حضرت عبد الملک مکہ مکرمہ کے شیخ سے روایت کرتے ہیں کہ میں نے حضرت ابن عمر رضی اللہ عنہما کو طواف کرتے ہوئے دیکھا اور نماز کا وقت ہوگیا، وہ نماز میں شامل ہوگئے، جب نماز مکمل ہوگئی تو اسی طواف کو مکمل کیا۔ [مصنف ابن ابي شيبه/كتاب الحج/حدیث: 16051]

حضرت ابن عباس رضی اللہ عنہما نے اپنے طواف کے باقی چکروں کو پورا فرمایا۔ [مصنف ابن ابي شيبه/كتاب الحج/حدیث: 16052]

حضرت سعید بن جبیر نے طواف کے پانچ چکر لگائے تو نماز کا وقت ہوگیا تو آپ نے نماز ادا فرمائی پھر اپنے طواف کے باقی چکر مکمل فرمائے اور دو رکعتیں ادا فرمائیں۔ [مصنف ابن ابي شيبه/كتاب الحج/حدیث: 16053]

حضرت ابراہیم بن اسماعیل بن درھم فرماتے ہیں کہ حضرت مجاہد نے مجھے کسی کام کے لیے بھیجا جب کہ میں ان کے ساتھ طواف کر رہا تھا، میں نے ان سے عرض کیا کہ: میرا طواف ابھی مکمل نہیں ہوا ہے، فرمایا لوٹ کر پھر اس کو پورا کرے۔ [مصنف ابن ابي شيبه/كتاب الحج/حدیث: 16054]

حضرت حسن اس شخص کے متعلق فرماتے ہیں کہ جس کو دوران طواف ضرورت پیش آجائے، فرمایا طواف کو چھوڑ دے اور بعد میں نئے سرے سے طواف کرے۔ [مصنف ابن ابي شيبه/كتاب الحج/حدیث: 16055]

حضرت طاؤس عرفہ کے دن تشریف لاتے تو عرفات آجاتے اور کعبہ نہ جاتے۔ [مصنف ابن ابي شيبه/كتاب الحج/حدیث: 16056]

حسن اور حضرت عطاء فرماتے ہیں کہ جو شخص حج افراد کرتے ہوئے آئے اور وہ لوگوں کو وقوف عرفہ میں پائے تو ان کے ساتھ وہاں وقوف کرے، پھر قربانی کا دن آئے تو ایک طواف کرے اور صفا ومروہ کی سعی کرے اس کے لیے طواف قدوم، طواف زیارت کی طرف سے کافی ہوجائے گا، اور اس پر واپس آتے وقت طواف وداع ہے۔ [مصنف ابن ابي شيبه/كتاب الحج/حدیث: 16057]

حضرت ابو جعفر سے اس شخص کے متعلق دریافت کیا گیا جو قران کرے؟ فرمایا کہ مجھے یہ بات پسند ہے کہ قران کرنے والا جہاں سے احرام باندھے وہیں سے ھدی چلائے۔ [مصنف ابن ابي شيبه/كتاب الحج/حدیث: 16058]

حضرت عطاء سے دریافت کیا گیا کہ اگر کوئی شخص حج وعمرہ ملا کر کرے؟ فرمایا کہ اگر وہ چاہے تو ھدی ساتھ چلائے اور اگر چاہے تو اس کے لیے مکہ مکرمہ سے ایک بکری خرید لینا کافی ہے۔ [مصنف ابن ابي شيبه/كتاب الحج/حدیث: 16059]

حضرت شریح اور حضرت حسین بن علی رضی اللہ عنہ نے قران کیا اور ھدی نہیں بھیجی۔ [مصنف ابن ابي شيبه/كتاب الحج/حدیث: 16060]