حضرت ابراہیم اس عورت کے متعلق فرماتے ہیں جس کو طواف کے تین چکر لگانے کے بعد حیض آجائے تو اس کی طرف سے شمار کیے جائیں گے وہ چکر جو وہ لگا چکی ہے۔ [مصنف ابن ابي شيبه/كتاب الحج/حدیث: 13920]

حضرت ابراہیم سے دریافت کیا گیا کہ آدمی طواف کر رہا تھا اور ابھی کچھ چکر باقی ہوں اور اس کو حدث لاحق ہوجائے یا عورت کو دوران طواف حیض آجائے تو وہ کہاں سے طواف کی دوبارہ ابتداء کریں آپ نے فرمایا چکروں کے بعد حدث یا حیض لاحق ہوا ہے اس کے بعد سے شروع کریں۔ [مصنف ابن ابي شيبه/كتاب الحج/حدیث: 13921]

حضرت عطاء فرماتے ہیں کہ میرے نزدیک دوبارہ نئے سرے سے طواف کرنا زیادہ پسندیدہ ہے اور اگر وہ اسی پر بناء کرے تو بھی کوئی حرج نہیں۔ [مصنف ابن ابي شيبه/كتاب الحج/حدیث: 13922]

حضرت ابن عباس رضی اللہ عنہما نے حالت احرام میں اپنی آنکھوں سے (پلکوں کے) بال اکھیڑے۔ [مصنف ابن ابي شيبه/كتاب الحج/حدیث: 13923]

حضرت عطاء، حضرت طاؤس اور حضرت مجاہد محرم شخص کے متعلق فرماتے ہیں کہ اگر وہ بغلوں کے بال کاٹے یا ناخن کاٹ لے تو اس پر فدیہ ہے۔ [مصنف ابن ابي شيبه/كتاب الحج/حدیث: 13924]

حضرت طاؤس سے مرفوعاً مروی ہے کہ نبی کریم صلی اللہ علیہ وآلہ وسلم نے ارشاد فرمایا: جس شخص کے گھر والے میقات کے اندر رہتے ہوں تو وہ وہاں سے احرام باندھے جہاں سے وہ (سفر کا) آغاز کرے، یہاں تک کہ یہی حکم اہل مکہ تک پہنچتا ہے۔ [مصنف ابن ابي شيبه/كتاب الحج/حدیث: 13925]

حضرت طاؤس، حضرت عطاء اور حضرت مجاہد فرماتے ہیں کہ اگر کسی شخص کے اہل مکہ اور میقات کے درمیان رہائش پذیر ہوں تو وہ اپنے اہل کے پاس احرام باندھے۔ [مصنف ابن ابي شيبه/كتاب الحج/حدیث: 13926]

حضرت حسن فرماتے ہیں کہ اس میں کوئی حرج نہیں کہ کسی شخص کا گھر میقات کے اندر ہو تو وہ اپنے گھر سے احرا م باندھ لے۔ [مصنف ابن ابي شيبه/كتاب الحج/حدیث: 13927]

حضرت عطاء فرماتے ہیں کہ اگر کسی کے گھر والے میقات کے اندر ہی رہائش پذیر ہوں تو وہ وہاں سے احرام باندھے جہاں سے وہ (سفر کا) آغاز کرے۔ [مصنف ابن ابي شيبه/كتاب الحج/حدیث: 13928]

حضرت ابراہیم فرماتے ہیں کہ اگر کوئی شخص یوم النحر میں جمرہ عقبہ کی رمی بھول جائے یہاں تک کہ شام ہوجائے تو وہ اگلے دن رمی کرلے اور اس تاخیر کرنے کی وجہ سے دم ادا کرے۔ [مصنف ابن ابي شيبه/كتاب الحج/حدیث: 13929]