حضرت ابن عون فرماتے ہیں کہ حضرت قاسم سے حج کے مہینوں میں عمرہ کرنے کے متعلق دریافت کیا گیا؟ آپ نے فرمایا: فقہاء اور علماء اس عمرے کو مکمل نہیں سمجھتے۔ [مصنف ابن ابي شيبه/كتاب الحج/حدیث: 13500]

حضرت میمون فرماتے ہیں میں نے اپنے اس شہر سے حج کے مہینوں کے علاوہ دوسرے مہینوں میں عمرہ کیا۔ [مصنف ابن ابي شيبه/كتاب الحج/حدیث: 13501]

حضرت سعید بن المسیب سے مروی ہے کہ نبی کریم صلی اللہ علیہ وآلہ وسلم نے تین عمرے فرمائے اور تینوں عمرے ذی القعدہ کے مہینے میں ادا فرمائے۔ [مصنف ابن ابي شيبه/كتاب الحج/حدیث: 13502]

حضرت ابو معن فرماتے ہیں کہ میں نے حضرت جابر بن زید اور حضرت ابو العالیہ کو دیکھا کہ آپ دونوں نے حج کے دس دنوں میں عمرہ ادا کیا۔ [مصنف ابن ابي شيبه/كتاب الحج/حدیث: 13503]

حضرت یزید اپنے بھائی سے روایت کرتے ہیں کہ حضرت عمران بن حصین نے مجھ سے فرمایا: جان لو بیشک رسول اکرم (صلی اللہ علیہ وآلہ وسلم) نے اپنے گھر والوں میں سے کچھ افراد کو ذی الحجہ کے دس دنوں میں عمرہ کروایا، آپ نے اس سے منع نہیں فرمایا اور نہ ہی اس کا منسوخ ہونا نازل ہوا، اس کے متعلق کہنے والے نے جو چاہا وہ کہہ دیا۔ [مصنف ابن ابي شيبه/كتاب الحج/حدیث: 13504]

حضرت عائشہ رضی اللہ عنہا فرماتی ہیں کہ نبی کریم صلی اللہ علیہ وآلہ وسلم نے جتنے بھی عمرے کیے ہیں، میں آپ کے ساتھ تھی اور آپ صلی اللہ علیہ وآلہ وسلم نے تمام عمرے ذی القعدہ کے مہینے میں ادا کیے۔ [مصنف ابن ابي شيبه/كتاب الحج/حدیث: 13505]

حضرت ابن عمر رضی اللہ عنہما ارشاد فرماتے ہیں کہ ذی الحجہ کے دس دنوں میں عمرہ کرنا مجھے حج کے بعد عمرہ کرنے سے زیادہ پسندیدہ ہے۔ [مصنف ابن ابي شيبه/كتاب الحج/حدیث: 13506]

حضرت جابر فرماتے ہیں کہ نبی کریم صلی اللہ علیہ وآلہ وسلم یوم النحر میں بیت اللہ تشریف لائے اور مکہ میں نماز ظہر ادا فرمائی۔ [مصنف ابن ابي شيبه/كتاب الحج/حدیث: 13507]

حضرت وبرہ فرماتے ہیں کہ حضرت اسود یوم النحر میں جب رمی فرماتے تو اسی دن بیت اللہ کی زیارت کرتے پھر اسی دن اپنی منزل پر چلے جاتے، یہاں تک کہ جب لوگ نکلتے تو وہ بھی ان کے ساتھ نکلتے۔ [مصنف ابن ابي شيبه/كتاب الحج/حدیث: 13508]

حضرت محمد اس بات کو پسند فرماتے تھے کہ یوم النحر میں عصر سے پہلے بیت اللہ آ کر اس کا طواف کیا جائے۔ [مصنف ابن ابي شيبه/كتاب الحج/حدیث: 13509]