے تناول فرمایا اور اس کا بدل بھی ادا نہ فرمایا۔ [مصنف ابن ابي شيبه/كتاب الحج/حدیث: 16042]

حضرت عبد اللہ سے دریافت کیا گیا کہ اگر نفلی ھدی کا جانور راستہ میں تھکن سے چور ہوجائے؟ آپ نے فرمایا خود کھاؤ اور دوسروں کو کھلاؤ اور آپ پر اس کا بدل لازم نہیں ہے۔ [مصنف ابن ابي شيبه/كتاب الحج/حدیث: 16043]

حضرت عطاء فرماتے ہیں کہ نفلی ھدی، حج تمتع کی ھدی، روکے جانے کی ھدی اور نذر کی ھدی کھا سکتے ہو اگر اس کو متعین نہ کیا ہو۔ [مصنف ابن ابي شيبه/كتاب الحج/حدیث: 16044]

حضرت سعید بن جبیر فرماتے ہیں کہ ھدی تمتع اور نفلی ھدی کے گوشت کو کھالو۔ [مصنف ابن ابي شيبه/كتاب الحج/حدیث: 16045]

حضرت ابن عباس رضی اللہ عنہما ارشاد فرماتے ہیں کہ صدقہ کرنا (نفلی عبادت) نماز، روزہ اور طواف (اگر نفلی ہوں تو) اگر چاہو تو پورا کرلو اور اگر چاہو تو ختم کردو۔ [مصنف ابن ابي شيبه/كتاب الحج/حدیث: 16046]

حضرت حسن، حضرت قتادہ، حضرت ابن سیرین اس شخص کے متعلق فرماتے ہیں جو نفلی طواف شروع کر دے پھر اس کو نامکمل ختم کر دے کہ وہ اس طواف کی قضا کرے۔ [مصنف ابن ابي شيبه/كتاب الحج/حدیث: 16047]

حضرت ابراہیم فرماتے ہیں کہ اگر طواف کے دوران فرض نماز کا وقت ہوجائے تو طواف کو چھوڑ کر نماز پڑھے، پھر طواف کے جتنے چکر رہ گئے ان کو پورا کرلے۔ [مصنف ابن ابي شيبه/كتاب الحج/حدیث: 16048]

حضرت عطاء، حضرت طاؤس اور حضرت مجاہد فرماتے ہیں کہ اگر چاہو تو اسی طواف کو پورا کرلو اور اگر چاہو تو دوبارہ نیا طواف کرلو۔ [مصنف ابن ابي شيبه/كتاب الحج/حدیث: 16049]

حضرت سالم صفا ومروہ کی سعی کر رہے تھے کہ نماز کا وقت ہوگیا تو انہوں نے نماز ادا فرمائی پھر صفا ومروہ تشریف لے گئے اور جتنے چکر رہ گئے تھے ان کو پورا فرمایا۔ [مصنف ابن ابي شيبه/كتاب الحج/حدیث: 16050]