حضرت ابن عمر رضی اللہ عنہما فرماتے ہیں جس نے قلادہ باندھا وہ محرم بن گیا۔ [مصنف ابن ابي شيبه/كتاب الحج/حدیث: 13140]

حضرت عائشہ رضی اللہ عنہا فرماتی ہیں میں نے نبی کریم صلی اللہ علیہ وآلہ وسلم کی ھدی کے جانور کے قلادوں کی رسی کو بٹا، پھر حضور صلی اللہ علیہ وآلہ وسلم نے ھدی پر قلادہ باندھا اور اس کو بھیج دیا لیکن مقیم رہے، اور ان چیزوں میں سے کسی سے بھی اجتناب نہ کیا جن سے محرم کرتا ہے۔ [مصنف ابن ابي شيبه/كتاب الحج/حدیث: 13141]

حضرت انس نے ھدی بھیجی اور جن چیزوں سے محرم اجتناب کرتا ہے ان میں سے کسی چیز سے اجتناب نہ کیا۔ [مصنف ابن ابي شيبه/كتاب الحج/حدیث: 13142]

حضرت سعید بن المسیب فرماتے ہیں کہ جو شخص ھدی کا جانور بھیج دے وہ ان چیزوں میں سے کسی چیز سے اجتناب نہیں کرے گا جن سے محرم کرتا ہے، صرف مزدلفہ کی رات میں بیوی سے دور رہے۔ [مصنف ابن ابي شيبه/كتاب الحج/حدیث: 13143]

حضرت حسن یہی فتویٰ دیتے ہیں اور یہی فرماتے ہیں کہ وہ ان چیزوں میں سے کسی چیز سے اجتناب نہیں کرے گا جن سے محرم بچتا ہے۔ [مصنف ابن ابي شيبه/كتاب الحج/حدیث: 13144]

حضرت عائشہ رضی اللہ عنہا فرماتی ہیں محرم صرف وہی ہوتا ہے جو (احرام کی نیت سے) آواز بلند کرے اور تلبیہ کہے۔ [مصنف ابن ابي شيبه/كتاب الحج/حدیث: 13145]

حضرت علقمہ فرماتے ہیں کہ حضرت عبد اللہ نے اپنی ھدی کا جانور میرے ساتھ روانہ فرمایا لیکن محرم نہ بنے۔ [مصنف ابن ابي شيبه/كتاب الحج/حدیث: 13146]

حضرت عبد اللہ نے ھدی بھیجی لیکن ان چیزوں سے اجتناب نہ کیا جن سے محرم حالت احرام میں کرتا ہے۔ [مصنف ابن ابي شيبه/كتاب الحج/حدیث: 13147]

حضرت عمر، حضرت علی رضی اللہ عنہ اور حضرت ابن عباس رضی اللہ عنہما اس شخص کے متعلق فرماتے ہیں جو ھدی کا جانور بھیجے وہ ان چیزوں سے اجتناب کرے گا جن سے محرم حالت احرام میں اجتناب کرتا ہے، سوائے اس کے کہ وہ تلبیہ نہیں پڑھے گا۔ [مصنف ابن ابي شيبه/كتاب الحج/حدیث: 13148]

حضرت جعفر فرماتے ہیں کہ جن لوگوں کے ہاتھ ھدی بھیج رہا ہے ان سے ایک دن مقرر کر کے وعدہ لے لے، پھر جب وہ دن آجائے جس دن (ھدی کا) اشعار کرنے کا ان سے وعدہ ہوا تھا تو وہ ان سب چیزوں سے اجتناب کرے جن سے محرم کرتا ہے۔ [مصنف ابن ابي شيبه/كتاب الحج/حدیث: 13149]