حضرت ابن عامر نے خراسان سے احرام باندھا تو حضرت عثمان بن عفان اور دیگر حضرات نے اس کی مذمت کی اور انہوں نے اس کو ناپسند کیا۔ [مصنف ابن ابي شيبه/كتاب الحج/حدیث: 13120]

حضرت ابو ذر فرماتے ہیں کہ اپنے انہی کپڑوں سے فائدہ حاصل کرو، بیشک تمہاری سواری تمہیں اللہ سے کسی چیز میں مستغنی نہیں کرتی۔ [مصنف ابن ابي شيبه/كتاب الحج/حدیث: 13121]

حضرت علقمہ اپنے کپڑوں میں ہی فائدہ اٹھاتے۔ [مصنف ابن ابي شيبه/كتاب الحج/حدیث: 13122]

حضرت عمر نے ایک شخص کو دیکھا جس نے مطراس الہند سے احرام باندھا ہوا تھا آپ نے فرمایا: اس شخص کو دیکھو اس نے اپنی طرف سے کیا بنایا ہوا ہے حالانکہ اللہ پاک نے اس پر آسانی فرمائی ہے۔ [مصنف ابن ابي شيبه/كتاب الحج/حدیث: 13123]

حضرت عمران بن حصین نے بصرہ سے احرام بندھا، پھر وہ حضرت عمر کے پاس آئے تو آپ نے ان سے سخت کلام کیا اور فرمایا: لوگ بیان کریں گے کہ نبی کریم صلی اللہ علیہ وآلہ وسلم کے اصحاب میں سے ایک شخص شہروں میں سے کسی شہر سے احرام باندھتا تھا۔ [مصنف ابن ابي شيبه/كتاب الحج/حدیث: 13124]

حضرت مسلم ابی سلمان کہتے ہیں ایک شخص نے کوفہ سے احرام باندھا، حضرت عمر نے اس کو خستہ حالت میں دیکھا تو اس کو بازو سے پکڑا اور لوگوں کی مجلسوں میں گھمایا اور ساتھ یہ فرما رہے تھے اس شخص کو دیکھو اس نے اپنی طرف سے یہ کام کیا ہے حالانکہ اللہ تعالیٰ نے اس پر آسانی فرمائی ہے۔ [مصنف ابن ابي شيبه/كتاب الحج/حدیث: 13125]

حضرت مجاہد سے ایک شخص نے دریافت کیا کونسی صورت زیادہ افضل ہے، اپنے گھر سے احرام باندھوں، قوم و قبیلہ کی مسجد سے باندھوں یا اپنے شہر سے باندھوں یا میقات سے باندھوں؟ حضرت مجاہد نے فرمایا میں تو یوم الترویہ کے دن احرام باندھتا ہوں پھر بھی مجھے خوف رہتا ہے کہ میں احرام کھولنے سے پہلے اپنے احرام میں کوئی خلل نہ ڈال بیٹھوں۔ [مصنف ابن ابي شيبه/كتاب الحج/حدیث: 13126]

حضرت ابن عباس رضی اللہ عنہما ارشاد فرماتے ہیں کہ جب حج یا عمرہ کے ارادے سے ھدی کو قلادہ ڈال (باندھ) دیا جائے تو وہ شخص محرم ہوگیا۔ [مصنف ابن ابي شيبه/كتاب الحج/حدیث: 13127]

حضرت ابراہیم فرماتے ہیں جب ھدی کو احرام کے ارادہ سے قلادہ ڈال (باندھ) دیا جائے تو احرام واجب ہوگیا۔ [مصنف ابن ابي شيبه/كتاب الحج/حدیث: 13128]

حضرت شعبی فرماتے ہیں کہ میں نے قادسیہ میں ایک شخص کو دیکھا اس نے ھدی کو قلادہ ڈالا (باندھا) ہوا ہے اور خود قباء پہنی ہے اور عمامہ باندھا ہوا ہے، میں نے اس کو حکم دیا کہ وہ اپنا عمامہ اتار دے، اور فرمایا: جب کوئی شخص ھدی پر قلادہ ڈال دے یا اس پر جھول ڈال دے تو وہ محرم ہوجاتا ہے۔ [مصنف ابن ابي شيبه/كتاب الحج/حدیث: 13129]