حضرت ابن عمر رضی اللہ عنہما سے متعہ کے بارے میں سوال کیا گیا تو انہوں نے فرمایا کہ ہم تو اسے زنا ہی سمجھتے ہیں۔ [مصنف ابن ابي شيبه/كتاب النكاح/حدیث: 17950]

حضرت ابن عمر رضی اللہ عنہما سے متعہ کے بارے میں سوال کیا گیا تو انہوں نے فرمایا کہ یہ حرام ہے۔ ان سے کہا گیا کہ حضرت ابن عباس رضی اللہ عنہما تو اس کے جواز کا فتویٰ دیتے ہیں۔ حضرت ابن عمر رضی اللہ عنہما نے فرمایا کہ پھر وہ حضرت عمر رضی اللہ عنہ کے زمانے میں اس کے بارے میں دبی آواز میں بھی کچھ کیوں نہیں کہتے تھے۔ [مصنف ابن ابي شيبه/كتاب النكاح/حدیث: 17951]

حضرت سعید بن مسیب رحمہ اللہ فرماتے ہیں کہ اللہ تعالیٰ حضرت عمر رضی اللہ عنہ پر رحم فرمائے اگر وہ متعہ سے منع نہ کرتے تو زنا سرعام ہوا کرتا۔ [مصنف ابن ابي شيبه/كتاب النكاح/حدیث: 17952]

حضرت حسن رحمہ اللہ فرماتے ہیں کہ خدا کی قسم! متعہ صرف تین دن کے لئے جائز تھا، رسول اللہ صلی اللہ علیہ وسلم نے اس کی اجازت دی تھی، متعہ نہ تو اس سے پہلے جائز تھا نہ اس کے بعد کبھی جائز ہوا۔ [مصنف ابن ابي شيبه/كتاب النكاح/حدیث: 17953]

حضرت ابن ذؤیب رحمہ اللہ فرماتے ہیں کہ میں نے حضرت ابن زبیر رضی اللہ عنہ کو خطبہ دیتے ہوئے یہ فرماتے سنا کہ بھیڑیئے کی کنیت ابو جعدہ ہے اور متعہ زنا ہے۔ [مصنف ابن ابي شيبه/كتاب النكاح/حدیث: 17954]

حضرت ابن طاؤس رحمہ اللہ فرماتے ہیں کہ متعہ کا طریقہ نکاح والا تھا لیکن اس میں مدت عورتوں کے اختیار میں ہوتی تھی۔ [مصنف ابن ابي شيبه/كتاب النكاح/حدیث: 17955]

حضرت عمر رضی اللہ عنہ فرماتے ہیں کہ اگر میرے پاس کوئی ایسا آدمی لایا جائے جس نے کسی عورت سے متعہ کیا ہو، اگر وہ شادی شدہ ہو تو میں اسے سنگسار کروں گا اور اگر وہ غیر شادی شدہ ہو تو میں اسے کوڑے لگواؤں گا۔ [مصنف ابن ابي شيبه/كتاب النكاح/حدیث: 17956]

حضرت مکحول رحمہ اللہ فرماتے ہیں کہ عورت سے کسی مخصوص مدت تک کے لئے شادی کرنا زنا ہے۔ [مصنف ابن ابي شيبه/كتاب النكاح/حدیث: 17957]

حضرت عبد اللہ رضی اللہ عنہ فرماتے ہیں کہ ایک مرتبہ ہم اپنی جوانی کے دور میں حضور صلی اللہ علیہ وسلم کے ساتھ تھے۔ ہم نے (شدتِ شہوت) سے تنگ آکر حضور صلی اللہ علیہ وسلم سے عرض کیا کہ ہم خود کو خصی کرنا چاہتے ہیں۔ آپ صلی اللہ علیہ وسلم نے فرمایا کہ ایسا نہ کرو، پھر آپ نے ہمیں رخصت دے دی کہ ہم عورت سے کپڑے کے بدلے ایک خاص مدت تک کے لئے نکاح کرلیں۔ پھر حضرت عبداللہ رضی اللہ عنہ نے یہ آیت پڑھی:: اے ایمان والو! اللہ تعالیٰ نے جو پاکیزہ چیزیں تمہارے لئے حلال کی ہیں، انہیں حرام نہ کرو۔ [مصنف ابن ابي شيبه/كتاب النكاح/حدیث: 17958]

حضرت عمر رضی اللہ عنہ فرماتے ہیں کہ اگر میرے پاس کوئی حلالہ کرنے والا لایا گیا یا وہ شخص لایا گیا جس کے لئے حلالہ کیا گیا تھا تو میں انہیں سنگسار کروں گا۔ [مصنف ابن ابي شيبه/كتاب النكاح/حدیث: 17959]